Genese

23 KUA tae to Sara au mataiti i te ora anga nei, ki te okotai anere, e rua ngauru ma itu; ko to Sara ïa au mataiti i te ora anga nei.

2 E mate iorā Sara i Kiriataraba, (koia Heberona nei,) i te enua ra i Kanaana. Kua aere mairā Aberahama i te mii ia Sara, e aue iaia.

3 E kua tu akerā Aberahama ki runga i taua aue nona i tana vaine i mate ra, kua karanga atura ki te ngati Heta ra, na ko atura,

4 E tangata ke au nei, e te tuitarere ua i roto ia kotou na; e o mai ana i tetai ngai tanumanga tangata noku i roto ia kotou na, kia tanu ai i taku vaine i mate nei, kia ngaro atu i toku mata nei.

5 E kua tuatua maira te ngati Heta kia Aberahama, na ko maira kiaia,

6 Ka akarongo mai ana ia matou nei, e to matou rangatira e; e tangata maata roa oki koe i roto ia matou nei: ei roto i tetai menema meitaki i o matou nei, tanu atu ei koe i taau vaine i mate ra; kare rava tetai o matou nei e karapii i tona uaorai menema, kia tanu ake koe i taau vaine i mate ra ki roto.

7 Kua tu akerā Aberahama ki runga, kua tupou iora aia ki raro ki mua i te au tangata o te enua, ki te ngati Heta ra,

8 E kua karanga atura aia kia ratou, na ko atura, kia tika ia kotou kia tanu atu au i taku vaine i mate nei kia ngaro atu i toku mata nei; ka akarongo mai kotou iaku, e tuatua meitaki atu kotou ia Epherona, te tamaiti a Zohara, iaku,

9 Kia tuku mai aia i te ana nona i Makapela, i te openga mai o te kainga nona ra, noku; e o mai aia i te reira ei oko i te moni e kia oko na marie, ei ngai tanumanga tangata noku i o kotou nei.

10 Te noo rā Epherona i roto i taua ngati Heta ra; e kua tu atura mairā Epherona ngati Heta kia Aberahama, e te akarongo katoa maira te ngati Heta katoa i tomo na te ngutupa oire nona ra, na ko maira,

11 Auraka ana, e taku rangatira e, e akarongo mai ana iaku; i na taua kainga nei, e te ana katoa i roto ra, te oronga atu nei au noou; i mua i te aroaro o toku iti-tangata nei, e oronga atu au noou: ka tanu i taau vaine i mate na.

12 Kua tupou iorā Aberahama ki raro ki mua i te aroaro o te tangata i taua enua ra:

13 E kua karanga atura aia kia Epherona, kua rongo katoa te au tangata o taua enua ra na ko atura, Kia tika ia koe, teia taku tuatua, e akarongo mai ana koe; e apai atu au i te moni naau i taua kainga ra; e rave mai oki koe, e ka tanu atu au i taku vaine i mate nei i reira.

14 Kua tuatua mairā Epherona kia Aberahama, na ko maira kiaia,

15 E taku rangatira, ka akarongo mai ana iaku: te oko tikai i teianei kainga e a ïa anere sekela ario; eaa ra oki te reira ia taua nei? ka tanu i taau vaine i mate na.

16 E kua akarongo aturā Aberahama ia Epherona; kua aiteite aturā Aberahama i te ario na Epherona, tana i akakite maira, e kua kite katoa te au ngati Heta ra, e a anere sekela ario, i te moni raveia e te aronga oko ra.

17 Akamou tikaia iora taua kainga o Epherona i Makapela ra, i tei anga tika ki Mamera ra; ko te kainga e te ana i roto ra, e te au rakau katoa i roto ra, tei te pae katoa e pini ua ake,

18 Ei apinga no Aberahama, i mua i te aroaro o te ngati Heta, i roto i te aronga katoa i tomo na te ngutupa oire nona ra.

19 E i muri ake i te reira, kua tanu iorā Aberahama i tana vaine ia Sara i roto i te ana i te kainga i Makapela, tei anga tika ki Mamera ra, koia oki Heberona, i te enua ra i Kanaana.

20 Kua akamou tikaia iora oki e te ngati Heta taua kainga ra, e te ana i roto ra, ei tanumanga tangata no Aberahama.