2 Samuela

10 E I MURI ake i te reira, mate iora te ariki o te tamariki a Amona, tupauia akerā aia i te au e tana tamaiti ra e Hanuna.

2 Kua tuatua akerā Davida, E takinga-meitaki atu ia Hanuna te tamaiti a Nahasa, mei tona metua i takinga-meitaki mai iaku ra. Kua tono aturā Davida i tona au tavini ei akapumaana iaia, i tona metua ra. Kua tae atura te au tavini o Davida ki te enua o te tamariki a Amona.

3 Kua tuatua maira te au tutara o te tamariki a Amona ki to ratou ra pu kia Hanuna, Te akangateitei nei ainā Davida i to metua i taau na akara anga koia i tono mai i te akapumaana ia koe na? Kare ainei kua tono mai a Davida i tona au tavini kia koe nei ei tutaka, e ei akara i taua oire nei e kia uritumuia e ia?

4 Kua rave akerā Hanuna i aua nga tavini o Davida ra, kua varu iora i tetai pae kumikumi, kua kokoti iora oki i o ratou kakau i rotopu i te ūā, e kua tuku atura kia aere ana.

5 E kia akakiteia mai a Davida, kua tono atura aia i te karere e aravei ia ratou, kua maata rava oki te akama o aua nga tangata ra: e kua karanga atura te ariki, Ka noo i Ieriko na, e kia tupu to kotou na kumikumi ka oki mai ei.

6 Te kite ra te tamariki a Amona e, kua kino ratou ia Davida, kua tono atura te tamariki a Amona, e kua ou atura i to Arama o Bete-rehoba, e to Arama o Zoba, okotai takau te tausani i te tangata aere ua, okotai oki tausani no te ariki o Maaka, okotai oki ngauru ma rua i te tausani i te Toba.

7 E kite akerā Davida i te reira, kua tono atura aia ia Ioaba e te nuku tangata toa ravarai ra.

8 Kua aere maira te tamariki a Amona ki vao, kua akamou iora i te tamaki i te tomoanga ki roto i te ngutupa ra: e to Arama o Zoba, e no Rehoba, e no Toba, e no Maaka, te taka ke ra ïa ratou tei roto i te ngai atea.

9 Kia akara akerā Ioaba e kua mou te tamaki ki mua e ki muri, kua iki iora aia i te aronga memeitaki i Iseraela ra, e kua akamou i te tamaki i to Arama.

10 E te toenga o te tangata ra, kua tuku akera ïa ki raro ake i tona taeake ia Abisai, ki akamou aia i te tamaki i te tamariki a Amona.

11 E kua tuatua akera aia, I maroiroi to Arama iaku, e tupae mai koe iaku: i maroiroi te tamariki a Amona ia koe, e aere atu ïa au e tupae ia koe na.

12 E akamaroiroi tatou na, e e akaketaketa no to tatou nei au tangata, e te au oire o to tatou Atua: e na Iehova e rave i tei meitaki iaia ra.

13 Kua akavaitata iorā Ioaba e te au tangata i ona ra e tamaki i to Arama: ati atura ratou na mua iaia.

14 Te akara maira te tamariki a Amona e te ati ra to Arama, kua ati katoa oki ratou ki mua ia Abisai, e kua tomo ki roto i te oire. Kua oki mairā Ioaba mei te arumaki anga i te tamariki a Amona, e kua aere maira ki Ierusalema.

15 E kite akera to Arama kua taia ratou i mua ia Iseraela; kua akaputuputu iora ratou.

16 Kua tono akerā Hadarezera e kua arataki maira i to Arama i tetai pae vai ra: e kua aere maira ratou ki Helama; e ko Sobaka te rangatira o te nuku o Hadarezera, tei na mua ia ratou.

17 E kia akakiteia akerā Davida, kua akaputuputu maira aia ia Iseraela ravarai, kua aere iora aia ki tetai pae Ioridana, e tae atura ki Helama. E kua akanoo iora to Arama e tamaki ia Davida, e kua tamaki maira iaia.

18 Ati atura to Arama i mua ia Iseraela: pou iora te au kariota o Arama e itu anere ia Davida, e te au tangata akaoro oroenua oki e a katoa ngauru te tausani, kua ta katoa oki aia ia Sobaka i te rangatira o to ratou nuku, e mate rava akera i reira.

19 E kite akera te au ariki katoa i ouia e Hadarezera e kua taia ratou ki mua ia Iseraela, kua akamoeau akera ratou ia Iseraela, e kua riro atura ei tavini no ratou. Mataku akera to Arama kia tauturu akaou i te tamariki a Amona.