2 Samuela

18 KUA tatau iorā Davida i te au tangata ki ona ra, e kua tuku akera aia i te rangatira tausani, e te rangatira anere, ki runga ia ratou.

2 Kua tuku aturā Davida i te toru o te tuanga o taua au tangata ra i te rima o Ioaba, e tetai tuanga ei te rima ïa o Abisai te tamaiti a Zeruia ra e taeake no Ioaba, e tetai tuanga ei te rima ïa o Itai i Gata ra. Kua tuatua maira te ariki ki te au tangata ra, E aere katoa au nei.

3 Kua karanga atura te au tangata ra, Auraka koe e tae: kia ati matou ra, kare ratou e akono mai ia matou; e pou ua atu te afa o matou i te mate, kare rai ratou e akono mai: okotai ngauru ua atu te tausani o matou nei kia mate, ko koe ra auraka kia mate: e teianei tera te meitaki, e tauturu mai koe ia matou no roto i te oire na.

4 Kua tuatua maira te ariki kia ratou, Ko tei tika ia kotou ra, ko taku ïa, Kua tu ua iora te ariki i te pae o te ngutupa ra, e kua aere anake maira te tangata ki vao e anere iora, e tausani iora.

5 Kua akaue maira te ariki ia Ioaba, e ia Abisai, e ia Itai, na ko maira, E akaperepere ana kotou i taua tangata ou ra ia Abasaloma iaku nei. Kua rongo te tangata ravarai i taua ikuiku anga a te ariki ra ki te au rangatira katoa ia Abasaloma ra.

6 Kua aere atura te tangata ki te ngai atea e tamaki ia Iseraela; riro atura te tamaki anga i roto i te vaorakau i Epheraima;

7 Taia iora to Iseraela i reira ki mua i te aroaro o te au tavini o Davida; e pou maata tei reira i taua rā ra, okotai takau i te tausani.

8 Kua raapu oki te tamaki anga i taua au tapere katoa ra e pini ua ake: e maata ua atura tei pou i te vaorakau, i tei po i te koke i taua rā ra.

9 Rokoia uaia iorā Abasaloma e te au tavini o Davida: te noo rā Abasaloma ki runga i tetai mule, aere atura taua mule na raro ake i te au rara rakau mamaata ra, ii akera tona mimiti i runga i taua rakau ra, tautau ua iora aia i rotopu ko te rangi i runga e te one i raro; aere ke atura taua mule i raro ake iaia ra.

10 Kua kite maira tetai tangata e kua akakite ia Ioaba, kua tuatua maira, I na, kua kite au ia Abasalom i te tautau ua anga i runga i tetai rakau ra.

11 Kua karanga aturā Ioaba ki taua tangata i tuatua mai kiaia ra, I na oki koe, kua kite, eaa i kore ei koe i ta atu ei iaia i reira ki raro i te one? Kua oronga atu ïa au i nga sekela ario raungauru naau i reira, e tetai tatua.

12 Kua tuatua maira taua tangata ra kia Ioaba, Rauka ua iaku te au sekela ario e kia okotai ua atu i te tausani ki roto i toku nei rima, kare au e tuku i toku rima e rave ua atu i te tamaiti a te ariki ra, kua rongo oki matou i te ariki i te ikuiku anga mai ia koe, e ia Abisai, e ia Itai, i te karanga anga mai e, Kia matakite auraka tetai e rave kino i taua tangata ou ra ia Abasaloma.

13 Naringa au i akapera i te pikikaa ra, ko au uaorai te tutaki: kare rava e mea ngaro i te ariki, e riro katoa oki koe uaorai i te rave katoa mai iaku.

14 Kua karanga aturā Ioaba, Kua oti ua au i te tavare ia koe na. Kua rave iora i nga tao e toru i tona rima, kua ko atura na roto i te ngakau o Abasaloma, te ora ua ra aia i roto i taua rakau ra.

15 Kua akapini ua maira nga tangata tino ngauru ko tei apai i te taoonga tamaki a Ioaba ra, kua ta iora ia Abasaloma e mate atura.

16 Kua akatangi iorā Ioaba i te pu, kua oki maira te au tangata kare akera i arumaki ia Iseraela: kua tāpu oki a Ioaba i te au tangata ra.

17 Kua rave iora ratou ia Abasaloma, e kua uri atura ki roto i tetai vaarua maata i roto i taua vaorakau ra; e kua uri akera i te au toka ki rungao iaia e utua maata ua atu; ati anake iora Iseraela ki te puakapa, ki tonao, ki tonao.

18 I rave anā Abasaloma, i tona ora anga ra, e kua akatu i tetai menema nona, tei te ngai mataataa a te ariki ra; kua tuatua akera oki aia, Kare oki aku e tamaiti ei akamou i toku nei ingoa: tapaia iora taua menema ra i tona uaorai ingoa: te tuatuaia nei oki i teianei rā, Ko te menema o Abasaloma ra.

19 Kua tuatua mairā Ahimaaza te tamaiti a Zadoka ra, E tuku ake koe iaku, e oro ana au, e apai i te tuatua ki te ariki ra, e kua tutaki mai a Iehova i tona au enemi.

20 Kua karanga aturā Ioaba kiaia, Auraka koe e apai i te tuatua i teianei rā, kia tae ra ki tetai rā e tika ïa kia apai i te tuatua: auraka ra koe e apai i te tuatua i teianei rā, no te mea kua mate te tamaiti a te ariki ra.

21 Kua karanga aturā Ioaba ki tetai tangata Kusa, Ka aere, ka akakite atu ki te ariki i taau i kite ra. Kua tupou iora te tangata Kusa ki raro ki mua ia Ioaba, e kua oro iora.

22 Kua tuatua akaou mairā Ahimaaza te tamaiti a Zadoka kia Ioaba, E tuku ua ana koe iaku, e aru ana au i te tangata Kusa, e akatika mai koe. Kua karanga aturā Ioaba, E oro oki koe i te aa, e taku tamaiti, kare oki aau e tuatua i rauka?

23 E tuku ua ra koe iaku, e oro ana au. Kua karanga atura aia, Ka oro. Kua oro a Ahimaaza na te ngai mataataa, e kua emo iora te tangata Kusa iaia.

24 Te noo ua rā Davida i rotopu i nga pa e rua ra: tei rungao te tiaki ra i te patu tei taua pa ra i runga akera: kua nānā akera tona mata, kua akara iora, e i na, e tangata te oro ua maira.

25 Kua kapiki atura te tiaki, kua akakite ki te ariki. Kua tuatua maira te ariki, Koia anake ua ra, e tuatua ïa tei tona vaa. Te ngakoikoi maira taua tangata ra, e vaitata rava maira.

26 Kua akara iora te tiaki i tetai tangata te oro maira; kua kapiki atura te tiaki ki te tiaki pa, kua karanga atura, I na, te oro ua maira tetai. E kua tuatua maira te ariki, E tuatua katoa ïa tei iaia.

27 Kua karanga akaou atura taua tiaki ra, Te manako nei au, ko te oro o te tangata i mua ra, e tau ïa ki te oro o Ahimaaza, te tamaiti a Zadoka ra. Kua tuatua maira te ariki, E tangata meitaki ïa, te apai maira i te tuatua meitaki.

28 Kua kapiki aturā Ahimaaza, e kua karanga atura ki te ariki, Kua au! Kua tipapa iora ki raro i te one ki mua i te ariki, kua karanga atura, Kia akameitakiia to Atua ra ko Iehova, ko tei tuku mai i te au tangata i akateitei i to ratou rima i taku pu i te ariki ra.

29 Kua tuatua maira te ariki, Te ora ra te tangata ou ra ko Abasaloma? Kua karanga aturā Ahimaaza, Ka tono mai ei a Ioaba i tetai tavini o te raiki ra e iaku oki to tavini nei, kite atura au e keukeu maata, kare ra au i kite e eaa ra.

30 Kua tuatua maira te ariki, E tapae ake, e tu ua io na. Kua tapae akera aia, kua tu ua iora i reira.

31 E i na, kua tae maira te tangata Kusa; kua tuatua maira te tangata Kusa, E tuatua teia, e taku pu e te ariki e; kua tutaki mai oki a Iehova ia koe i teianei rā i te aronga katoa i tu mai e tamaki ia koe ra.

32 Kua karanga atura te ariki ki te tangata Kusa, Te ora ra te tangata ou ra ko Abasaloma ra? Kua tuatua maira te tangata Kusa, Kia riro ua atu te au enemi o taku pu o te ariki, e te aronga katoa e tu mai e rave kino ia koe, mei taua tangata ou ra te tu.

33 Kua tumatetenga iora te ariki, e kua aere atura ki runga i te pia i runga i te ngutupa ra, aue iora: kua tuatua ua iora i te aere ua anga, Aue koe, e taku tamaiti, e Abasaloma e! e taku tamaiti, e taku tamaiti, e Abasaloma e! naringa ko au tei mate ei tupau ia koe, e Abasaloma, e taku tamaiti, e taku tamaiti e!