Exodo

13 KUA tuatua mairā Iehova kia Mose, na ko maira,

2 Ka akatapu ana i te au tama mua katoa ra noku, ko tei anau ana i te kopu katoa o te tamariki a Iseraela nei, ta te tangata, e ta te puaka; noku ïa.

3 Kua karanga aturā Mose ki taua aronga tangata ra, Akamaara kotou i teia rā, i tae mai ei kotou mei Aiphiti mai, mei te ngutuare i tavini ei ra; kua arataki mai oki a Iehova ia kotou mei reira mai i te rima marōrō: auraka roa ei mea akaopueia e kaingaia.

4 I teianei rā i tae mai ei kotou nei i te marama nei ko Abiba.

5 E kia aratakiia koe e Iehova ki te enua o te ngati Kanaana, e te ngati Heta, e te ngati Amori e te ngati Hevi, e te ngati Iebusi ra, i tana i taputou mai i to kotou ai metua ra e, e oronga mai aia noou, e enua taʼe a vai ua te u e te meli, ei reira koe e akono ei i teianei ravenga i teianei rai marama.

6 Kia po itu koe i te kainga i te areto akaopue koreia ra; e te rā itu ra, e rā oroa ïa no Iehova.

7 Ko te areto akaopue koreia ra te ka kaiia e kia po itu ake; auraka roa ei areto akaopueia kia kitea ia koe, auraka oki ei akaopue kia kitea ia koe i toou au ngai katoa ra.

8 E ka akakite koe ki taau tamaiti i taua rā ra, e karanga atu, No ta Iehova ravenga iaku, ka aere mai ei au mei Aiphiti mai, i peraiaʼi.

9 Kia riro taua peu nei ei akairo ia koe i runga i to rima, e ei manakoanga ki mua i to mata, kia vai rai te ture a Iehova i roto i to vaa: i arataki mai ei oki a Iehova ia koe mei Aiphiti mai i te rima marōrō.

10 E teianei, e akono koe i taua akonoanga nei kia tae ki te tuatau tikai, i tera mataiti i tera mataiti.

11 E kia tae koe ia Iehova ki te enua o te ngati Kanaana, i tana i taputou mai kia koe, e ki to ai metua ra, e kua oronga maira kia koe,

12 Ei reira ko e akatakaʼi i te au tama mua ravarai no Iehova, e te anaunga mua katoa a te au puaka ravarai naau ra: no Iehova ïa te au tane.

13 Kareka ta te asini anaunga mua katoa ra, e oko ïa koe i te reira i te punua mamoe, e kia kore e tika ia koe kia oko, e aati koe i te kaki i reira; e te au tama mua tangata ravarai i to au tamariki ra, ka oko rai koe.

14 E kia ui mai to tamaiti kia koe i muri ake, kia tuatua mai e, Eaa teia? ei reira koe e karanga atu ei kiaia, Kua arataki mai a Iehova i to tatou mei Aiphiti mai, mei te ngutuare i tavini ei ra i te rima marōrō:

15 Ia Pharao oki i tuku mamate mai i to tatou ra, kua ta iorā Iehova i te au tama mua ravarai no taua enua ra no Aiphiti, te tama mua tangata ra, e te anaunga mua o te au puaka ra; no reira au i orongaʼi i te anaunga toa mua no te au puaka na Iehova; kareka taku au tamariki tama mua ra, te oko nei au i te reira.

16 Kia riro oki teia ei akairo i runga i to rima, e ei tarae ki mua tikai i to mata; i te rima marōrō oki i arataki mai ei a Iehova i to tatou mei Aiphiti maira.

17 E tukuia iora e Pharao taua aronga tangata ra, kare akera te Atua i arataki ia ratou na te enua o te Philiseti, vaitata uaorai te reira; i tuatua oki te Atua e, Ko te tataraara aea te au tangata nei, me kite ratou i te tamaki, e ko te oki akaou aea ki Aiphiti:

18 Kua arataki ke atura te Atua i taua au tangata ra na te medebara i te Tai Muramura; e aerenga to te tamariki a Iseraela mei to te tangata tamaki ra, mei Aiphiti maira.

19 E kua apai katoā Mose i te au ivi o Iosepha ra; kua akataputou tikai oki aia i te tamariki a Iseraela, kua karanga atu, E atoro mairai te Atua ia kotou; e na kotou e apai katoa i toku nei au ivi ki runga.

20 E mei Sukota oki aere maira ratou, e patia iora i te puakapa i Etama, i te pae o te medebara ra.

21 Kua na mua oki a Iehova ia ratou i te aere, i te ao ra, kua na roto i te pou tumurangi, ei arataki ia ratou na te arataa, e i te po ra, kua na roto i te pou ai, ei turama no ratou; me aere i te ao e i te po katoa:

22 Kare rava aia i apai ke i taua pou tumurangi, i mua i taua aronga, i te ao ra, e taua pou ai, i te po ra.