Genese

4 KITE iorā Adamu i tana vaine ia Eva; to iora aia, e anau maira ko Kaina, e kua tuatua akera, E tangata taku i rauka io nei ia Iehova.

2 E anau akaou iora aia i te teina ko Abela. E angai mamoe a Abela, e e tangata tatanu a Kaina.

3 E tae akera ki tetai tuatau, kua apai aturā Kaina i te kai o te enua ei atinga na Iehova. 4 E kua apai katoa aturā Abela i to roto i te anaunga mua o tana ra anana, e tei matu oki i reira. Kite mairā Iehova ia Abela e tana atinga:

5 Karekā Kaina e tana atinga, kare ïa aia i kite mai. Riri rava akerā Kaina, e akatumatuma atura tona mata.

6 E kua tuatua mairā Iehova kia Kaina, Eaa koe i riri ei? e eaa oki i akatumatumaʼi toou mata na?

7 Kia rave koe i te meitaki ra, kare ainei koe e kiteia mai? e kare i meitaki ra, kare ainei te vai ra te tarangaara i te ngutupa na? E kauraro ra aia ia koe, e ei runga ake koe iaia.

8 Kua tuatua mairā Kaina ki tona teina kia Abela: e tae atura raua ki roto i te kainga ra, tei runga mairā Kaina i tona teina ia Abela, e kua tamate takiri iora iaia.

9 Kua tuatua mairā Iehova kia Kaina, Teiea to teina ko Abela? Kua karanga atura aia, Kare au i kite: ko au ainei te tiaki i toku teina?

10 Kua tuatua maira aia, I aa na koe? te kapiki maira te reo o te toto o toou teina kiaku, mei te one maira.

11 E tenana, kua taumaaia koe e te enua nei, kua amama io nei i tona vaa e āriki i te toto o toou teina i to rima ra.

12 Kia tanu koe i te one na, kare atura te one e akatupu i te kai naau; ka riro koe ei oro aere ua, e ei koka aere ua, i te enua na.

13 Kua karanga aturā Kaina kia Iehova, E maata taku utunga, kare e tika iaku kia akakoromaki.

14 I na, kua tuaru mai nei koe iaku i teianei rā, mei runga mai i te enua nei; e mei mua atu i toou aroaro na ka ngaro ke atu au; e ka riro au ei oro aere ua, e ei koka aere ua, i te enua nei; e te tangata katoa e aravei ua mai iaku nei, ka riro ïa i te ta mai iaku.

15 Kua tuatua mairā Iehova kiaia, Ko te ta ia Kaina ra, e tataki ituia tona mate. E kua tuku mairā Iehova i tetai akairo ia Kaina ra, kia kore roa tetai tangata e aravei iaia ra e ta iaia.

16 Aere ke aturā Kaina mei mua mai i te aroaro o Iehova ra, e noo atura i te enua ra ko Noda, i te pae i te itinga o te rā i Edene ra.

17 Kite iorā Kaina i tana vaine; to iora aia, e anau atura ko Enoka: te akatu ra aia i te oire i reira, tapa iora aia i te ingoa o taua oire ra kia Enoka, ki te ingoa o tana tamaiti.

18 E anau akera ta Enoka ko Irada; e anau akera ta Irada ko Mehuiaela; e anau akera ta Mehuiaela ko Metusaela; e anau akera ta Metusaela ko Lameka.

19 E kua rave iorā Lameka i e toko rua vaine; ko Ada te ingoa o tetai, e ko Zila te ingoa o tetai.

20 E anau maira ta Ada ko Iabala: ko te momua ïa o te aronga i noo i te puakapa ra, ko tei tiaki i te puaka ra.

21 Ko Iubala te ingoa o tona teina: ko te momua ïa o te aronga katoa i akatangi i te kinura, e te koê ra.

22 E anau akera oki ta Zila ko Tubala-kaina, e taunga ïa i te au taoonga katoa i te auri, e te veo nei: e te tuaine o Tubala-kaina ra ko Naama ïa.

23 Kua karanga aturā Lameka ki nga vaine nana ra, E Ada e Zila, e akarongo mai i toku reo; e nga vaine a Lameka, e ariu mai i te taringa i taku tuatua: Kua ta rai oki au i te tangata ko au i paruparu na iaia, e tangata ou tei mate iaku ko au i akaparuparuia mai:

24 Kia taki itu i te tutaki ia Kaina ra, riro i te tataki itu ngauru e kia itu ara ia Lameka.

25 Kite akaou iorā Adamu i tana vaine; e kua anau atura aia, e tamaiti, tapa iora i tona ingoa ko Seta: kua tuatua akera oki aia, Kua akono te Atua i tetai uanga noku, ei tutaki ia Abela, no te mea kua taia aia e Kaina.

26 E anau akera oki ta Seta, e tamaiti; e tapa iora aia i tona ingoa ko Enosa. I reira to te tangata tapa angaia i te ingoa no Iehova.