Ezekiela

33 KUA tae mairai oki te tuatua a Iehova kiaku nei, na ko maira,

2 E te tamaiti a te tangata na, e karanga atu ki te au tamariki a to au tangata na, e na ko atu kia ratou. Kia apai mai au i te koke ki runga i te enua ra, e kua rave akera to te enua i tetai tangata no roto i to ratou ra kotinga, e kua akataka iora iaia ei tiaki ia ratou:

3 E te kite ra aia i te koke i te aere anga mai ki runga i taua enua ra, e kua akatangi iora i te pu, ei ako i taua au tangata ra;

4 Ko tei rongo tikai i te tangi anga o te pu ra, e kare akera aia i akonokono; e kua tae maira te koke, e riro atura aia, ei runga tona toto i tona uaorai mimiti:

5 Kua rongo aia i te tangi anga o te pu ra, e kare akera aia i akonokono; ei runga iaia uaorai tona toto. Ko tei akonokono ra, ka ora aia iaia uaorai.

6 Kia akara ra te tiaki i te koke i te aere anga mai, e kare i akatangi i te pu ra, e kare i akoia taua au tangata ra; e kua tae maira oki taua koke ra, e riro atura tetai tangata no roto ia ratou, kua riro aia i roto i tana ara; e umuumu ra au i tona toto ki te rima o taua tiaki ra.

7 Ko koe oki, e te tamaiti a te tangata na, kua akataka au ia koe ei tiaki i te ngutuare o Iseraela; e tenana e akarongo mai koe i te tuatua i toku nei vaa, ka na ko nei atu ei iaku nei i te ako ia ratou.

8 Kia karanga atu au ki te tangata kino, E tera ra tangata kino, ka mate tikai koe; kia kore ra koe e tuatua i te ako anga atu i taua tangata kino i tona aerenga ra, ka mate rai taua tangata kino ra i roto i tana ra ara, e umuumu ra au i tona toto i toou ra rima.

9 Kia ako ra koe i taua tangata kino ra i tona aerenga kia ariu mai aia i te reira ra; e kare aia e ariu mai i taua aerenga nona ra, ka mate aia i roto i tana uaorai ara; kua ora ra koe ia koe uaorai.

10 Ko koe oki, e te tamaiti a te tangata na, e karanga atu ki te ngutuare o Iseraela; Te akapera nei kotou, i te na ko anga e, Ta matou au ara e to matou nei au kino tei runga ïa ia matou nei, e kua kakao ua matou i roto i te reira, eaa iora oki matou e oraʼi?

11 E karanga atu kia ratou, Te tuatua maira te Atu ra ko Iehova, Te ora nei au, kare rava oku e mareka anga i te mate o te tangata kino ra; kia ariu maira te tangata kino i tona aerenga kia ora: e ariu mai kotou, e ariu mai kotou i to kotou au aerenga kino; eaa oki kotou i inangaro ei ki te mate, e te ngutuare o Iseraela e?

12 E teianei, ko koe, e te tamaiti a te tangata na, e karanga atu ki te au tamariki a toou au tangata, Kare te tangata tuatua-tika e ora i tana uaorai tuatua-tika i te rā e ara ai aia ra: e te kino oki o te tangata kino ra, kare aia e inga i te reira i te rā e ariu, mai ei aia i te kino nona ra, kare katoa oki e tika i te tangata tuatua-tika kia ora i te rā e ara ai aia ra.

13 Kia tuatua au ki te tangata tuatua-tika ra, e ora tika rai aia; e kia irinaki aia ki runga i tana uaorai tuatua-tika, e kua rave iora i te kino, kare e manakoia te au tuatua-tika katoa nana ra; no tona ra kino tana i rave ra, ka mate aia i te reira:

14 E kia karanga atu au ki te tangata kino ra, E mate tika rai koe na; kia ariu maira aia i tona ra kino, e kia rave i te mea tau e te mea tika;

15 Kia akaoki mai te tangata kino i te ou pou, kia tutaki mai i tana i keia ra, e kia aere na te au akonoanga e oraʼi ma te rave kore i te kino ra; ka ora tika rai aia, kare ïa e mate.

16 Te au ara katoa tana i rave ra, kare ïa e taiku akaouia kiaia: kua rave aia i te mea tau e te mea tika; ka ora tika rai aia.

17 E te tuatua ra te au tamariki a toou nei au tangata, Kare te tuatua o te Atu i tau, kareka ratou, to ratou te tuatua kare i tau.

18 Kia anga ke te tangata tuatua-tika i tana ra tuatua-tika, e kua rave iora i te kino, ka mate ïa aia i te reira.

19 E kia anga mai te tangata kino i tona ra kino, e kua rave i te mea tau e te mea tika, ka ora ïa aia i te reira.

20 E te tuatua na kotou e, Kare te tuatua, o te Atu e tau. Kotou e te ngutuare o Iseraela e, e akautunga atu au ia kotou ravarai kia tau i tona uaorai aerenga.

21 E tae akera ki te mataiti okotai ngauru ma rua i to tatou tuikaa anga ra, i te ngauru o te marama, e te rima oki o te rā i taua marama ra, te aere maira tetai tangata i ora mai, mei roto mai i Ierusalema kiaku nei, na ko maira, Kua taia taua oire ra.

22 Tei runga maira te rima o Iehova iaku nei i te aiai ake, ou i aere mai ei taua tangata i ora maira; e kua kiriti aia i toku vaa, e tae ua maira aia kiaku nei i te popongi; e kua kiritiia oki toku vaa, e kare atura au i murare.

23 E kua tae maira oki te tuatua a Iehova kiaku nei, na ko maira,

24 E te tamaiti a te tangata na, te aronga i noo i tera ra au ngai tanea i te enua o Iseraela ra, te karanga nei ratou, te na ko nei, Okotai uā Aberahama, e tei iaia taua enua nei: kua toko rai ra tatou; kua orongaia mai taua enua nei no tatou ei kainga ipukarea.

25 E teianei, e karanga atu kia ratou, Te na ko maira te Atu ra ko Iehova; Te kai ra kotou ma te toto, e te nānā nei i to kotou au mata ki to kotou au idolo, e te maringi ra te toto ia kotou: e ka riro ainei te enua ia kotou?

26 Te tu ua ra kotou ki runga i ta kotou koke, te rave na kotou i te mea viivii, e te rave anake ra kotou i te vaine a tona uaorai tangata tupu: e ka riro ainei te enua ia kotou?

27 E akapera taau tuatua kia ratou, Te na ko maira te Atu ra ko Iehova; Te ora nei au ra, te aronga i roto i te au ngai tanea ra, ka inga ïa i te koke, e tei te ngai atea aia ra, e oronga ïa au iaia na te au puaka taae kia pou; e to roto i te punanga ketaketa ra, e to roto i te au ana ra, ka mate ïa i te maki-mate.

28 E akariro oki au i taua enua ra ei tanea rava ïa, e te nengonengo o te ririnui nona ra, ka mutu ïa, ka vai tanea uaia te au maunga o Iseraela, kare rava e tangata e aere na rungao.

29 Ei reira ratou e kite ei e ko Iehova au, kia akariroia e au taua enua ra ei tanea rava ïa, no ta ratou au mea viivii ravarai i raveia e ratou ra.

30 E ko koe oki, e te tamaiti a te tangata na, te koumuumu ua ra te au tamariki a to au tangata ra ia koe, i te pae patu ra e te au ngutupa are ra, e te tuatua ra tetai ki tetai, te tangata katoa ki tona uaorai taeake, i te na ko anga e, Ka taki aere, ko kotou na e akarongo i te tuatua no ko mai ia Iehova ra.

31 E te aere maira ratou kia koe mei toku iti tangata i aere maira, e te noo ra ratou ki mua ia koe ra mei toku iti-tangata ra, e te akarongo ra ratou i to au tuatua, kare ra ratou e rave i taua au tuatua ra: te maata ra to ratou aroa vaa ua, te riro atura ra to ratou ngakau ki ta ratou apinga.

32 E i na, kua riro koe mei te peʼe inangaro maataia no ratou ra, e mei te tangata reo meitaki ra, e tei tika kia akatangi meitaki i te apinga tangi ra: te akarongo ra oki ratou i taau au tuatua, kare ra ratou e rave i taua au tuatua ra.

33 Kia tupu ra te reira ra, (i na, e tupu mairai,) ei reira ratou e kite ei e, e peroveta tei tae mai i rotopu ia ratou ra.