Ezekiela

20 E TAE akera ki te itu o te mataiti, i te rima o te marama, e te ngauru o te rā i taua marama ra, kua aere maira tetai pae o te aronga pakari i Iseraela nei e ui ia Iehova, e kua noo maira i mua iaku.

2 E kua tae maira te tuatua a Iehova kiaku nei, na ko maira,

3 E te tamaiti a te tangata na, e karanga atu ki te aronga pakari i Iseraela nei, e na ko atu kia ratou, Te na ko maira te Atu ra ko Iehova, I aere mai ainei kotou e ui iaku nei? Te tuatua maira te Atu ra ko Iehova, Te ora nei au ra, kare au e uiia mai e kotou.

4 Ka ako ainei koe ia ratou? ka ako ainei koe, e te tamaiti a te tangata na? e akakite atu kia ratou i te au mea viivii a to ratou au metua:

5 Ka karanga atu ei kia ratou, Te na ko maira te Atu ra ko Iehova; I te rā i iki ei au ia Iseraela, ka taputou ei au i te uanga i te ngutuare o Iakoba, ka akakite atu ei au iaku uaorai kia ratou i te enua ra i Aiphiti, iaku oki i taputou atu ia ratou ra, ka na ko ei ra e, Ko au ko Iehova, to kotou Atua ra;

6 I te reira rā ka taputou atu ei au ia ratou e arataki mai ia ratou mei te enua ra mei Aiphiti, ki te enua i kimiia e au no ratou ra, i tei taʼe a vai ua te u e te meli, ko te kakā ïa o te au enua ravarai:

7 I reira au i te karanga anga atu kia ratou e, E akaruke kotou ko te tangata katoa ra i te au mea viivii o tona uaorai mata, auraka e akaviivii ia kotou ki te au idolo no Aiphiti ra: ko au ko Iehova, to kotou Atua ra.

8 Kua meameaau maira ratou iaku, e kare i tika kia akarongo mai iaku, kare oki te tangata katoa ra i akaruke i te au mea viivii o to ratou mata, e kare i akaruke i te au idolo no Aiphiti ra: kua tuatua akera au, E riringi atu au i toku riri otooto ki runga ia ratou, kia tupu ta toku riri ia ratou i rotopu i te enua ra i Aiphiti.

9 No toku uaorai ra ingoa taku i’rave, kia kore e viivii i mua i te mata o te au etene, i nooia e ratou ra, i taku i akakite atu ia ratou iaku uaorai ki mua i to ratou mata, i te arataki anga mai ia ratou mei te enua maira mei Aiphiti.

10 E kua arataki mai au ia ratou mei te enua ra mei Aiphiti, e kua arataki ia ratou ki te medebara ra.

11 E kua oronga atu au i taku au akonoanga kia ratou, e kua akakite atu au i taku nei au tuatua-tau kia ratou, i tei akonoia e te tangata ra, e ora ïa aia i te reira.

12 E kua oronga katoa oki au i taku au sabati, ei akairo i rotopu ia ratou e iaku oki, kia kite ratou e, naku, na Iehova, i akatapu ia ratou.

13 Kua meameaau maira te ngutuare o Iseraela iaku i te medebara, kare ratou i aaere na taku nei au akonoanga, e kua akavaavaa ratou i taku ra au tuatua-tau, i tei akonoia e te tangata ra, e ora ïa aia i te reira; e taku au sabati, kua akaviivii ravaia ïa e ratou. Kua tuatua iora au, e riringi atu au i toku riri otooto ki runga ia ratou i roto i te medebara, kia pou atu ratou.

14 No toku uaorai ra ingoa taku i rave, kia kore e viivii i mua i te aroaro o te au etene, i tei aratakiia mai ratou e au ki vao, i mua i to ratou mata.

15 Kua taputou katoa atura oki au ia ratou i roto i te medebara e, kare au e aratakii mai ia ratou ki te enua taku i oronga atu no ratou, i tei taʼe a vai ua te u e te meli, ko te kakā ïa o te au enua ravarai;

16 No te mea, kua akavaavaa ratou i taku ra au tuatua-tau, e kare i aaere i taku nei au akonoanga, kua akaviivii ra ratou i taku au sabati: kua aru aere oki to ratou ngakau i to ratou au idolo.

17 Kua akaperepere ra toku mata ia ratou, kare i akapou ia ratou, kare oki au i akaope takiri ia ratou i roto i te medebara.

18 Kua tuatua ra au ki ta ratou au tamariki i roto i te medebara, Auraka kotou e aru aere i te au akonoanga a to kotou au metua, auraka oki e akono i ta ratou au tuatua-tau, e auraka e akaviivii ia kotou i to ratou au idolo:

19 Ko au ko Iehova, ko to kotou Atua: e aaere kotou na taku ra au akonoanga, e akono i taku ra au tuatua-tau, ka rave ei i te reira;

20 E akatapu oki i taku au sabati; e riro ratou ei akairo i rotopu ia kotou e iaku, kia kite oki kotou e, ko au ko Iehova, ko to kotou Atua ra.

21 Kua meameaau ra te au tamariki ra iaku: kare ratou i aaere na taku ra au akonoanga, kare oki i akono i taku ra au tuatua-tau, ka rave ei, i tei akonoia e te tangata nei, e ora ïa aia i te reira; kua viivii taku au sabati ia ratou: kua tuatua iora au, e riringi atu au i toku riri otooto ki runga ia ratou, kia tupu ta toku riri ia ratou i roto i te medebara.

22 Kua tāpu ra au i taku rima, e no toku uaorai ingoa, i rave ei au, kia kore e viivii i mua i te aroaro o te au etene, i tei aratakiia mai ratou e au ki vao, i mua i to ratou mata.

23 Kua taputou oki au ia ratou i roto i te medebara e, e akapueurikiriki au ia ratou ki roto i te au etene, e e akangaoro au ia ratou i roto i te pa enua ra;

24 No te mea kare ratou i rave i taku ra au tuatua-tau, kua akavaavaa ra ratou i taku ra au akonoanga, e kua akaviivii i taku ra au sabati, e kua riro to ratou mata ki te au idolo o to ratou au metua ra.

25 No reira au i tuku ua atu ei ia ratou kia rave i te au akonoanga meitaki kore, e te au tuatua-tau, kare oki ratou e ora i te reira ra;

26 E kia akaviivii ia ratou uaorai i ta ratou au atinga, ko ratou i tuku i ta ratou au tama mua ravarai i na roto ua i te ai, kia tanea ratou iaku, kia kite oki ratou e ko Iehova au.

27 E teianei, e karanga atu ki te ngutuare o Iseraela, e te tamaiti a te tangata na, e karanga atu kia ratou, Te na ko maira te Atu ra ko Iehova; Teia rai oki tetai mea i akakino mai ei to kotou au metua iaku ra, ko ratou i rave i te ara iaku nei.

28 Kia tae mai oki ratou ki te enua, taku i taputou ia ratou e oronga no ratou ra, kua akara ratou i te au tuaivi teitei katoa, e te au rakau marumaru katoa, kua apai ratou i ta ratou au atinga ki reira, e ei reira ta ratou au atinga akakoko i te apai angaia, e ei reira ta ratou rakau kakara i te tuku angaia, e ei reira ta ratou atinga inu i te riringi angaia.

29 E kua karanga atura au kia ratou, Eaa tenana ngai teitei ta kotou e aere na? e kua tapaia tona ingoa ko te ngai teitei, e tae rava akenei ki teianei rā.

30 E tenana, e karanga atu ki te ngutuare o Iseraela, Te na ko maira te Atu ra ko Iehova; Kua viivii ainei kotou mei to kotou ai metua katoa ra? e kua akaturi aere ainei kotou mei ta ratou au peu viivii ra?

31 Ko kotou ra i apai i ta kotou au atinga ra, ko kotou oki i tuku i ta kotou au tamariki kia na roto i te ai ra, kua akviivii kotou ia kotou uaorai i to kotou au idolo ravarai, e tae rava akenei ki teianei rā: e e uiia mai ainei au e kotou, e te ngutuare o Iseraela? Te tuatua maira te Atu ra ko Iehova, Te ora nei au ra, kare au e uiia e kotou.

32 E tei tupu i roto i to kotou ngakau na, kare ïa e riro i reira, ta kotou i tuatua na e, E riro matou mei te au etene, mei te au kopu-tangata o te pa enua ra, i te akamori anga i te rakau, e te toka.

33 Te tuatua maira te Atu ra ko Iehova, Te ora nei au ra, ei Ariki au ki runga ia kotou ma te rima ririnui, e ma te rima akatikaia, e ma te riri otooto i te riringa anga atu:

34 E arataki mai au ia kotou mei roto mai i te au tangata ra, e e akaputuputu mai au ia kotou mei te au enua i pueurikiriki ei kotou ra, ma te rima ririnui, e ma te rima akatikaia, e ma te riri otooto i te riringi anga atu.

35 E arataki au ia kotou ki roto i te medebara o te au tangata ra, e ei reira au e māro atu ei ia kotou, to kotou mata e toku.

36 Mei iaku i māro atu ki to kotou ai metua i roto i te medebara i te enua ra i Aiphiti, e pera au i te māro anga ia kotou, te tuatua maira te Atu ra ko Iehova.

37 E tuku au ia kotou kia na raro i te rakau ra, e e arataki mai au ia kotou ki roto i te tapeka o te koreromotu.

38 E akataka ke au i te aronga meameaau i roto ia kotou na, e tei rave i te ara iaku nei: e arataki mai au ia ratou mei te enua mai ta ratou i noo ra, kare ra ratou e tae ki te enua o Iseraela: e kite oki kotou e ko Iehova au.

39 Kareka kotou, e te ngutuare o Iseraela, te na ko maira te Atu ra ko Iehova; Ka aere kotou, e akamori te tangata katoa i tona au idolo, e a muri atu oki, kia kore kotou e akarongo mai iaku: auraka ra kotou e akaviivii akaou i toku nei ingoa tapu, i ta kotou au atinga, e to kotou au idolo.

40 Ei roto oki i taku maunga tapu, i te maunga teitei i Iseraela ra, te tuatua maira te Atu ra ko Iehova, ei reira te ngutuare ravarai o Iseraela e akamori iaku, ratou ravarai i runga i te enua nei: ei reira au e kite atu ei ia ratou, e ei reira au e rave ei i ta kotou au atinga, e te popo o ta kotou i apai, e te au mea tapu katoa na kotou ra.

41 E kitea atu kotou e au mei te mea e, e aunga kakara ra, kia arataki mai au ia kotou mei roto mai i te au tangata ra, e kia akaputuputu mai au ia kotou, mei te au enua i pueurikiriki ei kotou na; e e akatapuia au ia kotou ki mua i te au etene ra.

42 E kite oki kotou e ko Iehova au, kia arataki mai au ia kotou ki te enua o Iseraela, ki te enua taku i taputou atu e, e oronga no to kotou au metua.

43 Ei reira kotou e akamaaraʼi i to kotou au aerenga, e ta kotou au ravenga katoa, i viivii ei kotou; e ka akaviivii ia kotou uaorai ki mua i to kotou uaorai mata i to kotou au kino ravarai ta kotou i rave ra.

44 E kite oki kotou e ko Iehova au, kia rave atu au ia kotou i toku nei ingoa, auraka kia tau i to kotou au aerenga kino, auraka oki kia tau i ta kotou ravenga kino, e te ngutuare o Iseraela, te tuatua maira te Atu ra ko Iehova.

45 E kua tae mairai te tuatua a Iehova kiaku nei, na ko maira,

46 E te tamaiti a te tangata na, ka anga ana i to mata ki te pae i apatonga, ka tuku atu ei i taau tuatua ki te pae i apatonga, ka totou atu ei ki te vaorakau o te kainga ki te pae i apatonga ra;

47 Ka karanga atu ei ki te vaorakau ki te pae i apatonga ra, E akarongo mai i te tuatua a Iehova; Te na ko maira te Atu ra ko Iehova; I na, e tutungi au i te ai ki roto ia koe ra, e pou oki te au rakau mata katoa i roto ia koe ra, e te au rakau marō katoa ra: te pura ai e mura ra, kare ïa e tamateia, e ope oki te au kotinga katoa i te ka i reira, mei te pae i apatonga e tae ua atu ki te pae i apatokerau.

48 E kite oki te tangata katoa e, naku, na Iehova i tutungi i te reira: kare oki e tamateia.

49 Kua karanga atura au e, Aue, e te Atu ra e Iehova! te tuatua nei ratou iaku, Kare ainei te maseli tana e tuatua nei.