Isaia

31 E AE oki ïa aronga e aere ki Aiphiti kia tauturuia mai; e kua akairi ki runga i te oroenua ei turu, e kua irinaki ki te kariota, no te mea e manganui; e ki runga i te tangata akaoro oroenua, no te mea e ririnui; kare ra e akara ki Tei Tapu i Iseraela nei, e kare e kimi atu ia Iehova ra.

2 E pakari rai oki tona, e e tuku mai aia i te kino, kare aia e akaoki i tana tuatua: e riro aia i te tu mai e rave i te ngutuare tuatua kino ra, e rave oki i tei tauturu mai i te aronga rave tuatua kino ra.

3 Ko to Aiphiti ra, e tangata ïa, e kare i te Atua; e ta ratou au oroenua ra, e kiko ïa, e kare ïa i te vaerua: kia akatikā Iehova i tona rima, e turori te tauturu, e e inga tei tauturuia mai; pou katoatoa akera ratou i te mate.

4 Kua na ko mai oki a Iehova kiaku nei, Mei te liona e ngunguru ra, e te liona ou oki, ki rungao i tana ra kai, putuputu ua maira te au tiaki anana e manganui e rave iaia, kare takiri aia e mataku i to ratou reo, e kare oki e vi i ta ratou koma anga: ka pera rai to te Atua Sabaota ra to Iehova eke anga mai e tamaki no te maunga ra no Ziona, e no to reira tuaivi.

5 Mei te au manu e akakoukou i ta ratou anauanga, e pera katoā Iehova Sabaota i te tiaki anga ia Ierusalema, i te tiaki anga oki kia ora; i te rere anga atu ki mua e akaora iaia ra.

6 E oki akaou kotou kiaia tei akaruke takiriia e kotou, e te au tamariki a Iseraela e.

7 E riro kia tae ki taua rā ra, e akaruke ei te tangata katoa i tona au idolo ario, e tona au idolo auro, ta to kotou uaorai rima i anga no kotou kia ara.

8 E ka inga to Asura i te koke, kare ra i ta te tangata; i te koke oki Nana, na tei kore i te tangata nei, e pou ei aia. E oro oki aia i te mata koke ra, e e taaoia tona au tangata ou i ikiia ra.

9 E no te rai mataku ra e aere atu ei aia ki tona punanga pakari ra; e tumatetenga roa te ui rangatira nona i te reva ra, te tuatua mairā Iehova, tei Ziona tana ai, e tona umu ra tei Ierusalema.