Salamo

91 KO tei noo i raro ake i te tapoki o Tei Teitei ra, ka moe aia i raro ake i te Mana katoatoa ra.

2 Te tuatua nei au kia Iehova, Ko koe toku akapuanga, e toku pinanga; taku Atua, e taku i irinaki nei.

3 Nana tika rai koe e akaora i te ereere a te kimi manu ra, i te maki-mate kino ra.

4 Ka tapoki aia ia koe i tona ra uruuru, e ka ora koe i raro ake i ona puke peau: ko tana ra tuatua-mou, ko toou ïa paruru, e te tapoki.

5 Kare koe e mataku i tei matakuia i te po ra; te kakao e rere i te ao ra;

6 Te maki-mate e aere ua i te poiri ra; te pou e pou ei i te avatea ra.

7 E tausani te ka topa i to pae, e ngauru atura ïa te tausani i to rima katau: kare ra e vaitata mai kia koe.

8 Ko to mata anake ra te ka akara, e ka kite koe i te tutaki a te aronga kino.

9 No te mea kua akariro koe ia Iehova ei akapuanga, Tei Teitei ra ei nooanga ora ra;

10 Kare rava koe e rokoia e te kino, kare oki te maki-mate ra e akavaitata mai ki toou ra puakapa.

11 Ka ikuiku oki aia i tana au angela ia koe, ei tiaki ia koe i toou au aerenga katoa ra.

12 Ka mou oki ratou ia koe i to ratou ra rima, ko te tukia ua atu aea koe i to vaevae ki te toka.

13 Ka takai ua atu koe ki runga i te liona taae, e te asepi; i te liona ou, e te ovi, taau ka takatakai.

14 No te mea te inangaro maira aia iaku, ka akaora au iaia: ka akateitei au iaia ki runga, no te mea te kite ra aia i toku ra ingoa.

15 E kapiki mai aia iaku ra, e naku e karanga atu kiaia; ei vaitatao au iaia kia rokoia e te tumatetenga; e akaora atu au iaia, e akangateitei atu au iaia.

16 Ka akamataora atu au iaia i te aʼo roa, e akakite au kiaia i te ora naku.