Hosea

6 KA aere mai, tatou ka oki kia Iehova ra: nana oki tatou i aeae, e nana tatou nei e akaora; nana i ta, e nana e vaʼi.

2 Kia topa ake nga rā e rua e akaoraʼi aia ia tatou: e i te toru o te rā e akatu ei aia ia tatou, ka oraʼi tatou ki mua i tona aroaro.

3 Ei reira tatou e kite ei, e aruaru ei tatou kia kite ia Iehova: kua akonoia tona aerenga mai mei te popongi nei; e mei te ua aia i te tae anga mai ki runga ia tatou nei, mei te ua openga, e te ua muatangana i te enua nei.

4 E Epheraima e, e akapeea atu au ia koe? E Iuda e, e akapeea atu au ia koe? e tau oki to kotou meitaki mei te tumurangi popongi, e mei te au e peke vave ra.

5 I pari ei au ia ratou i te au peroveta nei: kua mate ratou iaku i te tuatua o taku vaa nei: e kua riro atu na taau ra tuatua-tau mei te uira ra.

6 Ko te aroa oki taku i inangaro, auraka te atinga; e te kite i te Atua, e maata ïa i te au atinga karakaratio.

7 Kua aite ratou ki te tangata e akaatikau i te koreromotu: kua pikikaa mai ratou iaku i reira.

8 E oire no te aronga rave ara Gileada, kua akairoia ki te takai anga toto.

9 E mei te anana keia e moetapapa i te tangata ra, te ta nei te pupu taanga i te tangata i te arataa e tae atu ei ki Sekema: e kino maata oki ta ratou i rave.

10 E tuatua rikarika tei kitea e au i roto i te ngutuare o Iseraela: tei reira te kanga o Epheraima, kua viivii Iseraela.

11 E ko koe katoa, e Iuda e, kua akonoia taau mou.