Daniela

3 ANGA iora te ariki ra ko Nebukanesa i tetai tiki auro, e ono ngauru te kubiti i te teitei, e ono oki kubiti i te pararauare: kua akatu akera aia i te reira ki te ngai mataataa ra i Dura, i te matakeinanga ra i Babulonia.

2 Kua tono akera te ariki ra ko Nebukanesa e akaputuputu mai i te au ariki, te au tutara, e te au rangatira, te au tutara, te au akava, te aronga mou apinga, te au tumu korero, te aronga akaaere, e te aronga tutara katoa i te au matakeinanga ra, e aere mai ki te akatapu anga i te tiki i akatuia e te ariki ra e Nebukanesa.

3 Kua akaputuputu maira i reira te au ariki, te au tutara, e te au rangatira, te au akava, te aronga mou apinga, te au tumu korero, te aronga akaaere, e te aronga tutara katoa i te au matakeinanga ra, i te akatapu anga i te tiki i akatuia e te ariki ra e Nebukanesa; e kua tu iora ratou ki mua i taua tiki i akatuia e Nebukanesa ra.

4 Kua kapiki nui maira i reira te orooro, Te akaueia atu ana kotou, e te au tangata na e, e te au enua na e, e te au reo ke ke ra,

5 Kia rongo ua akera kotou i te tangi, o te pu, te vivo, te kinura, te sabaka, te nabala, te sumephonia, e te au mea katoa i akatangiia ra, e tipapa kotou ki raro i reira ka akamori ei i te tiki auro i akatuia e te ariki ra e Nebukanesa:

6 E ko te kore e tipapa ki raro ka akamori ei, ei taua ora ra aia e titiriiaʼi ki roto i te umu ai kakā ra.

7 E tae akera ki te tuatau i kite ei te au tangata katoa i te tangi o te pu, te vivo, te kinura, te sabaka, te nabala, e te au mea katoa i akatangiia ra, kua tipapa iora te au tangata katoa ki raro, te au enua, e te au reo ke ke katoa, e kua akamori atura i te tiki auro ta te ariki ra ta Nebukanesa i akatu ra.

8 Kua akavaitata maira tetai pae Kaledea i reira, kua tapepe maira i te ngati Iuda.

9 Kua tuatua maira ratou, na ko maira ki te ariki ra kia Nebukanesa, E te ariki e, kia ora koe e tuatau ua atu.

10 Kua akatu koe i tetai ture, e te ariki; e te tangata ravarai i kite i te tangi o te pu, te vivo, te kinura, te sabaka, te nabala, e te sumephonia, e te au mea katoa i akatangiia ra, kia tipapa ïa ki raro ka akamori ei i te tiki auro ra:

11 E ko te kore e tipapa ki raro ka akamori ei, ka titiriia ïa ki roto i te umu ai kakā ra.

12 Teia oki e tokotai puke ngati Iuda i tukuia e koe ei akaaere i te matakeinanga ra o Babulonia, ko Sadaraka, ko Meseka, e ko Abede-nego, kare aua nga tangata nei i akono ia koe, e te ariki, kare ratou i araara i toou ra au atua, kare oki i akamori i te tiki auro taau i akatu ra.

13 Kua akaue aturā Nebukanesa, ma te makitakita e te riri otooto ra, kia taki mai ia Sadaraka, Meseka, e Abede-nego. Kua taki maira ratou i reira i aua nga tangata ra ki mua i te aroaro o te ariki.

14 Kua tuatua mairā Nebukanesa, na ko maira kia ratou. Koia ïa ainei, e Sadaraka, e Meseka, e Abede-nego, e kare kotou i araara i toku nei au atua, kare oki i akamori i te tiki auro taku i akatu ra?

15 E tenana, kia rongo kotou i te tangi o te pu, te vivo, te kinura, te sabaka, te nabala, e te sumephonia, e te au mea katoa i akatangiia ra, kia vave ra kotou i te tipapa ki raro, e akamori ei i te tiki i angaia e au nei, kua tika ia: kia kore ra kotou e akamori ra, ei taua ora ra kotou ka titiriiaʼi ki roto i te umu ai kakā ra, e koai taua Atua ra te ka akaora ia kotou i toku nei rima?

16 Kua karanga aturā Sadaraka, Meseka, e Abede-nego, na ko atura, ki taua ariki ra, Kare ua matou i taitaia i te karanga anga atu kia koe i tenana tuatua, e Nebukanesa e!

17 I na, e tika i to matou Atua, ta matou e akamori nei, i te akaora ia matou i te umu ai kakā ra: e nana rai matou e akaora i to rima, e te ariki.

18 Kore oti ra, kare rai matou e araara i toou ra au atua, kia kite mai koe, e te ariki, kare oki e akamori i te tiki auro i akatuia e koe ra.

19 Ki roa akerā Nebukanesa i te riri maata i reira, e tu ke atura tona mata, ia Sadaraka, Meseka, e Abede-nego: kua karanga atura aia, akaue atura, kia taʼu ratou i te umu ra e kia taki itu te taʼu anga i te au taʼu anga katoa ra.

20 E kua akaue atura aia i tei ririnui i te au tangata i tona nuku ra e ri ia Sadaraka, Meseka, e Abede-nego, ka titiri ei ki roto i te umu ai kakā ra.

21 Riia iora aua nga tangata ra, ma to ratou kakau pu, to ratou au pare, e to ratou au pona, e to ratou au kakau katoa ra, e kua titiriia iora ki roto i te umu ai kakā ra.

22 No te mea ra kua viviki te akaue a te ariki, e kua maata rava te kakā o te umu, mate rava akera aua nga tangata ra, ko tei rave ia Sadaraka, Meseka, e Abede-nego, i te mura ai ra.

23 Ko eianei ra puke tangata toko toru, ko Sadaraka, ko Meseka, e ko Abede-nego, topa iora ïa ki raro ma te riia ki rotopu i taua umu ai kakā ra.

24 Kua itimangamanga iora te ariki ra ko Nebukanesa i reira, e kua tu viviki ua maira ki runga, kua tuatua maira, ki te au tumu korero nona ra, Kare ainei toko toru a tatou puke tangata riia i titiri ki roto i te ai? Kua karanga atura ratou, na ko atura, ki te ariki, E te ariki, e tuatua-mou.

25 Kua tuatua maira aia, na ko maira, I na, te kite nei au i te au tangata toko a ma te ri kore, i te aaere ua anga na roto i te ai, kare ua ratou i kino; e te tu o te toko a, mei te mea e Tamaiti ïa a te Atua ra.

26 Kua akavaitata aturā Nebukanesa ki te vaa o taua umu ai kakā ra, kua karanga atura, na ko atura, E Sadaraka, e Meseka, e Abede-nego, nga tavini o te Atua teitei rava, ka aere mai ki vao, ka aere mai i ku nei. Kua aere mairā Sadaraka, Meseka, e Abede-nego ki vao mei rotopu mai i te ai ra.

27 E putuputu maira te au ariki, te au tutara, e te au rangatira, e te au tumu korero o te ariki ra, kua akara iora i aua nga tangata ra, e kare o te ai e mana ki runga i o ratou kopapa, kare rava oki tetai io rauru o to ratou mimiti i ka, kare oki to ratou au kakau i tu ke, kare oki te aunga ai i piri mai ki runga ia ratou.

28 Kua tuatua iorā Nebukanesa, na ko akera, Kia akameitakiia te Atua no Sadaraka, no Meseka, e no Abede-nego, ko tei tono mai i taua angela, e kua akaora i ona puke tavini i irinaki iaia ra, e kua akatu ke akenei i ta te ariki ra tuatua, e kua oronga ua mai i to ratou kopapa kia kore ratou e araara, kia kore oki e akamori i tetai atua ke, mari ra ko to ratou uaorai Atua.

29 E teianei, te akatu nei au i tetai ture, E te au tangata, te enua, e te au reo ke ke ra, kia tuatua akakino mai i te Atua no Sadaraka, no Meseka, e no Abede-nego, e tipupuia ïa, e akariroia ïa to ratou au are ei tiringa teita: no te mea kare atu atua e tikaʼi kia akaora mei teianei te tu.

30 Kua akateitei iora te ariki ia Sadaraka, Meseka, e Abede-nego, i taua matakeinanga ra i Babulonia.