1 Korinetia

16 E TEIANEI, i te tuatua i te apinga uipa na te aronga tapu ra, ko taku rai oki i poroaki i te au ekalesia i Galatia ra, e pera katoa kotou.

2 Kia tae ki te rā mua o te ebedoma ra, e vaio ake kotou ravarai i tetai papaki moni ki roto i te vairanga ra, kia tau i ta te Atua akamanuia anga mai iaia ra; e kia tae atu au ra, eiaa ei akaputu anga apinga i reira.

3 E kia tae atu au ra, ko tei tau ia kotou, ko taku ïa e tono ma te leta ei apai i ta kotou apinga oronga ua ki Ierusalema.

4 E ko au katoa te aere e tikaʼi, e aere katoa ïa au ma ratou katoa.

5 E aere atu oki au ia kotou na, kia kako ana iaku Makedonia: (te aere nei oki au na Makedonia.)

6 E e riro paa au i te noo ki o kotou, e kia topa atu te paroro ra, e kia tae au ia kotou ki taku ngai e ka aere ra.

7 Kare oki au e kite tapae ua ia kotou i teianei, te inangaro nei oki au kia roa ake toku noo anga ki o kotou na, kia tika i te Atu ra.

8 E noo ra au i Ephesia e kia tae ki te Penetekose ra.

9 E ngutupa maata e te meitaki tei kiritiia iaku nei: manganui ra te enemi.

10 Kia tae atu a Timoteo, e akono marie kotou kia noo aia ki rotopu ia kotou ma te mataku kore; te rave ra oki aia i te angaanga a te Atu, mei iaku katoa nei.

11 Eiaa rava tetai tangata e akavaavaa iaia: e arataki maira iaia i tona aerenga ma te au, kia tae mai aia kiaku nei: te tatari nei oki au iaia e te au taeake katoa ra.

12 Kareka taku taeake nei ko Apolo, kua tuatua marie atu au iaia, kia aere atu aia e te au taeake katoa kia kotou na: kare ra aia i inangaro i te aere atu i teianei, e tae atura aia kia tae ki te rā e tau ei ra.

13 Kia matakite; kia mou piri tikai te akarongo; e akatangata pakari kotou; e akamaroiroi.

14 Kia raveia te au mea ravarai i roto ia kotou na, ma te aroa.

15 Te ako atu nei au ia kotou, e aku au taeake: (kua kite atu kotou i te kopu-tangata o Setephana ra, ko te ua momua ïa ratou i Akaia na, e kua akamātau i te matuapuru i te aronga tapu:)

16 Kia kauraro marie kotou i te reira, e te aronga katoa i tau mai, tei rave katoa i te angaanga ra.

17 Te reka nei au ia Setephana i tae mai, e ia Foratunato, e ia Akaiko: no te mea kua tika tei toe ia kotou na ia ratou.

18 E kua akapumaana mai ratou i toku ngakau e to kotou katoa oki: e teianei, e kite meitaki atu kotou i te tangata mei te reira te tu.

19 Te aroa atu nei te au ekalesia i Asia nei ia kotou. Te rai nei to Akuila raua ko Perisila aroa ia kotou i te Atu nei, e to te ekalesia i roto i to raua are.

20 Te aroa atu nei te au taeake katoa ia kotou. E aroa katoa kotou ia kotou uaorai ma te ongi tapu ra.

21 Ko toku oki teia aroa to Paulo, na toku uaorai rima i tata.

22 Te tangata kare i inangaro i te Atu ra ia Iesu Mesia, kia riro aia ei mea taumaaia. Marana-ata.

23 Kia vai te aroa ua o te Atu ra o Iesu Mesia ia kotou na.

24 Kia vai rai toku aroa ia kotou katoa i roto i te Mesia ra ia Iesu. Amene.