Levitiku

16 KUA tuatua mairā Iehova kia Mose, i muri ake i te matenga o nga tamariki toko rua a Aarona, ka apai ei raua i te ai ke ki mua i te aroaro o Iehova, e mate iora; 2 I tuatua mairā Iehova kia Mose, E karanga atu koe ki toou tuakana kia Aarona, auraka aia e aere ua ki roto i te ngai-tapu, ki roto i te ngai paruruia ki mua atu i te tapoki i runga i te aruna ra; kia kore aia e mate: ei roto oki i te tumu-rangi i rungao i te tapoki e kiteaʼi au. 3 E akaperā Aarona kia tomo ki roto i te ngai-tapu ra; e rave aia i tetai puakatoro ou ei tarangaara, e tetai mamoe toa ei atinga karakaratio. 4 E aao oki aia i te piriaro tapu orongā ra, e aao oki aia i te piripou orongā, e kia tatuaia oki aia ki te tatua orongā, e kia pare oki ki te pare orongā; e kakau tapu anake te reira; e paî oki aia ki te vai, ka aao ei i te reira.

5 E rave oki i e rua puakanio na te uipaanga tamariki a Iseraela katoa ei tarangaara, e tetai mamoe toa ei atinga karakaratio. 6 E na Aarona e apai i te puakatoro tarangaara, nana uaorai ra, ei tapokiangaara nana, e na tona katoa ra ngutuare.

7 E ka rave oki aia i nga puakanio, ka apai ei ki mua i te aroaro o Iehova, ki te ngutupa Are uipaanga ra. 8 E tuku oki a Aarona i te kelero i aua nga puakanio ra; tetai kelero na Iehova, e tetai kelero no te puakanio akaora.

9 E te puakanio tei iaia te kelero na Iehova ra, ka rave mai a Aarona i te reira e apai ei tarangaara. 10 Kareka te puakanio, tei iaia te kalero no te puakanio akaora, ka apai ora uaia ki mua i te aroaro o Iehova ei tapokiangaara, ka tuku ua atu ei kia aere ua na ki te medebara, ei puakanio akaora.

11 E reirā Aarona e taki mai ei i te puakatoro no te tarangaara nana uaorai, ka apai ei i te tapokiangaara nana uaorai, e tona ngutuare; e kia oti taua puakatoro tarangaara nana uaorai i te taia,

12 Ei reira aia e akaki ei i tetai āriki ai ki te ngarau ka, no runga i te atarau i mua i te aroaro o Iehova, e akaki oki ona puke rima ki te atinga kakara i akaungaungātitiia ra, ka apai ei ki roto mai i te paruru ra:

13 E tuku oki aia i taua atinga kakara ra ki runga i te ai ki mua i te aroaro o Iehova ra, kia ngaro te tapoki, i runga i te aruna kite ra, ki te auai o te atinga kakara, kia kore aia e mate: 14 E rave oki aia i tetai manga i te toto o taua puakatoro ra, ka pîpî ei i te tapoki ki tona maikao-rima, i te pae i te itinga o te rā ra; e pîpî oki i te toto ki tona maikao-rima ki mua atu i te tapoki, e kia itu ïa pîpî anga.

15 Ei reira te puakanio tarangaara, na te au tangata ra e taiaʼi, ka apai oki aia i te toto ki roto mai i te paruru ra, ka rave ei i to reira toto, mei tana i rave i te toto o te puakatoro ra, e pîpî ki runga i te tapoki aruna, e ki mua atu i taua tapoki ra. 16 Nana e apai i te tapokiangaara no te ngai-tapu ra, no te viivii o te tamariki a Iseraela, e to ratou kino i ta ratou ara ravarai; e pera katoa oki aia i te Are uipaanga, e vai ia ratou, i rotopu i to ratou viivii.

17 Auraka roa ei tangata to roto i te Are uipaanga, kia aere aia e apai i te tapokiangaara ki roto i te ngai-tapu ra, e tae mairai aia ki vao, kia oti te tapokiangaara i te apaiia e ia nana uaorai, e na tona ra ngutuare, e na te uipaanga Iseraela katoa ra.

18 Ei reira aia ka aere ei ki vao ki te atarau i mua i te aroaro o Iehova, ka apai ei i te tapokiangaara no te reira; e e rave aia i te toto puakatoro, e te toto puakanio, ka tuku ei ki runga i te au tara o te atarau e pini ua ake.

19 E pîpî oki aia i te toto ki tona maikao-rima ki rungao, e kia itu ake pîpî anga, ei tamā anga, kia tapu i te viivii a te tamariki a Iseraela.

20 E oti akera te tapokiangaara i te apaiia e ia no te ngai-tapu, e no te Are uipaanga, e no te atarau, ka apiia mai ei te puakanio ora ra:

21 Ka tuku oki a Aarona i ona puke rima e rua ki runga i te mimiti o taua puakanio ora ra, ka aaki ei i te au ara ravarai a te tamariki a Iseraela ki runga i te reira, e to ratou kino katoa i ta ratou au ara ravarai, ka tuku ei ki rungao i te mimiti o taua puakanio ra, ka tono ei tetai tangata tau, e taki ke atu i taua puakanio ra, ki te medebara: 22 E na taua puakanio ra e apai i ta ratou au ara ravarai ki runga iaia uaorai, ki te enua motutaa; ka tukuia taua puakanio ra ki roto i te medebara ra.

23 Ei reirā Aarona e aere ei ki roto i te Are uipaanga ra, ka tataraʼi i te au kakau orongā, i tana i aao ka aere ei aia ki roto i te ngai-tapu ra, ka vaoo ei i reira:

24 Ka orei oki aia iaia uaorai ki te vai i roto i tetai ngai tapu, ka aao ei i ona kakau, ka aere mai ei ki vao, ka apai ei i te atinga karakaratio nana uaorai, e te atinga karakaratio na te tangata, e apai oki i te tapokiangaara nana uaorai, e na te tangata.

25 E ka taʼu aia i te tongaua o te tarangaara ra ki runga i te atarau.

26 E te tangata i tuku i taua puakanio ra ei puakanio akaora, ka orei aia i ona kakau, e paî oki aia ki te vai, ka aere mai ei aia ki roto i te puakapa i muri ake.

27 E te puakatoro tarangaara, e te puakanio tarangaara, i tei apaiia te toto ki roto i te ngai-tapu ei tapokiangaara ra, ka apaiia ïa ki vao mai i te puakapa; e ka taʼuia te kiri, e te kiko, e te repo katoa, ki te ai.

28 E te tangata e taʼu ra, e orei aia i ona kakau, e paî oki ki te vai, ka aere mai ei ki roto i te puakapa i muri ake.

29 Ei akonoanga vai tamou teia na kotou: kia tae ki te marama itu ra, e te ngauru o te rā i taua marama ra, ka taakaakaʼi kotou i to kotou au vaerua, e auraka rava e rave i te angaanga, ma te tangata uenua, e te tangata ke katoa i tuitarere ua i roto ia kotou na: 30 Ei te reira oki rā ka apai ei te taunga maata i te tapokiangaara na kotou, e tamā ia kotou i ta kotou au ara katoa, kia mā kotou ki mua i te aroaro o Iehova. 31 Ei sabati akaangaroi anga ïa te reira no kotou, ei akonoanga tamou kia taakaaka kotou i to kotou au vaerua.

32 E na te taunga i akatainuia, e i akataoongaia, ei tupau i tona metua ra, i te rave anga i te taoonga taunga ra, nana e apai i te tapokiangaara, e aao oki aia i te kakau orongā, te kakau tapu ra: 33 E apai oki i te tapokiangaara no te ngai-tapu; e apai oki i te tapokiangaara no te Are uipaanga, e no te atarau, e apai oki aia i te tapokiangaara na te au taunga, e na te au tangata katoa o te uipaanga ra. 34 Ei akonoanga vaoo tamou teia na kotou, e, ei tapokiangaara te apaiia, okotai apai anga i te mataiti okotai, no te au ara ravarai a te tamariki a Iseraela. Kua pera oki aia i ta Iehova i akaue mai kia Mose ra.