Luka

8 E MURI akera, aere atura aia na roto i te au oire, e te au vila katoa, i te tutu aere anga i te tuatua meitaki i te basileia o te Atua: koia e te tino ngauru ma rua katoa.

2 E te au vaine oki i akaoraia te vaerua kino e te maki, ko Maria, i tuatuaia no Magadala, no roto iaia nga demoni toko itu ra,

3 E ko Ioana te vaine na Kuza, te akaaere no Heroda, e ko Susana, e e puke vaine ke oki e manganui, ko tei matuapuru mai ïa iaia i to ratou apinga.

4 E kia putuputu mai te tangata tini e manganui, e no roto i te au oire katoa i te aere anga mai kiaia ra, kua tuatua parabole atura aia kia ratou:

5 Aere atura te ruru ua, e ruru i tana ua; e tei te ruru anga, topa iora tetai pae i te pae arataa; e takatakaiia iora, e kaingaia iora e te manu o te reva.

6 Topa iora tetai pae ki runga i te ngai paikea; e tei te tupu anga ra, mae atura, no te mea kare i mauu.

7 Topa iora tetai pae ki roto i te ngangaere; tupu katoa atura te ngangaere, pokia atura.

8 Topa iora oki tetai pae ki te ngai one meitaki, tupu akera, e uua atura, taki tai anere i te ua okotai. Oti akera taua au mea nei i te tuatuaia e ia, kua kapiki atura, E taringa tona ei akarongo anga, e akarongo aia.

9 Kua ui maira tana au pipi kiaia, na ko maira, Eaa tikai tenana parabole?

10 Kua karanga atura aia, Kua orongaia mai te kite ia kotou i te tuatua ngaro o te basileia o te Atua; kareka i tetai papaki, i te tuatua parabole; kia kore ratou e utoa i te akara anga, e kia kore ratou e kite i te akarongo anga.

11 Teia taua parabole nei; Te ua nei, koia te tuatua a te Atua.

12 To te pae arataa ra, koia te aronga e akarongo ua; e kua aere maira te diabolo, e kua rave ke atura i te tuatua i roto i to ratou ngakau ra, ko te akarongo aea ratou, e ko te ora aea.

13 To te ngai paikea ra, koia te āriki i te tuatua ma te rekareka kia akarongo ra; no te mea ra kare i akaia i roto ia ratou, kare to ratou akarongo e roa, kia rokoia e te timataanga ra, taka ke atura.

14 To te ngai ngangaere ra, koia te aronga kia oti i te akarongo ka aere atu ei, pokia atura te tuatua i te peu tini o teianei ao e te apinga, e te au mea e navenave ei ra, i kore ei i ua mai i te ua meitaki.

15 Kareka to te ngai one meitaki, koia te aronga e akarongo i te tuatua, tāpu piri tikai ki roto i te ngakau pikikaa kore e te tau, e e tika i te uua anga i te ua.

16 Kare rava e tangata e tutungi i te lamepa, ka tapoki ei ki tetai kapu, e ka momono ei ki raro ake i te roi; kia tukuia ra ki runga i te vairanga, kia kite te aronga e tomo mai i te mārama.

17 Kare rava e mea ngaro e kore e akakiteia; kare oki e mea i uunaia mai, e kore e kitea, e e vavaria katoa oki.

18 E tenana, e matakite i to kotou akarongo anga: ko tei puapingaia ra, e orongaia atu rai tana; e kare ana ra, e rave keia ïa tana.

19 Kua aere maira tona metua vaine kiaia e tona ai taeake, e kare akera i vaitata mai kiaia i te kononinoni o te tangata.

20 E tuatuaia maira aia, kua na koia maira, Te tu ua maira to metua vaine, e to ai taeake, ki vao, i inangaro mai kia kite ia koe.

21 Kua tuatua maira na kia ratou, na ko maira, Tera toku metua vaine, e toku ai taeake, ko tei akarongo e kua akono i te tuatua a te Atua.

22 E tae akera ki tetai rā, aere atura aia ma tana au pipi ki runga i tetai pai, kua karanga atura aia kia ratou, E akatere tatou ki tera pae roto. Tuku atura ratou.

23 Te tere atura ratou, kua varea atura aia e te moe: kua tupu maira tetai matangi uriia i taua roto ra; kua ki rava te pai i te tai, me mate oki ratou.

24 Kua aere atura ratou, e akaara iaia, na ko atura, E te Atu, e te Atu, kua mate matou. Tu akera aia ki runga, kauvae atura i te matangi e te tikitiki anga o te kare; e kore akera, marino atura.

25 Kua karanga atura aia kia ratou, Teiea ra to kotou akarongo? Mataku akera ratou, umere atura, na ko iora ratou ratou uaorai, Koai teia? te tuatua ua ra oki aia ki te matangi nei e te tai, e kua akarongo mai ia iaia.

26 E tae atura ratou ki te enua o to Gadara, i anga tika ki Galilea.

27 E tae atura aia ki uta, kua aravei maira iaia tetai tangata no taua oire ra, i uru takereia ana aia e te au demoni, kare e kakau i te kakau, kare e noo ki roto i te are, i roto ra i te au tanumanga tupapaku ra.

28 E kite akera aia ia Iesu, kua kapiki ua maira, akatopa iora iaia uaorai ki raro ki mua iaia, e kua na ko maira ma te reo maata, Eaa taau iaku nei, e Iesu, e te Tamaiti a te Atua teitei? Te pati atu nei au kia koe e, auraka koe e akamamae iaku.

29 I tuatua ana oki aia ki te vaerua viivii i roto i taua tangata ra e aere mai ki vao. E manganui akera tona opukinga angaia mai: e kia tapekaia aia ki te tapeka, e te auri pirianganaoa; atiati takiri rava akera iaia te ruru, e tuaruia aia e te demoni ki te medebara.

30 Kua ui aturā Iesu kiaia, na ko atura, Koai toou ingoa? Kua na ko maira aia, Ko Manotini; no te mea e manganui oki te demoni i o ki roto iaia.

31 E kua pati maira ratou kiaia, auraka aia e akaue ia ratou e aere ki te po.

32 E anana puaka maata tei reira, i te kai anga i te kai, i runga i te maunga: kua pati maira ratou kiaia, e tuku aia ia ratou kia tomo ua ana ki roto ia ratou. E kua tuku ua atura aia ia ratou.

33 Aere atura te au demoni ra ki vao i taua tangata ra, tomo atura ki roto i te au puaka: e oro viviki ua atura taua anana ra na te mato, e raro rava i taua roto ra maremo atura.

34 E kite akera te aronga angai i taua mea ra, ati iora, e oro atura, e akakite aere ki roto i te oire e te au kainga katoa.

35 Tei vao maira to te oire e akara i taua mea ra; e tae maira kia Iesu ra, kite akera te tangata no roto iaia te au demoni ra, i te noo anga i te vaevae o Iesu, kua kakau i te kakau, e ma tona ngakau tikai; mataku akera ratou:

36 Kua akakiteia ra ratou e te aronga i kite i te tu o te akaora angaia o taua tangata demoni ra.

37 Kua pati maira te tangata tini ravarai o taua pae enua i Gadara ra kiaia e aere ke; kua rokoia oki ratou e te mataku maata. Aere akaou maira aia ki runga i te pai, oki maira.

38 Kua pati ua maira taua tangata no roto iaia te au demoni ra, ei vaitata katoao aia iaia; kua akaoki atura rā Iesu iaia, na ko atura,

39 Ka oki ki toou ngutuare, e akakite atu i te maata o ta te Atua ravenga kia koe na. Aere atura aia, akakite atura, e pini ua ake taua oire ra, i te maata o ta Iesu ravenga kiaia.

40 E tapae mairā Iesu ra, kite maira te tangata tini iaia, te tapapa anake ra ratou iaia.

41 E i na, kua aere maira tetai tangata ko Iairo te ingoa, e tutara no te sunago, e tuturi maira aia ki raro i mua ia Iesu, tuatua meitaki maira e aere ki roto i tona are:

42 E tamaine anau tai oki tana, okotai ngauru ma rua ona mataiti, kua vaitata i te mate rava. Kia aere rā Iesu, ototitotiia maira aia e te tangata.

43 Kua aere maira tetai vaine na muri mai iaia, raungauru ma rua ona mataiti i te mate ua anga i te atekeria, e ope rava tona apinga i te aronga i rapakau, kare rava i ora ia ratou,

44 Kua akatukia maira i tona tapa kakau; e mao iora tona atekeria i reira.

45 Kua tuatua akerā Iesu, Koai ra tei akatukia mai iaku nei? E uuna anake iora ratou, kua karanga aturā Petero ma, E te Orometua, e ui mai oki koe e, Koai tei akatukia mai iaku? eaa ïa mea i uiiaʼi, i teianei urupu anga tangata i kononinoni mai ia koe nei?

46 Kua tuatua mairā Iesu, Kua akatukia mai tetai iaku; kua kite oki au e, e mana tei riro atu na no ko nei atu iaku nei.

47 E kite akera tana vaine ra e, kare aia i ngaro, kua aere maira aia ma te rutetetete, akatopa ua maira aia ki raro i mua iaia, akakite ua maira, i mua i te aroaro o te tangata ravarai, i te mea i akatukia mai ei aia iaia, e kua ora rava aia i reira.

48 Kua karanga atura aia kiaia, E akamaroiroi, e maine: kua ora koe i toou akarongo, kia ora koe i toou aerenga.

49 E te tuatua ua ra aia, kua aere maira tetai, mei ko i te tutara o te sunago ra, kua tuatua maira, Kua mate rava to tamaine; auraka e tamanamanata i te Orometua.

50 Te akarongo atura rā Iesu i taua tuatua ra, kua karanga atura kia Iairo, na ko atura, Auraka e ngarangara, e akarongo ua mai, ka ora ïa aia.

51 E tae atura aia ki te ngutuare, kare rava e tangata i tukuia e ia ki roto, mari ra ko Petero, e ko Iakobo, e ko Ioane, e te metua tane ma te metua vaine o taua tamaine ra.

52 Te aue ra ratou ravarai iaia, e te tangi ra; kua karanga atura aia, Auraka e tangi; kare aia i mate, kua moe ra.

53 Kua taitoito maira ratou, kua kite oki ratou e kua mate aia.

54 Kua tuku atura aia ia ratou ravarai ki vao, kua rave atura i tona rima, kua kapiki atura, na ko atura, E maine, ka tu.

55 Kua oki maira tona vaerua, kua tu maira aia ki runga i reira; kua karanga atura aia i te kai e apai mai nana.

56 Va ua atura nga metua nona ra: kua ako atura aia ia raua e, auraka rava e akakite ki te tangata i taua mea ra.