2 Samuela

4 E KITE akera te tamaiti a Saula e, kua mate a Abenera i Heberona, paruparu atura tona rima, e to Iseraela ravarai kua rokoia ïa e te tumatetenga.

2 Toko rua oki o te tamaiti a Saula ra puke tangata, e puke rangatira ïa no runga i nga takanava; ko Baana te ingoa o tetai, e ko Rekaba te ingoa o tetai, ko nga tamariki a Rimona i Berota no te au tamariki a Beniamina; kua akonoia oki Berota no Beniamina i reira:

3 Kua oro oki to Berota ki Gitaima, e te noo ra i reira e tae roa mai ki teianei rā.

4 E tamaiti uaorai oki ta Ionatana, ta te tamaiti a Saula ra, kua pirikoki tona vaevae. E rima roa ona mataiti ka tae mai ei te tuatua i te matenga o Saula raua ko Ionatana mei Iezereela maira, kua rave iora tona ikiiki iaia oro ke atura: e tei taua oro rapurapu anga nona ra, kua topa iora aia, e pirikoki atura. Tapa iora tona ingoa ko Mephiboseta.

5 Kua aere iora nga tamariki a Rimona i Berota, ko Rekaba e ko Baana, e kua tae ki te are o Iseboseta i te vera anga o te rā, te akāvai ra aia ki runga i tetai roi i te avatea ra.

6 Kua tomo atura raua ki roto i taua are ra, mei te mea te tiki ra raua i te sitona; kua ko iora raua iaia ki raro ake i te îo kaokao; ooro aturā Rekaba e ko Baana tona taeake.

7 Ka aere ei oki raua ki roto i te are, te moe ra aia ki runga i tona roi i tona uaorai pia-moe ra, e kua ta iora raua iaia, mate iora aia, kua tipu iora raua i tona mimiti, rave iora raua i tona mimiti, e oro atura na te Araba ra i taua po ra.

8 Kua apai akera raua i te mimiti o Iseboseta kia Davida ra ki Heberona, e kua karanga atura ki te ariki, I na te mimiti o Iseboseta, te tamaiti na Saula i toou na enemi, ko tei kimi mai ana ia koe kia mate; kua tutaki a Iehova i teianei rā i taku pu i te ariki, ia Saula, e tona katoa uanga.

9 Kua karanga aturā Davida kia Rekaba e kia Baana tona taeake, nga tamariki a Rimona i Berota, na ko atura kia raua, Mei ia Iehova e ora ra, ko tei akaora i toku vaerua i te au tumatetenga katoa nei,

10 Kua tuatua mai ei tetai kiaku ra, ka na ko mai ei ra, I na, kua mate akenei a Saula, te manako ra aia e tuatua meitaki tana i apai mai, kua opu iora au iaia, e ta iora au iaia i Zikelaga, iaia i manako ra e, e apai atu au i tetai tutaki nana no taua tuatua ra:

11 Ka tanga atu ei oki, kia mate te tangata meitaki i nga tangata kino i roto i tona uaorai are, i runga i tona uaorai roi, kare ainei au e umuumu atu i tona toto ia korua, ka ta atu ei ia korua i te enua nei?

12 Kua akaue iorā Davida i te au tangata ou, kua ta oki ratou ia raua, kua tipu ke atu i o raua puke rima, e o raua puke vaevae, kua akauta akera ia raua ki runga i te vai i Heberona. Kareka te mimiti o Iseboseta, kua rave ratou i te reira, e kua tanu ki roto i te menema o Abenera i Heberona ra.