Koheleta

4 TE oki ra au te akamaara ra i te au takinga-kino katoa i raveia i raro ake i te rā nei: e i na, te roi-mata o te aronga i takinga-kinoia ra, kare ra o ratou e akapumaana: e te mana oki tei te pae takinga-kino ra; kare ra o ratou e akapumaana.

2 Kua akameitaki iora au i tei mate ra, tei mate takere ana, i te aronga e ora nei, ko e ora e teia noaʼi.

3 Ko tera ra tei maata i te meitaki i to raua katoa, ko tei kore i anau mai, ko tei kore i kite i te angaanga kino i raveia i raro ake i te rā nei.

4 Kua akara iora au i te au mea katoa i raveia, e te au angaanga tika katoa ra; kua varea katoaia oki te reira e te tangata tupu nei. E mea puapinga kore katoa te reira e te kai i te matangi.

5 E tapeka ua te neneva i ona puke rima, e kua kai i tona uaorai kopapa.

6 E ngari ake te rima, okotai kia ki i te manga ma te au i nga rima katoa e rua kia ki ma te pekapeka e te kai i te matangi ra.

7 Kua maara akaou rai au i te mea puapinga kore i raro ake i te rā nei.

8 Te noo ua ra tetai tangata koia anake ra kare e tokorua; kare ana tamaiti, kare oki e taeake; kare rava ra e openga i tana katoa ra angaanga, kare roa oki tona mata e iraira i te apinga: kare oki e karanga e, Naai ra teia i angaangaia e au nei, e te akangere nei i toku uaorai vaerua i te au mea meitaki? E mea puapinga kore katoa oki te reira, e te angaanga kino roa.

9 E meitaki nga tangata toko rua i te takitai; no te mea e tutaki meitaki ta raua i ta raua angaanga.

10 Kia inga oki tetai ra, na te tokorua e rave e akatu ki runga; te tangata okotai ra kia inga ra, e ae oki aia, kare oki ona e tokorua ei akatu iaia ki runga.

11 Nga tangata toko rua oki kia moe ra, e maana ïa; eaa ra oki e maanaʼi te takitai?

12 Maroiroi maata to te tangata kia rave mai i tetai ra, e tika ia raua katoa kia rave atu iaia ra; e te taura e toru enui ra, kare ïa e motu vave.

13 E ngari oki te tamaiti ao ra ma te pakari i te ariki ruaine ma te neneva ra, te kore roa e akarongo mai i te ako ra.

14 Mei roto mai aia i te are tapeka anga ra i akaarikiiaʼi, anau ao mai oki aia i tona uaorai ra basileia tikai.

15 To te enua katoa e ora nei, tei aere na raro ake i teianei rā, ko taku ïa i kite i te aru anga atu i te tokorua o te ariki ou, ko tei vaitata i te tu mai ei kauono iaia.

16 Kare e ope anga to te tangata, te aronga e aere na mua ia ratou ra; te aronga ra e aere mai na murio kare e rekareka tikai iaia. E mea puapinga kore katoa teia, e te kai i te matangi ra.