Hosea

10 E VINE toro ke Iseraela, te uua maira i tona ua: mei te maata o tona ra ua, kua maata katoa tana ra au atarau; mei tona ra enua i meitaki ra, i anga ai ratou i te au tiki meitaki.

2 Kua ekoko rua to ratou ngakau; ei teianei ratou e akautungaiaʼi: nana e vavaʼi i ta ratou au atarau ki raro, nana e akapou i to ratou au tiki.

3 Te tuatua ra ratou i teianei, Kare o tatou ariki, no te mea kare tatou i mataku ia Iehova; e akapeea mai oki te ariki ia tatou nei?

4 Kua tuatua ratou i te tuatua puapinga kore, i te taputou pikikaa anga, i te papau anga i te koreromotu ra: e te tupu nei te utunga mei te ngangaere kavangu i roto i te arote anga o te kainga ra.

5 No te au punua puakatoro i Bete-avene e mataku ei tei noo i Samaria ra: ko tona uaorai oki au tangata te ka aue iaia, e tona kau taunga katoa ra te ka rere aere ua ra, i te kakā o te reira, no te mea kua riro ke atu iaia ra.

6 E apaiia oki aia uaorai ki Asura, ei apinga na te ariki ra na te ekai: ko te akama te ka rauka ia Epheraima, a akama oki Iseraela i tana uaorai akakoro anga.

7 Kareka Samaria ra, kua tipu keia tona ariki; mei te uka aia i runga i te kiriatai ra.

8 Te au ngai teitei oki no Avena, te ara a Iseraela, e akapouia ïa e tupu te au rakau taratara e te tataramoa ki runga i ta ratou au atarau; ka tuatua oki ratou ki te au maunga, Tapoki mai ia matou; e ki te au tuaivi, Topa mai ki runga ia matou.

9 Kua ara koe, e Iseraela e, mei te au rā o Gibea mai: te tu ua maira ratou i reira: kare ainei ratou e rokoia e te tamaki i te aronga tuatua-tika kore i Gibea?

10 Kia tairo atu au ia ratou, ko toku ïa inangaro: e putuputu mai oki te au tangata ia ratou, kia tapekaia ratou no nga ara e rua na ratou ra.

11 E puakatoro ua akararataia Epheraima, e mea inangaro nana kia takatakai i te sitona; e aere ra au na runga i tona kaki manea: naku Epheraima e akaoro: na Iuda e arote, e na Iakoba e vavaʼi aere i te vaavaanga one.

12 E ruru i ta kotou uaorai ma te tuatua-tika, ka kokoti ei ma te aroa; ka ko aere i to kotou enua vaoo uaia ra: ko te tuatau oki teia e kimi ia Iehova, kia tae mai aia e akatopa i te ua tuatua-tika ki runga ia kotou.

13 Kua arote kotou i te kino, kua kokoti i te ara; kua kai kotou i te ua pikikaa: no te mea kua irinaki koe i toou aerenga, i te maata o toou au tangata ririnui.

14 E tupu oki te oripu ua i roto i toou ra au tangata, e toou au punanga ravarai, e pou ïa, mei Bete-arebela i pou ia Salamona i te rā tamaki anga ra: kua tuparuia te metua vaine ki runga i nga tamariki ra:

15 Ka akapera katoa Betela ia kotou no to kotou kino maata: ei te popongi e tipu ke ravaiaʼi te ariki o Iseraela.