Angaanga

23 KUA tiroi matariki aturā Paulo i te Sunederi, na ko atura, E tāma e te aronga taeake nei, i noo ua ana oki au ma te akavangakau meitaki i mua i te aroaro o te Atua, e tae rava akenei i teianei rā.

2 Kua tuatua maira te taunga maata ra ko Anania ki te aronga i tu i vaitata kiaia, e moto atu i te vaa.

3 Kua karanga aturā Paulo kiaia, Kua vaitata te Atua i te moto mai ia koe, e tenana patu akateateaia: noo mai ana oki koe e akava mai iaku i te ture, e akaue oki koe kia motokia au i te mea e kore e tau i te ture ra?

4 Kua tuatua maira te aronga i tu ua i vaitata ra, E akakino aina koe i te taunga maata a te Atua?

5 Kua karanga aturā Paulo, Kare akera au i kite e taku au taeake, e koia te taunga maata: kua tataia oki e, “Auraka koe e tuatua kino i te tutara i runga i to iti-tangata nā.”

6 Kia akara akera rā Paulo e, e Sadukea tetai pae, e Pharisea oki tetai pae, kua kapiki atura aia ki roto i taua Sunederi ra, E tāma, e te au taeake, e Pharisea au, e tamaiti oki na te Pharisea: no te tapapa i te tuakaouanga o tei mate ra i akavaia mai ei au nei.

7 Tei te tuatua anga atu aia i taua tuatua ra, tupu atura te taumāro i te Pharisea ma te Sadukea: mavete atura taua aronga maata ra.

8 I karanga oki te Sadukea e, kare ua e tuakaouanga, kare oki e angela, kare oki e vaerua: kareka te Pharisea, e tuatua-mou katoa ïa ia ratou.

9 E maata rava ua atura te vaa; kua tu akera te au tata tuatua no te papaki o te Pharisea, kua māro ketaketa atura, na ko atura, Kare rava akera i kitea ia matou te kino o teianei tangata: e vaerua tei tuatua mai kiaia ra, e te angela, auraka tatou e māro atu i te Atua.

10 E maata rava ua atura te karo, mataku iora te rangatira maata, ko te aeae uaia aeā Paulo e ratou; kua akaue atura i te aronga vaeau e aere ki raro e opu mai iaia i rotopu ia ratou ra, e taki mai ki roto i te punanga.

11 E po akera, kua tu maira te Atu i vaitata iaia, kua tuatua maira, E akamaroiroi, e Paulo: mei taau i akakite i te tuatua noku i Ierusalema nei, e akakite katoa oki koe i Roma e tikaʼi.

12 E ao akera, kua kapiti marie akera etai pae ngati Iuda, kua akatau iora i te tuatua taumaa ia ratou uaorai, i te na ko anga e, kare ratou e kaikai, e kare oki e inu, kia mate rā Paulo ia ratou.

13 E a ngauru anga ma ara taua aronga i kapiti ra.

14 Aere atura ratou ki te kau taunga nunui, e te aronga pakari ra, kua karanga atura, Kua akatau matou i te tuatua taumaa ia matou uaorai e, kare matou e kaikai e kia mate ua atu a Paulo ia matou.

15 E teianei, ka akakite atu kotou e te Sunederi katoa i te rangatira maata, e arataki mai aia iaia ki raro ki o kotou nei apopo, mei te mea e, te inangaro ra kotou i te ui meitaki atu rai i te au mea katoa nona ra: e kare aia i vaitata mai ia kotou nei, kua mate ïa ia matou.

16 Kite akera ra te tamaiti a te tuaine no Paulo i taua moetapapa ra, aere atura, tomo atura ki roto i te punanga, akakite atura kia Paulo.

17 Kua karanga aturā Paulo ki tetai o te au rangatira anere ra, na ko atura, Ka arataki atu koe i teianei tamaiti ki te rangatira maata ra: e manga tuatua oki tana e akakite atu kiaia.

18 Kua rave akera aia iaia, arataki atura ki te rangatira maata, kua karanga atura, I tuatua mai a Paulo tapekaia nei kiaku, e kua pati maira iaku kia arataki mai au i teianei tamaiti kia koe nei, e manga tuatua oki tana e akakite atu kia koe.

19 Kua rave akera te rangatira maata i tona rima, arataki atura iaia ki te ngai poiri, kua ui atura, Eaa taau tuatua e akakite mai kiaku?

20 Kua tuatua maira aia, I akakoro ana te ngati Iuda i ta ratou tuatua e pati atu ia koe ia Paulo, kia taki atu koe iaia ki raro apopo, ki roto i te Sunederi, mei te mea e, i inangaro ratou i te ui meitaki atu i te au tuatua katoa nona.

21 Auraka ra koe e akatika atu i ta ratou; te moetapapa maira to ratou iaia, e a katoa ngauru anga ma ara i te tangata, kua akakoro oki ratou i te tuatua taumaa ia ratou uaorai e, kare ratou e kaikai, e kare oki e inu, e kia mate rava atu aia ia ratou; e kua araara mamao oki ratou i teianei, te tapapa maira ia koe i te akatika anga atu.

22 Kua tuku maira te rangatira maata i taua tamaiti ra, ako maira iaia, Auraka rava koe e akakite ki te tangata e, kua aaki mai koe kiaku i teianei au tuatua.

23 Kua kapiki atura aia i e toko rua puke rangatira anere, kua karanga atura, Ka akonokono i te vaeau kia rua ake anere e aere ki Kaisarea, e te au tangata oroenua ra, kia itu ngauru anga, e te aronga ko tao ra, kia rua ïa anere, ei te toru o te ora i teianei po;

24 E tiki oki etai puaka ei nooanga no Paulo, e arataki meitaki atu ei iaia ki te tutara ra kia Feliki ra.

25 Kua tata atura aia i te leta na ko atura:

26 Kalaudio Lusia ki te tutara teitei ra ia Feliki, kia ora na:

27 I opukia tenana tangata e te ngati Iuda, e me mate aia ia ratou; e rokoia iora ratou e au ma te pupu vaeau katoa, opu atura au iaia, kite akera au e, no Roma aia.

28 E inangaro akera au kia kite au i te ara i tapepe mai ei ratou iaia, arataki atura au iaia ki roto i te Sunederi no ratou:

29 E kite akera au e, i tapepeia aia i te tuatua māroia i roto i ta ratou uaorai ture, kare aia i tapepeia i te ara e tau ei iaia te mate, e te tapeka katoa oki.

30 E kia aakiia mai au e, te moetapapa ra te ngati Iuda i taua tangata nei, akaue akenei au i te tangata e arataki atu kia koe na, kua karanga oki au ki te aronga i tapepe mai iaia ra, e akakite atu kia koe i ta ratou tuatua iaia. Kia ora na.

31 Kua rave akera taua au vaeau ra ia Paulo, arataki atura ki Anetipateri i te po, i tei akaueia maira.

32 E ao akera, vaioia iora te aronga tangata oroenua ei arataki iaia, oki maira ratou ki te punanga.

33 E tae atura ratou ki Kaisarea, kua apai atura te leta ki te tutara e kua tuku atura ia Paulo ki mua i tona aroaro.

34 E kia tatau te tutara i taua leta ra, kua ui maira aia e, no teea enua aia: kite akera aia e, no Kilikia aia;

35 Kua na ko maira aia, Kia tae katoa mai te aronga e tapepe ia koe na, ka akarongo atu ei au ia koe. Kua karanga atura aia e tapeka iaia ki roto i te ngai akavaanga a Heroda ra.