Genese

9 KUA akameitaki maira te Atua ia Noa e tana au tamariki; kua na ko maira kia ratou, Kia anau, e kia maata kotou, e akaki i te enua nei.

2 E ka tukuia te mataku ia kotou, e te ngarangara ia kotou, ki runga i te au puaka katoa o te enua nei, e ki runga i te au manu katoa o te reva, e ki runga i te au mea katoa e totoro aere ua ki rungao i te enua, e ki runga i te au ika katoa o te tai; tei to kotou rima anake ïa.

3 Te au mea ora katoa e aere nei, ei kai ïa na kotou; mei te au rakau mata katoa ra, kua oronga katoaia atu e au na kotou.

4 Ko te kiko ra ma te ora katoa i roto, koia te toto ra, auraka kotou e kai.

5 Kare ua oki au e kore i te umuumu i te tutaki i to kotou na toto i oraʼi kotou; e umuumu oki au i te reira i te au mea ora katoa nei, e i te tangata nei; e umuumu oki au i te tutaki i te ora o te tangata nei, i te rima o to te tangata katoa uaorai ra taeake.

6 Ko te akamaringi i to te tangata nei toto, na te tangata katoa tona toto e akamaringi: i anga oki aia i te tangata ma to te Atua ra tu.

7 Ko kotou ra, kia anau, e kia maata roa; kia manganui to kotou uanga ki runga i te enua, e kia maata roa kotou i reira.

8 Kua tuatua mairai oki te Atua kia Noa, e tana au tamariki katoa ra, na ko maira,

9 I na, ko au, te akatinamou nei au i taku nei koreromotu kia kotou, e to kotou uanga a muri atu;

10 E te au mea ora katoa ki ko na kia kotou na, te au manu ra, e te au puaka ra, e te au manu taae katoa i te enua nei ki ko na kia kotou na; e te au mea ora katoa o te enua mei roto katoa mai i te araka.

11 Te akatinamou nei au i taku nei koreromotu kia kotou; e kore roa e ope akaou te au mea ora katoa i te mate i te vai diluvi; kare oki e diluvi akaouia e mate roa atu ei te enua ra.

12 Kua tuatua maira oki te Atua, Teia te akairo o te koreromotu taku e tuku nei ei akairo noku e no kotou, e te au mea ora katoa ki ko na kia kotou na, no te au uki katoa e a muri ua atu.

13 Ko taku anuanua i roto i te tumurangi ra, taku ïa e akono nei, ei akairo no te koreromotu naku, e to te ao katoa nei.

14 E kia akatupu au i te tumurangi ki runga ake i te enua nei, e kua kitea te anuanua ki roto i taua tumurangi ra;

15 Ei reira au e manako ei i taku koreromotu nei, ko au tetai pae, e ko kotou tetai pae, e te au mea ora katoa o nga mea ravarai; e kare rava e vai diluvi akaouia e ope ei te au mea ora katoa i te mate ra.

16 Kia anuanuaia oki ki roto i te tumurangi ra, ka akara ïa au, kia maara au i te koreromotu mutu kore na te Atua, e te au mea ora katoa o nga mea ravarai ki runga i te enua nei.

17 Kua tuatua maira te Atua kia Noa, Ko te akairo koreromotu teia, i akamouia e au naku, e te au mea ora katoa ki runga i te enua nei.

18 E nga tamariki a Noa, mei roto mai i te araka ra, ko Sema ïa, ko Hama ïa, e ko Iapheta; ko te metua oki a Hama no Kanaana.

19 Ko nga tamariki toko toru a Noa ra teia; e kua ki katoatoa te enua katoa ia ratou.

20 E riro a Noa ei tangata tatanu, e kua tanu iora aia i te kainga vine.

21 E kua inu oki aia i te wina, e kona iora; e vai taaka ua atura aia ki roto i tona puakapa.

22 Kite akera te metua o Kanaana ra, ko Hama, i tona metua i te vai taaka ua anga, e kua akakite akera ki nga tuakana nona i vao ra.

23 Kua rave akerā Sema raua ko Iapheta i te kakau, tuku akera ki rungao ia raua, e aere kotua atura ki muri to raua mata, tapoki atura i to raua metua; e kare raua i kite i te vai taaka ua anga o to raua metua.

24 E ara akerā Noa i taua wina nana ra, e kite akera aia i ta te tamaiti openga i rave iaia ra.

25 Kua na ko akera aia, E taumaaiā Kanaana; e riro aia ei tavini akaaka roa no tona ai tuakana.

26 E kua na ko akera oki aia, E akameitakiia te Atua o Sema ra ko Iehova; e ka riro oki a Kanaana ei tavini nona.

27 E akamaata roa te Atua ia Iapheta, ka noo oki aia ki roto i te au puakapa o Sema; e ka riro a Kanaana ei tavini nona.

28 E ka toru akera o Noa anere i te mataiti e rima ngauru ara i te ora anga, i muri ake i te diluvi ra.

29 E to Noa au mataiti katoa, e iva ïa anere, e rima ngauru ara; e mate iora aia.