Numero

19 KUA tuatua mairā Iehova kia Mose raua ko Aarona, na ko maira,

2 Teia te akonoanga i te ture ta Iehova i tuatua maira, na ko maira, E karanga atu ki te tamariki a Iseraela, e taki mai ratou kia koe i tetai puakatoro ua muramura ra, e te meitaki, e kare e kino ra, i tei kore i tukuia te zugo ki rungao ra: 3 E na korua e apai i taua puakatoro ra ki te taunga kia Eleazara ra, kia taki aia ki vao mai i te puakapa ra, kia taia taua puakatoro ra ki mua i tona aroaro: 4 E na te taunga ra, na Eleazara, e rave i tetai manga toto i taua puakatoro ra ki runga i tona maikaorima, ka pîpî ei i taua toto ra, e kia itu pîpî anga, ki mua tikai i te Are uipaanga ra: 5 E ka taʼuia taua puakatoro ua ra ki mua i tona aroaro; te kiri, e te kiko, e te toto, e te repo, okotai rai taʼunga:

6 E rave oki te taunga i te rakau arezi, te isopa, e te ao muramura, ka titiri ei ki roto i te ai i taʼuiaʼi taua puakatoro ua ra. 7 Ei reira te taunga e orei i ona kakau, ka paî ei i te vai, e i muri ake ka aere aia ki roto i te puakapa, e ka viivii uaʼi taua taunga ra e aiai ua atu.

8 E te tangata i taʼu i taua puakatoro ra, e orei aia i ona kakau i te vai, e paî oki i te vai, ka viivii uaʼi aia e aiai ua atu. 9 E na tetai tangata viivii kore e akaputuputu i te reu o taua puakatoro ua ra, ka vaoo ei i tetai ngai viivii kore ki vao mai i te puakapa ra, e vaoo oki te reira no te vai tamā ra; ei tarangaara ra, na te uipaanga tamariki a Iseraela ra.

10 E te tangata e akaputuputu i taua reu puakatoro ua ra, e orei aia i ona kakau, e ka viivii uaʼi aia e aiai atu. Ei akonoanga vaoo tamou teia na te tamariki a Iseraela, e na te tangata ke i noo i rotopu ia ratou ra.

11 Ko tei akatukia ua atu i te tangata mate ra, ka viivii aia e po itu atu.

12 E tamā aia iaia uaorai ki taua vai ra i te po toru, e te po itu, ka mā atu ei aia; kia kore ra aia e tamā iaia uaorai i te po toru, e te po itu ra, kare aia e mā. 13 Ko tei akatukia atu i te kopapa o te tangata kia mate ra, e kare i tamā iaia uaorai ra, kua akaviivii aia i te puakapa o Iehova; ka tipu keia ïa tangata i Iseraela nei; te viivii ra aia no te mea kare i pîpîia te vai tamā ki rungao iaia, te vai ua ra tona viivii ki rungao iaia.

14 Teia te ture no te tangata kia mate i roto i te puakapa ra; ko te aronga katoa i roto i taua puakapa ra, e tei tomo ua oki ki roto i taua puakapa ra, ka viivii ïa e kia po itu ake.

15 E te au āriki katoa i vaio ua ra, kare e tapoki i tamouia ki rungao ra, ka viivii ïa.

16 E tei akatukia ua atu i te tangata i taia i te koke i te ngai atea ra, e te tangata i mate ra, e te ivi tangata, e te tanumanga tangata ra, ka viivii ïa e kia po itu. 17 Ko tei viivii i te reira ra, e rave ratou i tetai pae i te reu o te puakatoro tarangaara i taʼuia ra, e tuku oki ratou i te vai mapia ki runga, ki roto i tetai āriki: 18 E na tetai tangata viivii kore e rave i te isopa, ka taruku ei ki raro i te vai, ka pîpî ei ki rungao i taua puakapa ra, e ki rungao i te au āriki katoa, e ki rungao i te au tangata i reira ra, e ki rungao i te tangata i akatukia i te ivi ra, e te tangata i taia, e te tangata mate oki, e te tanumanga tangata ra: 19 Ei te po toru taua tangata viivii kore ra e pîpî ei i tei viivii, e ei te po itu oki; e kia tae ki te po itu ra, ka tamā aia iaia uaorai i reira, ka orei i ona kakau, ka paî ei aia i te vai, e ka mā ïa aia kia aiai ake.

20 Ko te tangata ra kia viivii, e kare aia e tamā iaia uaorai, ka tipu keia ïa tangata i te uipaanga nei, no te mea kua akaviivii aia i te ngai-tapu o Iehova ra: kare te vai tamā ra i pîpîia ki rungao iaia; te vai viivii ua ra aia.

21 Ei akonoanga vaoo tamou ïa na ratou, e te tangata i pîpî ki te vai tamā ra, ka orei aia i ona kakau; e te rave ua atu i taua vai tamā ra, ka viivii aia e aiai atu.

22 E tei akatukiaia e taua tangata viivii ra, kua viivii ïa: e te tangata e akatukia ua atu i te reira ra, ka viivii ïa e aiai atu.