Zekaria

6 E KUA nānā akaou akaera au i taku mata, e kua akara, e i na, e puke kariota e a i te aere anga mai mei rotopu i nga maunga e rua, e maunga veo oki aua nga maunga ra;

2 Tei te kariota mua ra, e au oroenua kutekute ïa; e tei te rua o te kariota ra, e au oroenua kerekere ïa;

3 E tei te toru o te kariota ra, e au oroenua teatea ïa; e tei te a o te kariota ra, e au oroenua kotuutuu keu ïa.

4 Kua karanga atura au i reira, na ko atura, ki te angela i tuatua mai iaku ra, Eaa teia, e taku atu?

5 E kua tuatua maira te angela na ko maira, kiaku, Ko nga vaerua e a o te rangi ra teia, ko tei aere atu mei te tu ua anga i mua i te aroaro o te Atu o te ao katoa nei.

6 Ko te reira ma te au oroenua kerekere io na, te aere ra ki te enua ki te pae ki apatokerau ra; e te aere ra nga mea teatea na muri; e te aere ra nga mea kotuutuu ki te enua ki te pae ki apatonga ra.

7 Kua aere iora nga kotuutuu, kua timata i te aere, e kia aaere ua atu e kia oki mai na runga i te enua nei; e kua tuatua maira aia, Ka aere, ka aaere atu ka oki mai na runga i te enua ra; e kua aaere ua atura ratou e kua oki mai na runga i te enua ra.

8 Kua kapiki maira aia kiaku, e kua tuatua maira kiaku, na ko maira, I na, te aronga i aere ki te enua ki te pae i apatokerau ra, kua anga taku riri ia ratou i te enua i te pae i apatokerau ra.

9 E kua tae maira te tuatua a Iehova kiaku nei, na ko maira.

10 Ka rave i to te aronga tuikaa ra, i to Heledai, Tobiia, e to Iedaia, tei mei Babulonia mai, ka aere ei koe i taua rā ra, ka tomo ei i te are o Iosia, te tamaiti a Zephania;

11 Ka rave oki koe i te ario, e te auro, ka anga ai i nga korona, ka tuku ei ki runga i te mimiti o Iosua, te tamaiti a Iosedeka, i te taunga maata ra;

12 Ka karanga atu ei koe kiaia, ka na ko atu, Te na ko mairā Iehova Sabaota ra, i te tuatua anga mai; I na, ko taua tangata ra, ko te RARA tona ra ingoa, e tupu maira aia no roto i tona ngai; e nana e patu i te nao o Iehova:

13 Nana rai oki e patu i te nao o Iehova, e nana uaorai e apai i te kakā; e ka noo aia ma te mana ki runga i tona terono, e ei taunga aia ki runga i tona terono, e riro oki te tuatua au i rotopu ia raua ravarai.

14 E ka riro oki nga korona ia Helema, e ia Tobiia, e ia Iedaia, e ia Hena, te tamaiti a Zephania, ei manako anga i roto i te nao o Iehova.

15 E to te atea ke ra te ka aere mai e patu i te nao o Iehova; e kite oki kotou e na Iehova Sabaota au i tono mai kia kotou nei. Ka tupu rai teia, kia akarongo tikai kotou i te reo o to kotou Atua ra ko Iehova.