Isaia

66 TE NA ko mairā Iehova: Ko te au rangi toku terono, e te enua nei ko toku takainga vaevae: teiea tena are ta kotou e akatu na noku? e teiea taua ngai akaangaroi anga noku ra?

2 Na toku rima oki i anga i taua au mea katoa nei; e i vai ana oki taua au mea katoa ra, te tuatua mairā Iehova: teia ra taku tangata e akara atu, ko tei akaaka, e tei tataraara te ngakau, e tei ruketekete i taku tuatua.

3 Ko tei ta i te puakatoro ra, kua ta ïa i te tangata; te oronga i te punua mamoe ra, kua tipu ïa i te mimiti o te puaka aoa; ko tei apai i te atinga kai ra, kua apai ïa i te toto puaka maori: ko tei tutungi i te atinga kakara, e idolo tana e akameitaki; ko ratou uaorai tei iki i to ratou uaorai aerenga; e te rekareka ra to ratou ngakau i ta ratou au mea viivii.

4 E iki katoa au i to ratou ra au mea tumatetenga; e ta ratou e mataku ra, ko taku ïa e apai mai ki runga ia ratou; no te mea ko au tei kapiki atu, e kare rava tetai i îō mai, ko au tei karanga atu, e kare rava ratou i akarongo mai: kua rave ra ratou i te kino ki mua i oku mata, e kua iki ra ratou i tei inangaro koreia e au ra.

5 E akarongo mai i te tuatua a Iehova, e tei ruketekete i tana tuatua: Ko to kotou au taeake, i riri mai ia kotou ra, ko tei titiri ia kotou ki vao no toku nei ingoa, tei karanga e, Kia akakakāiā Iehova: e kitea maira aia ei rekareka anga no kotou, kareka ratou, e akama ïa.

6 E reo i te mutamuta ua anga no roto i te oire! e reo no roto i te nao! te reo o Iehova i te tutaki anga i tona au enemi!

7 Ou aia i mamae mai ei, kua anau maira; e kare i mamae tika, kua anau tana e tamaroa.

8 Koai tei akarongo akenei i te tuatua mei teianei? koai tei kite i te au mea mei teianei te tu? e enua katoa ainei tei mamae i te rā okotai? e anau ainei te enua katoatoa i te kamoanga mata nei? tei te mamae anga ra oki i anau mai ei ta Ziona au tamariki.

9 E akavaitata ainei oki au ki te anau, e auraka e akaanau rava? te tuatua mairā Iehova: e akaanau ainei au, ka papani atu ei? te tuatua maira to Atua.

10 E rekareka kotou ma Ierusalema katoa, e rere ua kotou i te rekareka iaia, kotou, e te aronga katoa e aroa iaia ra: kia maata to kotou rekareka iaia, kotou katoa ko tei aue iaia ra;

11 Kia ngote kotou, e kia pangia te kaki i te u ra i te akapumaana nana ra; kia akate mai kotou i te u, ka rekarekaʼi i te maata o tona ra kakā.

12 Te na ko maira oki a Iehova: I na, te totoa nei au i te au ki runga iaia mei te vai ra, e te apinga a te au enua mei te vai taʼe ra: e ngote kotou i te u, e apai taukupu aereia; e ki runga i nga turi kotou e akatutuiaʼi.

13 Mei tei akapumaanaia e tona ra metua vaine, ko toku ïa akapumaana ia kotou; ei Ierusalema oki kotou e akapumaanaiaʼi.

14 E kite oki kotou, e rekareka oki to kotou ngakau, e ruperupe oki to kotou aronga ivi mei te rakau rikiriki mata ra: e kitea te rima o Iehova e tona ra au tavini, e riri ra aia i tona ra au enemi.

15 I na oki, te aere mairā Iehova ma te ai ra, e tona ra au kariota mei te puaioio ra, e akapuangi mai i tona riri ma te veravera maata; e te akamura nana ma te mura ai ra.

16 E taumāro mai oki a Iehova i te ai, e ma te koke katoa nana ki runga i te tangata katoa ra, e ka manganui ta Iehova tangata taia.

17 Ko ratou ko tei akatapu ia ratou uaorai, e kua tamā ia ratou uaorai, ki roto i te au koro ra, i te aru anga i te mea okotai, ki rotopu i te aronga i kai i te puaka maori, e te mea viivii ra, e te kiore ngangaere ra; okotai o ratou akapou angaia, te tuatua mairā Iehova.

18 Ko au nei ra, kua tae mai oki ta ratou ravenga, e to ratou manako ra, ki mua iaku nei; e akaputuputu mai au i te au enua ravarai, e te au reo katoa; e ka aere mai oki ratou, kia kite oki ratou i toku ra kakā.

19 E tuku atu au i te akairo ia ratou, e te aronga i ora maira, taku ïa e akaunga ki te au enua ra, ki Taresisa, ki Pula, ki Luda akainaina ana ra, ki Tubala e ki Iavana, ki nga enua mamao i taatai ra; ki tei kore i akarongo i toku ingoa, e kare i kite i toku ra kakā: e na ratou e akakite i toku ra kakā ki rotopu i te au etene.

20 E na ratou e apai mai i to kotou au taeake katoa, mei te au enua katoa, ei atinga kai na Iehova: na runga i te au oroenua, e te au kariota, e te au nooanga ra, e te au mule, e te au kamela viviki ra, ki toku maunga tapu ra, ki Ierusalema, te tuatua mairā Iehova, mei te au tamariki a Iseraela i apai mai i te atinga kai ki roto i te āriki viivii kore i te are o Iehova.

21 Ko to roto katoa ia ratou taku ïa e rave, ei kau taunga, e ei au ngati Levi, te tuatua mairā Iehova.

22 Mei te rangi ou nei oki, e te enua ou, taku e anga, e vai ua mai ki mua iaku nei, te tuatua mairā Iehova, ka pera rai to kotou uanga, e to kotou ingoa, i te vai ua anga.

23 E mei tetai marama ou oki e tae ua atu ki tetai marama ou, e mei tetai sabati e tae ua atu ki tetai sabati, ko te aere anga mai ïa o te tangata katoatoa, ka akamori ei ki mua i toku aroaro, te tuatua mairā Iehova.

24 E aere oki ratou ki vao ka akaraʼi i te au ivi o te tangata i meameaau mai iaku: kare oki to ratou tunga e mate, e to ratou ai kare e tamateia; e riro oki ratou ei rikarika anga na te tangata katoa.