Mareko

14 E E rua atura po toe e tae ei te pasa ra, e te kai akaopue koreia ra; te kimi ra oki te kau taunga nunui, e te au tata tuatua, i ta ratou ravenga pikikaa iaia, kia rauka aia ia ratou, ka tamate atu ei.

2 Kua na ko ra ratou, Auraka i te rā oroa, ko te oripu aea te tangata.

3 E tei Betania aia, i te kaingakai, i te are o te lepera ra o Simona, kua aere maira tetai vaine ma tetai pia alabata, e manongi narido, e mea apinga maata; vavaʼi ora i te pia, riringi maira ki rungao i tona mimiti.

4 Riri akera tetai pae i roto ia ratou uaorai, na ko akera, Eaa teianei manongi i kaimoumouiaʼi?

5 Naringa i okoia, e rauka mai e toru anere i te denari, e e maata atu oki, kia oronga atu na te putaua. Kua koumuumu iora ratou iaia.

6 Kua karanga aturā Iesu, Vaio atu iaia, eaa kotou i tamanamanata atu ei iaia? e ravenga meitaki tana i rave mai iaku nei.

7 Te noo tamou nei te putaua ki o kotou nei, e kia inangaro ra, e tika ïa kia takinga-meitaki atu: ko au nei ra, kare au e noo tikai ki o kotou.

8 Kua rave aia i te tika iaia nei, kua aere takere mai aia e akamainu i toku kopapa nei, no toku tanumanga.

9 Koia mou taku e karanga atu kia kotou nei, Te au ngai katoa e tuatuaiaʼi teianei evangelia i te ao katoa nei, e tuatua katoaia ta teianei vaine i rave nei, ei manako anga atu iaia.

10 Aere atura tetai o te tino ngauru ana rua ra, ko Iuda Ikariota, i te kau taunga nunui ra, kia tuku aia iaia kia ratou.

11 E kite akera ratou, rekareka atura, akatau iora e, e o mai i te moni nana. Kua kimi atura aia i tana ravenga e tau kia tuku mai aia iaia.

12 E tae akera i te rā mua o te kai akaopue koreia ra, e ko ei i te pasa ra, kua na ko maira tana au pipi kiaia, E aere matou kiea e akonokono ei i te pasa kia kai koe?

13 Kua tono atura aia i e toko rua puke pipi ana ra, na ko atura kia raua, Ka aere korua i te oire ra, e e aravei mai tetai tangata ia korua, te apai ra i te āriki vai; aru atu korua iaia.

14 E i te ngai i tomoia atu e ia ra, e karanga atu korua i te pu o te are, Te ui maira te Orometua, Teiea te pia manuiri, kia kai au i te pasa e taku au pipi katoa?

15 E nana e akakite mai ia korua i tetai pia maata, tei runga, kua manea takere: ei reira akonkono ei na tatou.

16 Aere atura aua nga pipi ana ra ki roto i te oire, e koia tika atura tana i tuatua mai kia raua ra; kua akonokono iora raua i te pasa.

17 E aiai atura, kua aere maira aia e te tino ngauru ma rua ra.

18 Te noo ra ratou, e te kaikai ra, kua karanga aturā Iesu, Koia mou taku e karanga atu kia kotou nei, ka riro tetai o kotou nei, e kai katoa i ta tatou kaingakai nei, i te pikikaa mai iaku.

19 Tupu atura to ratou taitaia, e kua ui tataki tai maira ratou katoa kiaia, Ko au ainei? e kua pera rai tetai, Ko au ainei?

20 Kua karanga atura aia kia ratou, na ko atura, No te tino ngauru ma rua nei, ko tei tutou kapipiti o maua rima ki roto i te kapu nei.

21 Te aere nei rai oki te Tamaiti a te tangata nei mei tei tataia nona ra: ko taua tangata ra e pikikaa mai i te Tamaiti a te tangata nei, e ae oki aia! e ngari ake te reira tangata naringa kare i anau mai.

22 E te kaikai ra ratou, kua rave iorā Iesu i te manga, kua akameitaki atura, vavaʼi iora, tuku atura kia ratou ra, na ko atura, Ka rave, ka kai; ko toku kopapa teia.

23 Kua rave iora aia i te kapu, e oti akera i te akameitaki, tuku atura kia ratou ra, kua inu iora ratou ravarai.

24 Kua na ko atura aia kia ratou, Ko toku toto teia, no te koreromotu ou ra, tei akamaringiia no te tangata e manganui.

25 Koia mou taku e karanga atu kia kotou nei, Kare rava au e inu akaou i to roto i te ua vine nei, e tae ua atu ki te rā e inu ei au i te wina ou i te basileia o te Atua ra.

26 E oti akera te imene, aere atura ratou ki vao i te maunga ra i Oliveta.

27 Kua karanga aturā Iesu kia ratou, Ei teianei po e maitu ei kotou katoa iaku nei: kua oti oki i te tataia e, “E pāpā au i te tiaki, e ka pueurikiriki ke oki te mamoe.”

28 E kia tu akaou mai au ra, e na mua au ia kotou i te aere ki Galilea.

29 Kua tuatua mairā Petero kiaia i reira ra, Kia maitu te tangata katoa ia koe, kare takiri au nei.

30 Kua na ko aturā Iesu kiaia, Koia mou taku e karanga atu kia koe, Akonei tikai, ei teianei po, kare e tae ki te rua o te kakaoa anga moa, kua tu toru oou uuna anga iaku.

31 Kua tuatua viviki ua maira aia, Mate ua atu au ia koe na, kare rava ïa au e uuna ia koe. Kua pera maira oki ratou ravarai.

32 E tae atura ratou ki tetai ngai, ko Getesemane te ingoa, kua tuatua maira aia ki tana au pipi, E noo kotou i ko nei, kia pure au.

33 Kua arataki katoa atura aia ia Petero, ia Iakobo, e ia Ioane, rokoia iora aia e te rikarika, e te teiaa tukituki.

34 Kua tuatua maira aia kia ratou, Kua pini rava toku vaerua i te mamae mate maata: ka noo kotou i ko nei, e ara.

35 Aere atura aia ki mua itio, tipapa iora ki raro i te one, pure iora e, kia tika ra, kia akaoraia aia i te reira ora.

36 Kua na ko atura, E Aba, e taku Metua, e tika te au mea katoa ia koe; e taoi ke atu i teianei kapu; kia tupu ra toou anoano; auraka toku.

37 Kua oki maira aia, e rokoia maira, te moe ra ratou, kua na ko maira kia Petero, E Simona, te moe na koe? kare e tika kia ara koe i te ora iti okotai?

38 E ara, e pure, kia kore kotou e rokoia e te timataanga: kua tika oki i te vaerua, te parukaua nei ra te kopapa.

39 Kua aere akaou atura aia, e pure, okotai rai oki pure.

40 E kia oki akaou mai aia ra, rokoia maira, te moe rai ratou, (i teimaa oki to ratou mata,) kare rava a ratou e tuatua kia tuatua mai kiaia ra.

41 Kua oki maira oki aia, ko te tu toru ïa, kua na ko maira kia ratou, Ka moe ra, e kia anga marie te roi; oti ra ua, kua tae ki te ora; i na, kua tukuia te Tamaiti a te tangata nei ki te rima o te aronga ara.

42 Ka tu, e taki aere tatou: i na, te vaitata mai nei te pikikaa mai iaku nei.

43 E i reira ra, kare i oti taua tuatua nana ra, ko Iuda, tetai o te tino ngauru ma rua ra, kua aere maira ma te urupu tangata maata oki, ma te koke e te rakau no ko mai i te kau taunga nunui ra, e te au tata tuatua, e te aronga pakari ra.

44 Kua tuku ana oki taua pikikaa ra i te akairo ia ratou, na ko atura, Ko te tangata taku o ongi atura koia ïa; ka opu atu iaia, ka arataki marie atu ei.

45 E tei te tae mai anga aia ra, aere atura kiaia, na ko atura, E Rabi, Rabi; kua ongi atura oki iaia.

46 Kua rave maira to ratou rima iaia, opu maira.

47 Kua unui akera tetai o ratou i tu i vaitatao i te koke, tapotu atura i te tavini o te taunga maata ra, motu ke atura tona taringa.

48 Kua karanga aturā Iesu, na ko atura kia ratou, I aere mai kotou e opu iaku, ma te koke e te rakau, mei te mea e e keia ra?

49 I noo ua na oki au i rotopu ia kotou i te au rā katoa, i te apii anga i roto i te iero, kare kotou i rave mai iaku i reira; kia tupu ra te tuatua i tataia ra e tikaʼi.

50 Kua akaruke iora ratou katoa iaia, oro atura.

51 Kua aru maira tetai tangata ou iaia, ma te kakau pu ki rungao iaia: kua opu maira te au vaeau iaia.

52 Akaruke iora aia i tona kakau, oro ua atura ma te kakau kore.

53 Kua arataki atura ratou ia Iesu ki te taunga maata ra: kua putuputu oki te kau taunga nunui katoa, e te aronga pakari ra, e te au tata tuatua i reira.

54 Kua aru aturā Petero iaia i muri roa, e tae atura ki te koro o te taunga maata ra, noo iora e te aronga tavini katoa, e murumuru iaia orai i te ai.

55 Te kimi ra oki te kau taunga nunui ra, e te Sunederi katoa ra, i te kite ia Iesu, kia akaapa atu iaia kia mate; kare ra i kitea.

56 E manganui oki tei tuku mai i te tuatua pikikaa iaia ra, kare ra ta ratou tuatua i tika.

57 Kua tu akera ki runga e tokotai, kua tuku maira i te tuatua pikikaa iaia, na ko maira,

58 Kua kite matou iaia i te tuatua anga e, E vavaʼi au i teianei nao i angaia e te rima tangata nei, e kia po toru anake, kua akatu akaou au i tetai, tei kore i angaia e te rima.

59 Kare katoa ta ratou tuatua i tika i reira.

60 Kua tu akera te taunga maata ra i rotopu, e kua ui ia Iesu, na ko maira, Kare koe e tuatua mai? eaa ta nga tangata nei i tapepe mai ia koe nei?

61 Te muteki ua ra aia, kare i ki ua atu. Kua ui akaou maira te taunga maata, na ko maira kiaia, Ko te Mesia aina koe, te Tamaiti a te Meitaki ra?

62 Kua karanga aturā Iesu. Ko au ïa; ka kite oki kotou i te Tamaiti a te tangata i te noo anga i te rima katau o Tei mana ra, e te aere anga mai na runga i te tiao rangi.

63 Kua aae atura taua taunga maata ra i tona kakau, kua na ko atura, Eaa ua atu rai to tatou kite?

64 Kua kite akenei kotou i te akakino Atua nei: eaa to kotou na manako? Kua tuatua akaapa maira ratou ravarai iaia, ka tau iaia te mate.

65 Kua tutua atura etai pae i te uavare ki rungao iaia, e i akapuroku maira etai i tona mata, moto atura, na ko atura, Ka akakite mai ana i tei moto ia koe na: papaki atura oki te au tavini iaia i to ratou kapu-rima.

66 E te noo ua rā Petero ki raro i roto i te koro, kua aere maira tetai tavini vaine no taua taunga maata ra:

67 E kite atura aia ia Petero i te murumuru anga iaia orai, kua tiroi matariki atura iaia, na ko atura, I reira katoa oki koe ia Iesu i Nazareta ra.

68 Kua uuna iora aia, na ko maira, Kare au i kite, kare katoa oki au i kite i taau i tuatua mai na. Aere atura aia ki vao i te tomoanga ra; e kua kakaoa iora te moa.

69 Kua akara akaou atura tetai tavini vaine iaia, kua tuatua akera ki te aronga i tu i vaitatao ra, No ratou teianei tangata.

70 Kua uuna akaou iora aia. E roa iti akera, kua tuatua maira te aronga i tu i vaitata ra ia Petero, Koia tika rai no ratou koe nei; e tangata Galilea oki koe, te tau ra oki toou reo.

71 Kua tao iora aia i reira ra, ma te taputou, Kare takiri au i kite i teianei tangata ta kotou i tuatua na.

72 Kua kakaoa iora te moa, ko te rua ïa o te kakaoa anga. Kua manako akerā Petero i ta Iesu i tuatua mai kiaia ra e, Kare e tae i te rua o te kakaoa anga moa, kua tu toru oou uuna anga iaku. Maara akera aia i te reira, aue iora.