2 Samuela

16 E TOPA iti ua maira te take maunga ia Davida ra, i na, kua aravei ua mairai te tavini o Mephiboseta ra ko Ziba iaia, ma nga asini ra e rua, ma te nooanga katoa ra, e te au faraoa oki e rua anere, e te au kaui vine okotai anere, e te au kaui suke okotai anere, e okotai oki ue wina.

2 Kua karanga atura te ariki kia Ziba, Eaa te reira? Kua tuatua mairā Ziba, No te au tangata o te ariki ra nga asini ei noo anga, e te au faraoa, ma te suke ra, ei kai ïa na te au tangata ou ra; e te wina ra ei inu manga ïa na te aronga i paruparu i te aere anga i te medebara ra.

3 Kua karanga atura te ariki, Teiea te tamaiti a to pu ra? Kua tuatua mairā Ziba ki te ariki ra, I na, tei Ierusalema: te tuatua ra oki aia, Akonei to Iseraela e akaoki mai ei i te basileia o toku metua kiaku nei.

4 Kua karanga atura te ariki kia Ziba, I na, tera mai taau i tei mouria e Mephiboseta ra. Kua tuatua akerā Ziba, Te tupou atu nei au e, kia kite aroaia mai au e koe, e taku pu e te ariki e.

5 E tae atura te ariki ra ko Davida ki Bahurima, i na, kua aere ua maira tetai tangata no te kopu o te ngutuare o Saula, ko Simei te ingoa, te tamaiti a Gera ra: kua aere maira aia ki vao, e kua akakino aere.

6 Kua peî maira aia i te toka kia Davida, e te au tavini katoa o te ariki ra o Davida: e te au tangata ravarai, e te aronga toa katoa, tei te pae katau e te pae kaui nona ra.

7 Kua tuatua mairā Simei i taua akakino anga nona ra, E aere, e aere, e tenana tangata ta tangata e, e tenana tangata kino e:

8 Te akaoki nei a Iehova i te toto katoa o te ngutuare o Saula ki runga ia koe, i riro ei te au ia koe ra; e te tuku nei a Iehova i te basileia ki te rima o to tamaiti o Abasalom ra: e i na, kua rokoia koe e toou uaorai kino, e tangata ta tangata oki koe.

9 Kua tuatua mairā Abisai te tamaiti a Zeruia ki te ariki, Eaa ra teianei puaka-aoa mate i akakino mai ei i taku pu i te ariki nei? teia taku tuatua kia koe, e tuku akena koe iaku e aere au e tipu mai i tona mimiti.

10 Kua karanga atura te ariki, Eaa atu au ia kotou, e te au tamariki a Zeruia? E vaoo ua kia akakino ua mai ana; peneiake kua tuatua mai a Iehova kiaia e, Ka akakino ia Davida. Koai iora te karanga atu e, Eaa koe i peraʼi?

11 Kua karanga aturā Davida kia Abisai, e tona au tavini katoa, I na, taku tamaiti nei, no roto iaku uaorai nei, te umuumu mai nei iaku e ta: ka tanga atu ei i teianei tangata ngati Beniamina? E vaoo ua atu, kia akakino ua mai ana; kua tuatuaia mai aia e Iehova.

12 E riro paā Iehova i te akara mai i toku nei tumatetenga; ka riro a Iehova i te apai mai i te meitaki noku akonei i tau akakino nona nei.

13 Te aere ua rā Davida e tona au tangata na te arataa, te aere katoa rā Simei na te tumu maunga na reirao, ma te akakino rai, e ma te peî i te toka kiaia, e ma te titiri ua i te one-pueu.

14 E kua tae maira te ariki e te au tangata ravarai, kua roiroi, e kua pupuā iora i reira.

15 Kua tae mairā Abasaloma, e te au tangata katoa ra, ko to Iseraela ravarai, ki Ierusalema, e tei reira katoā Ahitophela.

16 Kua aere maira taua oa o Davida ra, ko Husai i Araki ra, kia Abasaloma, e kua tuatua mairā Husai kia Abasaloma, Kia ora te ariki! Kia ora te ariki!

17 Kua karanga aturā Abasaloma kia Husai, Ko toou takinga-meitaki aina teia ki to oa na? eaa koe i kore ei i aru i to oa na?

18 Kua tuatua mairā Husai kia Abasaloma, Auraka; ko ta Iehova ra, e ta teianei au tangata, e ta Iseraela katoa i iki ra, koia taku pu, e ei i ona ra au noo ei.

19 E tenana, ei iaai ra oki au, mari ra i te tamaiti nana uaorai? mei iaku rai oki i rave ki mua i te aroaro o to metua na, e pera katoa au ki mua i toou na aroaro.

20 Kua karanga aturā Abasaloma kia Ahitophela, Ka akataka ana i ta kotou tuatua i ta tatou e rave ra.

21 Kua tuatua mairā Ahitophela kia Abasaloma, Ka aere ana koe ki roto i te au vaine tavini a to metua, i vaooia e ia io nei ei tiaki i te are nei; kite akera to Iseraela katoa ia koe e kua ririia koe e to metua na: ketaketa akera te rima o te au tangata ravarai i o ou nei.

22 Kua totoa akera ratou i te are kakau ki rungao i taua are ra; kua tomo aturā Abasaloma ki roto i te au vaine tavini a tona metua ra ki mua i te aroaro o to Iseraela katoa ra.

23 Ko te ako ta Ahitophela i ako maira i taua au rā ra, riro atura mei te mea e ui ra i te tuatua a te Atua: ko te tu katoa ïa i taua ako a Ahitophela ra, ia Davida, e ia Abasaloma katoa ra.