Habakuka

1 TE tuatua ta te peroveta ta Habakuka i kite ra.

2 Mei te aa te roa, e Iehova, o toku kapiki anga, e kare koe akarongo mai! o toku kapiki anga, e kare koe akarongo mai! o toku kapiki nui anga tau ia koe i te takinga-kino, e kare koe i akaora?

3 Eaa ra oki koe i akakite mai ei iaku nei i te kino, akara uaʼi koe i te mate nei? te vai nei oki te āru e te rave aroa kore ki mua iaku nei: e te vai nei oki te aronga e akatupu i te karo e te tauetono.

4 No reira i parukauaʼi te ture, kare oki i matere te tuatua tau pikikaa kore ra, no te mea, kua akapini te aronga kino i te aronga tuatua-tika, i matere ei te utunga tatipake.

5 Ka akara ana i rotopu i te au etene, ka akara ana oki, ka itimangamanga rava atu ei; e angaanga oki taku e rave i to kotou nei puke rā, akakite ua atura ia kotou, kare rai kotou e akarongo.

6 I na oki, te akatu nei au i te Kaledea, i te iti-tangata aroa kore e te viviki, ko tei na roto i te pararauare anga o te enua nei i te aere, kia rauka ia ratou te au kainga kare i to ratou ra.

7 E mea rikarika ravaia e te matakuia; nona uaorai tana tuatua-tau e tona teitei.

8 E ngakoikoi maata oki to tana au oroenua i to te au nemera ra, e te viviki oki i to te au luko aiai ra; e oro akanengonengo aere tana au akaoro, e mei te ngai mamao mai tana au akaoro ra; e rere oki ratou mei te aeto e rapurapu ki tana kai kia pou.

9 E tere akaperepere kore anake tona i aere mai ei; mei te maoake te tu o to ratou au mata; e mei te one tana au tuikaa kia akaputuputu mai.

10 E akavaavaa aia i te au ariki, e riro atura te ui ariki ei kata anga nana; e mea takatakata ua nana te au punanga ravarai; e āū oki aia i te one ka rave ei i te reira.

11 Ei reira e rauka iaia te maroiroi ou, ka aere atu ei aia, e ka rave i te ara, i te na ko anga e, Ko taua mana nei nona, ko tona ïa Atua.

12 Kare ainei koe mei tupua roa mai, e Iehova, e taku Atua, e Tei Tapu noku ra? kare matou e mate. E Iehova, kua akono koe i te reira ei akautunga anga atu; akataka oki koe i te reira, e te Mato e, ei ako anga atu.

13 E mata ara kore rava toou, kare e tika kia akara mai i te kino, kare oki e tika ia koe, kia akara mai i te tuatua-tika kore: eaa oki koe i akara mai ei i te aronga āru? e i muteki uaʼi koe kia akapou te tangata kino i tei maata tana tuatua-tika i tana uaorai?

14 E kua akariro koe i te au tangata mei te ika o te tai ra, e mei te au mea totoro aere kare e tutara i runga ia ratou ra?

15 Kua rauka anake ïa iaia i te matau, kua ei ratou ki roto i tana kupenga, e kua akaputuputu ia ratou ki roto i tana kupenga; e rekarekaʼi aia e i akatietie ei.

16 No reira aia i apai i te atinga ki tana kupenga, e kua tutungi i te rakau kakara ki tana uaorai kupenga, no te mea no reira i matauiaʼi tana tuanga, e i matu ei tana kai.

17 No reira ainei i riringiiaʼi tana kupenga? e kore i taporoporo ei aia i te ta ua atu rai i te pa enua?