2 Ariki

17 TEI te mataiti okotai ngauru ma rua o te ariki o Iuda o Ahaza, i ariki ei a Hosea te tamaiti a Ela i Samaria i runga ia Iseraela, e iva ona mataiti i te ariki anga.

2 Kua rave oki aia i te kino i mua i te aroaro o Iehova, kare ra mei te au ariki o Iseraela i mua ake iaia ra.

3 Kua aere maira te ariki o Asura ra ko Salamanesera e tamaki iaia; riro atura oki a Hosea ei tavini nona, e kua apai i te taūnga nana.

4 Kitea iora ra ta Hosea kotikoti kupenga anga i te ariki o Asura ra; i tono ana oki aia i te karere ki te ariki o Aiphiti kia So, e kare i apai mai i te apinga mataiti na te ariki o Asura: no reira aia i popaniiaʼi e te ariki o Asura, e riiaʼi oki i roto i te are tapekaanga.

5 Kua aere iora oki taua ariki o Asura ra na rotopu i te enua katoa ra, e kua aere iora ki Samaria, e kua tamaki atura e toru akera mataiti.

6 E tae akera ki te iva o to Hosea mataiti i raukaʼi Samaria i te ariki o Asura ra, e kua apai keia akera Iseraela ki Asura, e kua akanooia ratou i Hala, e i Habora i te vai i Gozana, e te au oire o te ngati Madai.

7 I akaperaiaʼi ratou, no te mea kua ara te tamariki a Iseraela i to ratou Atua ia Iehova, ko tei arataki mai ia ratou mei te enua maira mei Aiphiti, mei raro mai i te rima o te ariki o Aiphiti ra o Pharao, e kua mataku oki ratou i te au atua ke,

8 E kua aere oki na te au ravenga a te pa enua i tuaru keia e Iehova i mua i te aroaro o te tamariki a Iseraela, e tei akatupuia e te au ariki o Iseraela ra.

9 Kua rave poiri ua iora oki te tamariki a Iseraela i te au mea tika kore i to ratou Atua ia Iehova, e kua patu iora ratou i te au ngai teitei i to ratou au oire katoa, mei te punanga o te au tiaki e tae ua atu ki te oire patuia ra.

10 E kua akatu akera i te au tiki no ratou, e te au Asetoreta, i te au tuaivi teitei katoa ra, e ki raro ake i te au rakau marumaru katoa ra.

11 I reira, ki runga i taua au ngai teitei katoa ra, ta ratou tutungi anga i te atinga kakara, mei te pa enua i apai keia e Iehova i mua ia ratou; kua rave ratou i te au mea kino ei akakoko anga atu ia Iehova kia riri.

12 Kua akamori oki ratou i te au idolo, i tei tuatuaia mai ratou e Iehova ra e, Auraka kotou e akapera.

13 Kua akakite maira oki a Iehova kia Iseraela, e kia Iuda, i te au peroveta katoa, e te au akara katoa ra, na ko maira, E ariu mai kotou i to kotou au aerenga kino, e akono i taku ra au akauenga, e taku ra au akonoanga, tei tau ki te ture katoa taku i akaue atu ki to kotou ai metua, e taku i akau atu kia kotou i te rima o taku au tavini te au peroveta ra.

14 Kare rai ratou i akarongo mai, kua akamāroketaketa ra ratou i to ratou kaki, mei te kaki o to ratou ai metua, tei kore i akarongo i to ratou ra Atua ia Iehova.

15 Kua akaruke oki ratou i tana au akonoanga, e te koreromotu nana tana i papau ki to ratou ai metua; e te au tuatua-akakite nana, tana i akakite kia ratou ra; kua aru atura ratou i te au mea puapinga kore, e kua puapinga kore ia ratou, e kua aru i te pae enua i akapiniiaʼi ratou, ko tei ikuikuia mai ratou e Iehova e, auraka ratou e akapera.

16 Kua akaruke ra ratou i te au akauenga katoa a to ratou Atua a Iehova, e kua anga i te tiki i akatoia, i nga punua puakatoro e rua ra, e kua anga oki ratou i te au Asetoreta, e kua akamori i to te rangi katoa ra, e kua akono atura ia Baala.

17 E kua tuku ratou i ta ratou au tamariki tamaroa e te au tamariki tamaine na roto i te ai; e na ratou oki te tauraatua e te purepure, e kua oronga ratou ia ratou uaorai ei rave i te kino i mua i te aroaro o Iehova, ei akakoko iaia kia riri.

18 I tupu ei te riri maata o Iehova ia Iseraela, e kua akataka ke atu ia ratou kia ngaro atu; kare i toe, mari ra ko te kopu o Iuda anake ra.

19 Kare oki Iuda i akono i te au akauenga a to ratou Atua a Iehova, aere atura ra na te au akonoanga ta Iseraela i akatupu ra.

20 Akaruke takiriia iora te uanga o Iseraela e Iehova, e kua tairo atura ia ratou, e kua oronga ia ratou ki te rima o te aronga i rave kino mai, e peke ke atura ratou i mua i tona aroaro.

21 Kua aae maira oki aia i te ngati Iseraela i te ngutuare o Davida; e kua akaariki ratou ia Ieroboama te tamaiti a Nebata ra, e na Ieroboama i tuaru ia Iseraela kia kore e aru ia Iehova, e kua ara maata rava ratou iaia.

22 Kua aere oki te tamariki a Iseraela na te au ara katoa a Ieroboama tana i rave ra; kare ïa ratou i akaruke i te reira.

23 E roa poto akera, akataka ke aturā Iehova ia Iseraela kia ngaro atu, tana i tuatua mai i tona au tavini peroveta katoa ra. Riro atura Iseraela mei roto atu i tona uaorai enua e tae atura ki Asura, e tae rava akenei ki teianei rā.

24 E kua apai maira te ariki no Asura i te tangata no Babulonia, e no Kuta, e no Ava, e no Hamata, e no Sepharavaima, e kua akanoo i te au oire i Samaria ra, ei tupau i te tamariki a Iseraela: riro atura Samaria kia ratou, e kua noo i to reira au oire.

25 To ratou ra noo anga i reira i muatangana ra, kare ratou i mataku ia Iehova; i tuku mai ei a Iehova i te au liona i rotopu ia ratou, e manganui tei mate rava.

26 E kua karanga atura ratou ki te ariki o Asura, na ko atura, Ko te pa enua i apaiia e koe e kua akanooia i te au oire i Samaria ra, kare ïa kite i te peu a te Atua no taua enua ra; i tuku mai ei aia i te au liona i rotopu ia ratou, e i na, kua pou ratou i te au liona, no te mea kare ratou i kite i te peu a te Atua o taua enua ra.

27 Kua akaue maira te ariki o Asura ra, na ko maira, E kave ana i tetai taunga i aratakiia mai e kotou na mei reira mai; e nana e noo i reira, e nana ratou e apii i te ravenga a te Atua no taua enua ra.

28 Kua aere maira tetai taunga i reira ta ratou i arataki mai mei Samaria maira, e kua noo i Betela, e kua apii aia ia ratou i te mataku ia Iehova.

29 Kua rapa ra te pa enua katoa i te au atua no ratou uaorai, e kua tuku ki roto i taua au ngai teitei ta to Samaria i anga ra, kua pera to te pa enua katoa i ta ratou au oire i nooia e ratou ra.

30 Kua rapa akera to Babulonia ia Sukota-benota, kua rapa akera to Kuta ia Neregala, kua rapa akera to Hamata ia Asima.

31 Kua rapa akera to Ava ia Nibahaza e ia Tarataka; kua tutungi oki to Sepharavaima i ta ratou au tamariki i te ai na Adarameleka raua ko Anameleka, nga atua no Sepharavaima.

32 Kua mataku rai ratou ia Iehova, kua akataoonga ra ratou i to roto i te tangata rikiriki i o ratou, ei taunga no te au ngai teitei ra, ko tei apai i te atinga na ratou ki roto i te au are no taua au ngai teitei ra.

33 Kua mataku ratou ia Iehova, kua akamori ra i to ratou uaorai au atua; mei te peu o te pa enua no reira mai ratou.

34 Te akono ua ra ratou i te au peu taito, e tae rava mai ki teia rā, kare oki a Iehova ta ratou e mataku, kare oki e rave i tei tau ki te au peu, e te au akonoanga, e te ture, e te akauenga, ta Iehova i akaue mai ki te tamariki a Iakoba, tei tapaia e ia ia Iseraela ra;

35 Tei papauia e Iehova te koreromotu kia ratou, e tei ikuikuia e ia, ka nakoia mai e, Auraka kotou e mataku i te au atua ke, auraka kotou e tupou ki raro kia ratou, auraka e akamori ia ratou, auraka e apai i te atinga kia ratou:

36 Ko Iehova ra, ko tei arataki mai ia kotou mei te enua maira mei Aiphiti, ma te mana maata, e ma te rima akatikaia ra, koia ta kotou e mataku, koia ta kotou e akamori, e apai oki kotou i te atinga nana.

37 E te au peu ra, e te au akonoanga, e te ture, e te au akauenga, i tataia e ia no kotou, ko ta kotou ïa e akono, auraka e tivata; auraka ra kotou e mataku i te au atua ke.

38 Te koreromotu ra i papauia e au ia kotou ra, auraka kotou e tangaro i te reira; auraka oki e mataku i te au atua ke.

39 Ko to kotou ra Atua ko Iehova, ko ta kotou ïa e mataku, e nana kotou e akaora i te rima o to kotou au enemi katoa ra.

40 Kare akerai ratou i akarongo, rave atura ratou i ta ratou au peu taito ra.

41 Kua mataku to teianei pa enua ia Iehova, e kua akamori oki i to ratou uaorai au idolo akatikitikiia ra, mei ta to ratou ai metua ra, kua pera katoa ta ratou au tamariki, e to ratou au mokopuna, e tae rava akenei ki teianei rā.