Apokalupo

9 KUA akatangi iora te tokorima o te angela i tana, kite atura au i tetai etu no runga mai i te rangi i te topa anga mai ki runga i te enua nei: e i orongaia mai te taviri o te vaarua takere kore ra kiaia.

2 Kua kiriti akera aia i te tapoki o taua vaarua takere kore ra; kua peke akera te auai ki runga no roto i taua vaarua ra, mei te auai o tetai umu maata ra; poiri atura te rā e te rangi i te auai o taua vaarua ra.

3 Kua aere maira te tāpaki ki rungao i te enua nei no roto i taua auai ra; e e mana tei orongaia mai no ratou, mei te mana o te au pata o te enua nei.

4 E i akoia mai ratou e, auraka e rave kino atu i te ngangaere o te enua nei, e te au rakau rikiriki e tupu ra, e te au rakau mamaata katoa oki; ko te au tangata ra kare te akairo a te Atua ki runga i to ratou rae, ko ratou anake ua ra.

5 E i akoia mai ratou e, auraka ratou e rave mate rava i taua aronga ra, kia akamamaeia ra ratou e kia roma ake marama: e to ratou mamae, mei te mamae o te pata ïa, kia ta mai i te tangata.

6 E kia tae ki te reira tuatau e kimi ua atu te tangata i te mate, e kare ra e rauka; e e anoano ua atu oki kia mate, e rere ke ra te mate ia ratou.

7 E te tu o taua au tāpaki ra, mei te oroenua ïa i akamaneaia no te tamaki ra; e to runga i to ratou au mimiti ra, mei te korona auro te tu, e to ratou mata, mei te mata tangata nei ïa.

8 E rauru oki to ratou, mei te rauru vaine ïa, e to ratou nio, mei te nio liona ïa.

9 E e paruru umauma to ratou, mei te paruru umauma auri te tu, e te aruru o to ratou peau, mei te aruru kariota, e te oroenua e manganui, kia oro ki te tamaki ra.

10 E iku to ratou mei to te pata ra, e e tara tei roto i to ratou au iku: e e mana to ratou kia rave kino i te tangata e kia rima ake marama.

11 E ariki oki to ratou, ko te angela ïa o taua vaarua takere kore ra, ko Abadona tona ingoa i te reo Ebera, i te reo Eleni ra, ko Apoliona ïa.

12 Kua ope atura tetai mate; e i na, e rua rai mate toe, e te aere maira.

13 Kua akatangi maira te tokoono o te angela i tana, e akarongo atura au i tetai reo no ko mai i nga tara e a o te atarau auro i mua i te aroaro o te Atua ra,

14 I te tuatua anga i te tokoono o te angela i mou i te pu ra, Ka tatara i nga angela i tapekaia i te kauvai maata ra ia Eupharati.

15 Tataraia iora aua nga angela toko a ra, kua akateateamamaoia ratou e kia okotai ake ora, e kia okotai oki rā, kia okotai oki marama, e kia okotai mataiti, kia tamate rava i te toru o te tuanga o te tangata nei.

16 E te rai o taua aronga akaoro oroenua ra, e rua ïa manotini anga o te manotini: kua akarongo oki au i to ratou tu i te rai.

17 Ko te tu ïa o toku kite anga i te au oroenua i taua orama ra, e te aronga i noo ki rungao, e paruru umauma ai to ratou, e te auika, e te teio: e te mimiti o taua aronga oroenua, mei te mimiti o te liona ra; e kua puroro maira te ai, e te auai, e te teio, no roto i to ratou vaa.

18 Ko taua au mea e toru ra i mate ei te toru o te tuanga o te tangata nei, ko te ai, e te auai, e te teio, i puroro mai no roto i to ratou vaa.

19 Tei te vaa te maroiroi o taua aronga ra, e tei te iku: mei te ovi oki to ratou iku, e mimiti anake, ko te mea ïa e mate ei te tangata.

20 E te toenga o te tangata ra ko tei kore i mate i teianei au mate, kare ïa i tataraara i ta ratou angaanga i rave ra, e eiaa ratou e akamori i te au demoni, e te idolo auro, e te ario, e te veo, e te toka, e te rakau: ko tei kore e tika kia akara, e kia akarongo, e kia aere:

21 Kare katoa oki ratou i tataraara i ta ratou ta tangata anga, e ta ratou purepure anga, e ta ratou akaturi anga, e ta ratou keia anga.