Deuteronomi

17 AURAKA koe e apai i te puakatoro kino e te mamoe, e te au kino katoa nei, ei atinga na to Atua na Iehova; e mea viivii oki te reira na to Atua ra na Iehova.

2 Kia kitea uaia atu tetai tangata i o ou ra, i roto i te au oire katoa ta to Atua ra ta Iehova e oronga noou ra, i te tane e te vaine, i rave ra i te mea kino ki mua i te aroaro o to Atua ra o Iehova, i te akaatikau anga i te koreromotu nana ra,

3 E kua aere e kua araara i te au atua ke, e kua akamori atu ia ratou mei te rā e te marama, e to te rangi katoa ra, tei kore i akaueia e au ra;

4 E kua akakiteia mai taua tuatua ra kia koe, e kua akarongo atura, koe, e kua ui meitaki, e i na, e tuatua mou, e kua taka tikai, e kua raveia te reira ra mea viivii i roto ia Iseraela ra:

5 E arataki mai koe i taua tane ra e taua vaine ra, i rave i taua mea kino ra, ki to ngutupa oire ra; ka peî ei i taua tane ra, e taua vaine ra, ki te toka, e kia mate takiri.

6 Tei te tuatua a nga kite toko rua, e nga kite toko toru, ka mate ei taua tangata i tika kia taia ra; kareka i te tuatua a te kite okotai ra, kare ïa aia e tamateia.

7 To nga kite ra te rima e rave ana iaia kia ta, e i muri ake ko nga rima ïa o te tangata katoa. Pou atura ia koe i reira te kino i roto ia kotou.

8 Kia tupu ua atu tetai tuatua kare e tika ia koe e akaaiteite ra, mei tetai mate e tetai mate, tetai tuatua e tetai tuatua, e tetai pāpā e tetai pāpā, e mea tauetonoia i roto i to au oire ra; e tu koe i reira e aere ki te ngai i akonoia e to Atua ra e Iehova;

9 E aere tika koe ka ui ki te kau taunga ra ki te au ngati Levi ra, e te tangata akava i te reira tuatau ra; e na ratou e akakite mai ia koe i te utunga tau tikai:

10 E naau e rave i taua mea ra ta ratou e akakite kia koe i taua ngai i akonoia e Iehova ra; e akamako oki koe, e e rave marie i ta ratou e akakite mai kia koe ra:

11 Ko te tuatua a te ture ta ratou e akakite mai kia koe ra, e te utunga ta ratou e tuatua mai kia koe ra, ko taau ïa e rave; auraka koe e tatipake i taua tuatua ta ratou e akakite mai kia koe ra, ki te pae katau e te pae kaui.

12 E te tangata e māro mairai, kare e akarongo ki te taunga e tu ua i reira ra, i te rave anga i te taoonga ki mua i te aroaro o to Atua ra o Iehova, e kare e akarongo i te akava, ka mate te reira tangata; pou atura ia koe i reira te kino i roto ia Iseraela.

13 Ka riro oki te tangata ravarai i te akarongo, e te mataku, e kare atura e māro akaou.

14 Kia tae koe ki te enua ta to Atua ta Iehova e oronga mai noou ra, e kia rauka ia koe ra, e kia noo koe i reira, e kia tuatua koe e, E akaariki au i tetai ariki ki rungao iaku, mei te pa enua ravarai e akapini iaku nei;

15 Ko ta to Atua ra ta Iehova e iki ra, ko taau ïa e akariro ei ariki ki rungao ia koe: ei tangata no roto i to ai taeake ra taau e akariro ei ariki ki rungao ia koe; kare e tika kia akariro i te tangata ke kare no roto i to ai taeake, ei ariki ki rungao ia koe ra.

16 Auraka ra aia e akamaata i te oroenua nana, ko te oki akaou aea te tangata ki Aiphiti iaia, kia maata rava te oroenua ra: kua tuatua oki a Iehova kia kotou e, Auraka rava kotou e oki akaou na te reira arataa.

17 Auraka oki aia e akamaata i te vaine nana, kia kore e tatipake tona ngakau: auraka katoa aia e akamaata rava i te ario e te auro nana.

18 E kia noo aia ki runga i te terono o tona ra basileia, ei reira aia e tataʼi i teianei ture nana uaorai ki roto i tetai buka, no roto i te buka ture, e vaoo i te kau taunga ra i te ngati Levi ra:

19 E ei iaia uaorai taua ture ra vaoo ei, e ka tatau oki aia e ope ua atu tona au rā i te ora anga nei; kia apii aia e kia mataku i tona Atua ra ia Iehova, e kia akono i te au tuatua ravarai o teianei ture, e teianei au akonoanga, kia raveia:

20 Kia kore e teitei tona ngakau i tona ai taeake ra; kia kore aia e anga ke i te akauenga ki te pae katau e te pae kaui; kia roa oki tona au rā i tona basileia ra, koia, e tana au tamariki, i rotopu ia Iseraela ra.