1 Ariki

22 KA toru akera mataiti ma te tamaki kore ia Arama raua ko Iseraela.

2 Kia tae ra ki te toru o te mataiti, kua aere maira te ariki o Iuda ko Iehosaphata ki raro ki te ariki o Iseraela.

3 Kua tuatua akera te ariki o Iseraela ki te au tavini nona ra, Kare kotou i kite e no tatou Ramota-gileada, e te noo ua nei tatou, kare rai i rave i te rima o te ariki o Arama?

4 Kua karanga atura aia kia Iehosaphata, E tae katoa ainei koe ki Ramota-gileada i te tamaki? Kua tuatua mairā Iehosaphata ki te ariki o Iseraela, Tei toou ra anoano e pera katoa au; tei toou ra au tangata e pera katoa toku; e tei te aronga oroenua naau ra, e pera katoa taku aronga oroenua.

5 Kua tuatua rā Iehosaphata ki te ariki o Iseraela, Ka ui ana ra i ta Iehova tuatua i tenana, ko taku ia tuatua kia koe.

6 Kua akaputuputu maira te ariki o Iseraela i te au peroveta e a katoa paa anere i te tangata, e kua karanga atura kia ratou, Ka aere ainei au ki Ramota-gileada ki te tamaki, e auraka ainei? Kua tuatua maira ratou, Ka aere; na te Atu oki e oronga mai ki te rima o te ariki.

7 Kua tuatua akerā Iehosaphata, Kare atu rai a Iehova e peroveta toe i ko nei, kia ui tatou kiaia ra?

8 Kua tuatua maira te ariki o Iseraela kia Iehosaphata, Okotai nei tangata i toe, ko Mikaia te tamaiti a Imela, kia ui rai tatou kia Iehova iaia: kua makitakita ra au iaia; kare oki aia e totou meitaki mai iaku nei, ko te tuatua kino anake ra. Kua karanga aturā Iehosaphata, Auraka te ariki e pera mai.

9 Kua karanga atura te ariki o Iseraela i tetai rangatira, na ko atura, Arataki viviki mai ia Mikaia te tamaiti a Imela ra.

10 Te noo maira te ariki o Iseraela, e te ariki o Iuda ko Iehosaphata, ki runga i o raua puke terono, kua kakau i to raua kakau, tei te ngai atea i te tomoanga i te ngutupa i Samaria; e te totou anake ra te au peroveta ki mua ia raua.

11 E puke tara auri oki tei angaia e Zedekia te tamaiti a Kenaana, e kua tuatua akera, Te na ko mairā Iehova, Ko taau teia kia ueketu i to Arama ra, e kia pou atu ratou ia koe.

12 E kua pera te au peroveta ravarai i te totou, na ko maira, E aere ki Ramota-gileada e kia manuia atu; na Iehova oki e tuku mai ki te rima o te ariki.

13 Ko taua karere ra i aere e tiki ia Mikaia ra, kua karanga atura kiaia, na ko atura, I na oki, i ta te au peroveta tuatua ki te ariki ra, e meitaki anake ïa ma te vaa okotai: e tenana, teia taku tuatua kia koe, kia aiteite katoa taau tuatua ki ta ratou, ei tuatua meitaki rai.

14 Kua tuatua mairā Mikaia, Te ora rā Iehova, ko ta Iehova e akakite mai kiaku ra, ko taku ïa e tuatua.

15 E tae maira aia ki te ariki ra, kua karanga atura te ariki kiaia, E Mikaia, e aere ainei tatou ki Ramota-gileada ki te tamaki, e auraka ainei? Kua tuatua maira aia, E aere, e kia manuia atu: na Iehova oki e tuku mai ki te rima o te ariki.

16 Kua karanga atura te ariki kiaia, Takiia aku akataputou anga atu ia koe e, ei tuatua-mou anake ra taau e tuatua mai kiaku nei i te ingoa o Iehova ra.

17 Kua tuatua maira aia, Akara atura au ia Iseraela ravarai, kua pueurikiriki ke ki runga i te au maunga, mei te mamoe kare e tiaki: e kua tuatua mairā Iehova, Kare o ratou nei pu: e oki te tangata katoa ki te ngutuare ma te au.

18 Kua karanga atura te ariki o Iseraela kia Iehosaphata, Kare au i tuatua kia koe e, kare aia e totou meitaki mai iaku, ko te kino anake ra?

19 Kua tuatua mairai oki aia, E akarongo mai ana koe i te tuatua a Iehova: Kua kite au ia Iehova i te noo anga ki runga i tona ra terono, e to te rangi katoa ra nuku i te tu ua anga i vaitata iaia i tona pae katau e tona pae kaui.

20 E kua ui aturā Iehova, Naai e akanauru atu ia Ahaba, kia aere aia ki runga e kia inga i Ramota-gileada? Kua tuatua maira tetai i tana, e kua tuatua maira oki tetai i tana,

21 Kua aere maira tetai vaerua, kua tu maira ki mua ia Iehova, e kua tuatua maira, Naku aia e akanauru atu.

22 Kua karanga aturā Iehova kiaia, E akapeea? Kua tuatua maira aia, E aere au ei vaerua pikikaa i roto i te vaa o te au peroveta katoa nana ra. Kua karanga atura aia, Naau rai e akanauru, ka tupu oki taau: e aere e akapera.

23 E teianei; i na, kua tuku mai a Iehova i te vaerua pikikaa ki roto i te vaa o taua au peroveta katoatoa naau nei; e kino oki ta Iehova i akakite mai ia koe ra.

24 Kua aere iorā Zedekia te tamaiti a Kenaana i vaitata, kua moto atura ia Mikaia i te paparinga ra, e kua karanga atura, I naea io nei te Vaerua o Iehova i te akaruke anga iaku e te karanga anga atu kia koe?

25 Kua tuatua mairā Mikaia, I na, ka kite koe, kia tae ki te rā e aere ei koe ki roto i tetai pia i roto rava ra ka pipini atu ei.

26 Kua karanga atura te ariki o Iseraela, Ka rave ia Mikaia, e akaoki atu kia Amona ki te tutara o te oire ra, e kia Ioasa ki te tamaiti a te ariki;

27 E karanga atu ei, Te na ko maira te ariki, E tuku ana i teianei tangata ki roto i te are tapekaanga ra, ka angai atu ei iaia ki te kai a tei tapekaia ra, e te vai a tei tapekaia ra, e kia oki mai au ma te au.

28 Kua tuatua mairā Mikaia, Kia oki akaou mai koe ma te au, kare ïa ta Iehova taku i tuatua na. E kua karanga atura aia, E akarongo mai, e te au tangata katoa.

29 Kua riro atura te ariki o Iseraela, e te ariki o Iuda ko Iehosaphata, ki Ramota-gileada.

30 Kua tuatua maira te ariki o Iseraela kia Iehosaphata, Ka akatu ke au iaku uaorai, ka aere ei ki te tamaki; e kakau ra koe ki toou ra kakau.

31 Kua akatu ke iora te ariki o Iseraela iaia uaorai, e kua aere atura ki te tamaki ra. Kua akaue atura te ariki o Arama, e karanga atura ki te au rangatira kariota e toru ngauru ma rua iaia ra, Auraka kotou e tamaki ua atu ki te tangata rikiriki, e tei mamaata, mari ra ki te ariki o Iseraela anake ra.

32 E kia akara mai te au rangatira o te au kariota ra ia Iehosaphata, kua tuatua akera ratou, Ko te ariki rai teia o Iseraela ra. Kua ariu akera ratou e tamaki iaia; kua kaku ua rā Iehosaphata.

33 E kite akera oki te au rangatira o te au kariota ra e, kare aia i te ariki o Iseraela, kua anga ke maira ratou, kare akera i aruaru atu iaia.

34 Kua akainana ua iora tetai tangata i te ana, tu iora te ariki o Iseraela i rotopu i te topirianga tapoki-umauma ra: kua karanga atura aia ki te tangata akaoro kariota nona ra, E ariu ke atu koe, ka kave iaku ki vao i te nuku nei; kua mate au.

35 Tupu atura te tamaki i taua rā ra; kua turuia iora taua ariki ra i roto i te kariota ra, i te tamaki anga i to Arama, e aiai iora, mate atura: e kua taʼe maira te toto mei roto i te puta i rotopu tikai i taua kariota ra.

36 E tae akera ki te topa anga o te rā ra, e akakite aereia iora taua nuku ra, na ko iora, E aere te tangata katoa ki tona uaorai oire, e tona uaorai enua.

37 Mate iora taua ariki ra, e tae atura ki Samaria; tanu iora ratou i taua ariki ra i Samaria.

38 Kua orei iora ratou i te kariota, e kua orei katoa oki i te au taoonga tamaki, i taua vai ra i Samaria; kua mitimiti iora te au puaka aoa i te toto nona, i ta Iehova oki i tuatua maira.

39 E te toenga o te tuatua ia Ahaba, e te au mea katoa i raveia e ia, e te are nio elephana i angaia e ia, e te au oire katoa i akatuia e ia, kare ainei kua tataia ki roto i te buka, te tuatua no te au rā o te ui ariki o Iseraela?

40 Moe iorā Ahaba ki o tona ai metua; tupauia akera aia i te au e te tamaiti nana ra e Ahazia.

41 Kia tae ki te a o te mataiti o te ariki o Iseraela ra o Ahaba, i ariki ei a Iehosaphata te tamaiti a Asa ki runga ia Iuda.

42 Tei te toru o te ngauru o to Iehosaphata mataiti e rima ara i ariki ei aia: okotai takau ma rima ona mataiti i te ariki anga i Ierusalema. Ko Azuba te ingoa o te metua vaine nona ra, e tamaine na Silehi.

43 E aere atura aia na te au arataa katoa o tona metua o Asa; kare aia i tatipake i te reira, i te rave anga i te mea tika i mua i te aroaro o Iehova. Kare ra te au ngai teitei i akarukeia; te apai ua ra te au tangata i te atinga e te tutungi ua ra i te atinga kakara, ki runga i te au ngai teitei.

44 Au akera ta Iehosaphata i te ariki o Iseraela.

45 E te toenga o te tuatua ia Iehosaphata, e tona ririnui i akakiteia, e tana oki tamaki, kare ainei kua tataia ki roto i te buka, te tuatua no te au rā o te au ariki o Iuda ra?

46 Te toenga oki o te aronga sodoma, i tei toe i te tuatau o tona metua o Asa ra, kua apai keia ïa i taua enua ra.

47 Kare o Edoma ariki i reira, ko tetai tangata ke ra tei akatakaia ei ariki.

48 Kua tarai oki a Iehosaphata i te pai Taresisa e ano ki Ophira i te auro. Kareka akerai i tae: ngaangaa iora oki te au pai i Eziona-gebera.

49 Kua tuatua mairā Ahazia te tamaiti a Ahaba kia Iehosaphata, E tuku katoa toku nei au tavini e toou ra ki runga i te pai. Kare atura i tika ia Iehosaphata.

50 Moe iorā Iehosaphata ki o tona ai metua, e tanumia iora ki o tona ai metua i roto i te oire o tona ra metua o Davida: tupauia akera aia i te au e te tamaiti nana ra e Iehorama.

51 E tae akera ki te mataiti okotai ngauru ma itu o te ariki o Iuda ra o Iehosaphata, i ariki ei a Ahazia te tamaiti a Ahaba ra ki runga ia Iseraela i Samaria, ka rua akera ona mataiti i te ariki anga ki runga ia Iseraela.

52 Kua rave aia i te kino i mua i te aroaro o Iehova, aere atura na te arataa o tona metua tane, e te arataa o tona metua vaine, e te arataa o Ieroboama te tamaiti a Nebata, i ara ai Iseraela ra: 53  22:52Kua tavini atu oki aia ia Baala, e kua akamori oki iaia, e kua akakoko atura i te Atua o Iseraela ia Iehova kia riri, i te au mea katoa ta tona metua i rave ra.