Iosua

2 I TONO poiri anā Iosua te tamaiti a Nuna ra i e toko rua puke tangata mei Sitima atu, ei tutaka, karanga atura, Ka aere, ka tutaka i taua enua nei e ko Ieriko. E aere atura raua e tomo atura ki roto i te are o tetai vaine akaturi ko Rahaba te ingoa, moe iora i reira.

2 E karangaia atura te ariki o Ieriko, na koia atura, I na, e puke tangata tei aere mai ki roto nei i teianei po, no te tamariki a Iseraela, e tutaka aere i te enua nei.

3 Kua tono atura te ariki o Ieriko i te karere kia Rahaba, karanga atura, Ka arataki mai ana i nga tangata i aere mai kia koe na, ko tei tomo mai ki roto i to are na; i aere mai oki raua e tutaka i te enua katoa nei.

4 Kua rave iora taua vaine ra i aua nga tangata toko rua ra, uuna iora ia raua ra, e kua tuatua maira, E puke tangata rai oki tei aere mai kiaku nei, kareka te ngai no reira mai raua ra, kare ïa au i kite:

5 E te poiri anga io nei, i te topiri anga i te ngutupa nei, aere atura aua nga tangata nei ki vao; kare ra au i kite i ta raua ngai i aere ra: ka tauaru viviki ana, ka rokoia atu ïa e kotou.

6 Kua oti ra raua i te aratakiia e ia ki rungao i te are, e kua tapokiia raua ki te orongā i akapapaia e ia ki rungao i te are ra.

7 Kua aru atura taua au tangata ra ia raua na te arataa e tae atu ei ki Ioridana, ki te ngai e tito atu ei ki tetai pae ra; e riro anake atura te aronga i aru ia raua ra ki vao, topiri atura ratou i te pa.

8 Kare rai raua i moe i aere mai ei aia ki rungao i te are kia raua ra;

9 E kua karanga atura aia ki aua nga tangata ra, Kua kite au e, kua orongaia e Iehova te enua no kotou; e kua rokoia oki matou e te mataku ia kotou, e kua raungara anake oki to te enua nei ia kotou.

10 Kua akarongo ana oki matou e, kua tamarōia e Iehova te Tai Muramura ia kotou, ia kotou i aere mai mei Aiphiti ra; e ta kotou oki ravenga i nga ariki toko rua o te ngati Amori i tetai pae Ioridana ra, ko Sihona, e ko Oga, ko tei pou takiri rava ïa ia kotou ra.

11 Tei to matou rongo anga i taua tuatua ra, ngaevaeva ua io nei to matou ngakau, kare rava e maroiroi i toe ki roto i te tangata katoa ra ia kotou: ko to kotou Atua ra oki ko Iehova, ko te Atua ïa no te rangi i runga ra, e no raro katoa nei no te enua.

12 E teianei, teia taku tuatua kia korua, e taputou korua ia Iehova kiaku, e mei iaku i takinga-meitaki ia korua nei, e takinga-meitaki katoa mai kotou i te ngutuare o toku metua nei; e o mai oki korua i tetai akairo tuatua-mou naku,

13 E e akaora kotou i toku metua tane, e toku metua vaine, e toku ai tungane, e toku ai taeake, e to ratou katoa ra, e akaora oki ia matou kia kore e mate.

14 Kua tuatua maira aua nga tangata ra kiaia, Ko maua uaorai te tutaki ia kotou, kia kore ra kotou e aaki i to maua nei tere: e kia orongaia mai e Iehova te enua nei no matou, ei takinga-meitaki e te tuatua-mou ta matou ia koe i reira.

15 Kua tuku iora aia ia raua ki te taura ki raro i na roto i te māramārama; (tei rungao oki tona are i te patu o te oire, e ki runga i taua patu ra tona nooanga;)

16 Kua karanga atura aia kia raua, E aere korua ki runga i te maunga, ko te aravei mai aea te kimi ia korua; ka pipini korua i reira e kia po toru ake, kia oki mai taua aronga kimi ra; ka aere ei korua ki to korua aerenga i reira.

17 Kua tuatua maira aua nga tangata ra kiaia, Auraka matou kia araia i taua taputou nei taau i tuku mai kia maua kia taputou atu kia koe ra.

18 I na, kia tae mai matou ki te enua nei, e itiki koe i teianei taura muramura ki roto i te māramārama taau i tuku ia maua ki raro ra; e arataki mai oki koe i to metua tane, e to metua vaine, e to ai tungane, e te ngutuare katoa o to metua ra, ki roto i to are nei.

19 Kia tomo ra tetai ki vao mai i te ngutupa o toou nei are ki roto i te arataa, nana uaorai tona mate, kare a matou ara i reira; e kia arapaki ua maira tetai tangata i to roto i te are kia koe nei, ei runga ïa ia matou tona mate.

20 E kia aaki oki koe i taua tere no maua nei, kare maua e ara i reira i taau taputou taau i akataputou mai ia maua nei.

21 Kua karanga atura aia, Kia pera ta korua i tuatua mai na. Kua tuku atura aia ia raua kia aere ana, aere atura raua: kua itiki iora aia i taua taura muramura ra i roto i taua māramārama ra.

22 E aere atura raua, e tae atura ki runga i te maunga, noo iora i reira e po toru akera, e oki anake maira te aronga i kimi ra; e kimi aere oki taua aronga kimi ra na taua ngai katoa i aereia ra, e kare raua i kitea e ratou.

23 Oki maira aua nga tangata toko rua ra, eke maira mei runga mai i taua maunga ra, e tae maira ki tetai pae vai, e aere maira kia Iosua te tamaiti a Nuna ra, e akakite maira kiaia i te au mea katoa i rokoiaʼi raua ra;

24 Tuatua maira raua kia Iosua, Kua oronga tika mairai a Iehova i taua enua katoa ra ki to tatou rima; kua raungara rava te tangata katoa o taua enua ra ia tatou.