Isaia

64 ANGAIRI koe e aae mai i te rangi, ka eke mai ei; kia taʼe mai te au maunga ki raro ki mua i to aroaro na!

2 Mei te vaie rikiriki marō e ka i te ai, mei te vai e pupu i te ai; ei akakite i to ingoa ki to au enemi ra, kia ruketekete te pa enua ki mua i to aroaro ra.

3 Ia koe oki i rave i te au mea mataku ra, kare i manakoia e matou; kua eke maira koe, kua taʼe te au maunga ki raro ki mua i to aroaro na.

4 Mei taito mairai kare i akarongoia, kare i kiteia e te taringa, kare i akaraia e te mata, tetai atua ke mari ra ko koe, i te rave akapera anga na tei tapapa iaia ra.

5 E aravei rai koe i tei rekareka e tei rave i te tuatua-tika; ko ratou tei akamaara ia koe i toou ra au aerenga: i na, kua riri koe, kua ara oki matou: no te reira au mea kare e mutu, ka ora ïa matou.

6 Mei te apinga viivii ra oki matou katoa nei; e ta matou katoa ra tuatua-tika mei te kakau i akarukeia ra; kua mae anake matou mei te rau rakau ra, e kua puia keia akenei matou e ta matou au ara, mei te mea i puia e te matangi ra.

7 Kare rava e tangata e kapiki ki toou ra ingoa, ko tei akamaroiroi iaia uaorai e tāpu ia koe: i uuna ke atu ei koe i to mata ia matou nei, e kua akapou rava koe ia matou i te ririnui i to matou au kino.

8 E tenana ra, e Iehova e, ko koe rai to matou Metua; e karakaraea matou, e ko koe tei anga ia matou; e angaanga anake matou na to rima.

9 Auraka e akaope rava i to riri, e Iehova, auraka oki e akamaara tamou ua mai i to matou kino: i na, ka akara mai na, ta matou ïa tuatua ia koe; e iti-tangata anake oki matou noou.

10 Kua riro to au oire tapu ra ei medebara, kua riro Ziona ei medebara, kua tanea Ierusalema.

11 To matou are tapu e te manea, ta to matou au metua i akamori ia koe i roto ra, kua ka rava ïa i te ai; e te au mea katoa ta matou i inangaro ra, kua pou rava ïa.

12 E noo ua ainei koe i teianei au mea, e Iehova? e muteki ua ainei koe, ka akamaata ua mai ei te mate ki runga ia matou nei?