Ieremia

50 TE TUATUA i tuatuaia e Iehova ia Babulonia, te enua ra o te Kaledea, i te peroveta ra ko Ieremia.

2 E akakite kotou ki rotopu i te pa enua, e tutu aere, e akatu i te reva ki runga ra, e tutu aere, auraka e uuna: ka tuatua e, Kua rauka Babulonia, kua tumatetenga Bela, kua ngaangaa Merodaka, tona au idolo, kua tumatetenga ïa, kua ungaungātiti te au tiki nona ra.

3 Te aere mai nei tetai enua mei te pae i apatokerau e rave iaia, ka akatanea i tona enua, kare e tangata e noo i reira: ko te tangata, e tae ua atu ki te puaka katoa, ka riro, ka aere.

4 I te reira au rā, e i te reira tuatau, te tuatua mairā Iehova, e tae mai ei te tamariki a Iseraela, ko ratou e te tamariki a Iuda katoa, e aere ua ratou ma te aue kia aere ra, i te kimi anga i to ratou Atua ra ia Iehova.

5 E ui ratou i te ara ki Ziona, ma te ariu to ratou mata ki reira, e te na ko anga e, Aere mai, tatou e topiri atu kia Iehova, i tetai koreromotu mutu kore, tei kore rava e ngaro ra.

6 E mamoe ngaro toku ra iti-tangata: na to ratou au tiaki i arataki ke ia ratou, kua akaanga ke ratou ia ratou ki runga i te au maunga; kua aere ratou ki tera maunga, ki tera tuaivi, kua ngaropoina ia ratou to ratou akaeaanga.

7 Kua pou ratou e te aronga ravarai i kite ia ratou ra, e kua tuatua to ratou au enemi, Kare a tatou ara, no te mea kua ara ratou ia Iehova, i te nooanga tuatua-tika ra, ia Iehova oki, te irinakianga o to ratou au metua ra.

8 E aere ke kotou mei roto atu i Babulonia, e aere ke mei roto atu i te enua o te Kaledea, e kia riro mei te puaka-nio toa ki mua i te au anana ra.

9 I na oki, e uipa anga enua nunui no te enua i te pae i apatokerau, taku e akatu, e e arataki mai ki runga ia Babulonia: e tupati marie oki ratou kia rave iaia, e rauka oki aia ia ratou i reira: to ratou au ana ra, mei to te toa pakari ra, kare e oki puapinga kore ua mai.

10 E riro oki te Kaledea ei apinga noni: e iu te aronga katoa e noni iaia ra, te tuatua mairā Iehova.

11 No te mea kua rekareka kotou, no te mea kua akatietie, e te aronga i i ta i taku tuanga, no te mea kua poria anake kotou mei te puakatoro ua e kai ngangaere ra, e kua aue mei te oroenua toa e aue ra;

12 E aringaringa maata to kotou metua vaine, e akama tei anau ia kotou: i na, ei openga mai aia no te pa enua ra, ei medebara, ei enua papa-marō, ei enua motutaa.

13 Kare ïa e nooia i te riri o Iehova, e riro ra i te tanea rava: te aronga katoa e aere na vaitatao ia Babulonia e riro i te va ua, e te aviri, i tona katoa ra au mate.

14 Akatupati marie kotou e rave ia Babulonia e pini ua ake: e kotou ravarai tei akamingi i te ana ra, ka ana iaia, auraka e taporoporo i te kakao: no te mea kua ara aia ia Iehova ra.

15 Ka maeva i runga iaia e pini ua ake: kua oronga aia i tona rima: kua ngaoro tona au patu: kua uriia tana koro ki raro: no te mea e akaoko anga na Iehova: tutaki marie atu iaia; mei tana oki i rave maira, e pera katoa kotou kiaia.

16 E tipu i te ruru ua i Babulonia, e tei rave i te kokoti i te tuatau mou ra: no te koke akapou, e ariu ei ratou katoa ki tona uaorai au tangata, e oro oki ratou katoa ki tona uaorai enua.

17 E anana mamoe akapueu keia Iseraela, kua pueurikiriki keia e te au liona: kua pou ana oki aia i te ariki o Asura ra, e ko teia tei rave i te openga nei, kua ngangau i tona au ivi ra, koia te ariki o Babulonia ra, ko Nebukanesa.

18 E teianei, te na ko mairā Iehova Sabaota te Atua o Iseraela, I na, e tutaki i te ariki o Asura ra;

19 E akaoki maira au ia Iseraela ki tona uaorai nooanga, ei runga aia ia Karamela kai ei, e ei Basana; e ei runga i te maunga ra i Epheraima, e ei Gileada, e merengo ei tona vaerua.

20 I te reira au rā, e i te reira tuatau, te tuatua mairā Iehova, e kimiiaʼi te kino o Iseraela, e kare ra, e te ara a Iuda, e kare e kitea: e akakore oki au i ta ratou ara i tei vaooia e au ra.

21 Ka aere ki runga i te enua ra ko Merataima, e ki runga i tei noo i Pekoda: e akatanea, e akapou rava, i muri ia ratou, te tuatua mairā Iehova, ka rave i te au mea katoa taku i akaue atu ia koe ra.

22 E aruru tamaki tei te enua nei; e te pou maata rava ra.

23 Aue te amara o te ao katoa nei, i te tipu keia, e te ngaangaa rava e! aue, ko Babulonia i riro ei vavaranga no te pa enua a!

24 Kua tuku oki au i te ereere ia koe, e rauka iora koe, e Babulonia, i to vare anga ra: kua kitea koe, e kua rauka katoa koe, no te mea kua māro koe ia Iehova ra.

25 Kua maeu ia Iehova te vairanga taoonga tamaki nana ra, e kua rave mai i te taoonga no tona ra riri otooto: e angaanga oki ta te Atu, ta Iehova Sabaota ra, i te enua o te Kaledea ra.

26 E aere mai kotou iaia mei te openga roa mai, kiriti kotou i tona au are vairanga kai: e akāū iaia ki runga vaoo kia ututua ra, e kia pou takiri aia ra: auraka roa tana ei toe.

27 Ta i te au puakatoro toa ravarai nana; e tuku atu ïa ki raro kia taia: e ae oki ia ratou! Kua tae oki to ratou rā, te tuatau e tutakiiaʼi ratou.

28 Te reo o te aronga i oro, e kua ora mei te enua mai i Babulonia ra, e akakite i te riri akaoko o to tatou Atua o Iehova i Ziona, te akaoko i tona ra nao.

29 Akaputuputu mai te aronga ana i Babulonia: kotou katoa tei akamingi i te ana ra, ka patia na i te puakapa iaia e pini ua ake, auraka roa tona kia ora atu: tutaki marie atu kia tau i tana ra angaanga; e mei tana katoa i rave ra, e pera katoa iaia: no te mea e ngakau parau tona ia Iehova ra, i Tei Tapu i Iseraela nei.

30 E teianei, ka inga tona ra au tangata ou i te au arataa nona ra; e te au tangata tamaki katoa nona ra, e tipu keia ïa i taua rā ra, te tuatua maira Iehova.

31 I na, kare au e tau ia koe na, e tera ra nengonengo maata e, te tuatua maira te Atu ko Iehova Sabaota ra: kua tae oki toou ra rā, te tuatau e tutakiiaʼi koe e au ra.

32 E turori oki tei parau ra, e inga, e kare rava e akatu iaia: e tutungi au i te ai ki roto i tona ra au oire, e pou oki e pini ua ake iaia ra.

33 Te na ko mairā Iehova Sabaota ra, I taotaomi uaia te tamariki a Iseraela e te tamariki a Iuda katoa ra: ko tei rave ia ratou ei tuikaa ra, kua tāpu rava ïa e kare rava i tuku ia ratou.

34 E ririnui to ratou Akaora ra, ko Iehova Sabaota ra tona ingoa: nana e akatika rava mai i ta ratou tuatua, e kia noo marie ua te enua nei, e kia ruketekete to Babulonia.

35 Ei koke to rungao i te Kaledea, te tuatua mairā Iehova, ei runga katoa i tei noo i Babulonia; ei runga i tona ra ui ariki, ei runga i tona ra aronga pakari.

36 Ei koke to runga i te au tangata pikikaa, e e tu a neneva ua ratou: ei koke to runga i tona au tangata ririnui, e na ratou e mataku ua;

37 Ei koke to runga i ta ratou au oroenua ei runga katoa i ta ratou au kariota, ei runga katoa i te aronga iropu ua i roto iaia ra, e riro ïa ratou mei te vaine ra; ei koke to runga i tona au apinga ra, e pou ïa te reira i te āru;

38 E mate tana au vai, e marō ïa ratou: no te mea e enua tiki kotikotiia ra, e te akaneneva ua ra ia ratou uaorai i to ratou ua idolo.

39 E teianei e noo te au puaka taae o te ngangaere, ratou katoa ma te au puaka momoavao i reira, e te au tamaine a te ione te ka noo katoa i roto iaia: kare rava e tangata akaouia e tuatau ua atu, kare e nooia i tera uki, i tera uki.

40 Mei ta te Atua i tatipoki ia Sodoma e ia Gomora, e te au oire katoa i reira ra, te tuatua mairā Iehova, kare rava e tanga e noo i reira: e te tamaiti a te tangata, kare rava e tuitarere ua atu i reira.

41 I na, e iti-tangata te ka tae mai no apatokerau mai, e enua maata, e te au ariki no te enua mamao i te arangaranga katoa anga mai e manganui:

42 Ka mou piriakita ratou i te ana, e te korare: e taae ratou, kare e aroa mai: e aruru to ratou reo mei te tai ra, ei runga i te oroenua ratou akaoro ei, ma te tupati marie mei te tangata tamaki ra, ei rave ia koe ra, e te tamaine a Babulonia ra.

43 Kua akarongo te ariki o Babulonia i te rongo ia ratou, paruparu iora ona rima: kua rokoia aia e te tumatetenga, e te mamae, mei to te vaine anau ra.

44 I na, mei te liona i te pukenga o Ioridana, kia aere mai aia ki te nooanga ketaketa ra: e kamo oki toku mata, e ka oro oki ratou na runga iaia. Koai oki te tangata ikiia, ra kia akono atu au ei rave iaia? koai oki tei tau iaku nei? e koai te tika kia aravei mai iaku? koai oki taua tiaki ra te ka mou ki mua iaku nei?

45 E teianei e akarongo mai kotou i te tautau a Iehova, i akakoria e ia ia Babulonia; e tana akakoroanga i akakoroia e ia i te enua o te Kaledea ra: na tei iti rava i roto i taua anana ra e kika ia ratou: e akatanea oki aia i to ratou au nooanga ma ratou katoa ra.

46 I te reo ra, Kua rauka Babulonia, kua ngaueue te enua, e kua akarongoia te aue i te pa enua ra.