Genese

27 E RUAINE akerā Isaaka, e aveave akera tona mata, kare i kite kia akara, e kua karanga atura aia ki tana tama mua kia Esau, na ko atura kiaia, E taku tamaiti. Kua tuatua maira aia kiaia, Teia au.

2 Kua karanga atura aia, I na, kua ruaine au, kare au e kite i te rā e mate ei au:

3 E tenana, teia taku tuatua kia koe, e rave koe i to taoonga ra, i te pia kakao, e te ana naau, e aere koe ki te ngangaere, e kimi i te manu naku;

4 Ka rave ei i te kai kakara naku, taku e kaki nei, ka apai mai ei kiaku nei, kia kai au; kia akameitaki atu au iakoe, ka mate atu ei au.

5 Te akarongo rā Rebeka ia Isaaka, i te tuatua anga atu ki tana tamaiti, kia Esau. E aere aturā Esau ki te ngangaere e kimi i te manu, e e apai mai.

6 E kua karanga aturā Rebeka ki tana tamaiti kia Iakobā, na ko atura, Ina, i akarongo atura au i to metua, i te tuatua anga atu ki toou tuakana kia Esau, i te na ko anga atu e,

7 E apai mai i te manu, e rave i te kai kakara naku, kia kai au, e kia akameitaki atu au ia koe ki mua i te aroaro o Iehova, ka mate atu ei au.

8 E tenana, e taku tamaiti, e akarongo mai koe i toku reo, i taku e akaue atu kia koe:

9 E tiki koe, e rave mai i e rua punua puaka-nio meitaki, no roto i te anana akera; e naku e rave ei kai kakara na to metua, tana e kaki ra:

10 E naau e apai ki to metua ra, kia kai aia, e kai akameitaki mai aia ia koe, ka mate atu ei aia.

11 Kua tuatua mairā Iakoba ki tona metua vaine kia Rebeka, I na oki, taku tuakana ko Esau, e tangata uruuru ïa, e e tangata amore oki au:

12 E riro paa toku metua i te aa mai iaku, e ka riro au mei te pikikaa iaia; ko te taumaa te ka rauka iaku i reira, kare te akameitaki.

13 Kua karanga atura tona metua vaine kiaia, Ei runga iaku taua taumaa naau ra, e taku tamaiti; e akarongo ua mai koe i toku reo, e tiki koe, e apai mai kiaku nei.

14 Aere atura aia e tiki, e kua apai maira ki tona metua vaine ra; e kua rave iora te metua vaine nona ra i te kai kakara, ta tona metua tane e kaki ra.

15 Kua rave iorā Rebeka i te kakau meitaki o tana tama mua o Esau, tei iaia taua kakau ra tei roto i te are, e kua akakakau atura i tana tamaiti openga ra ia Iakoba ki te reira ra:

16 E kua vaî atura i tona rima, e te ngai mania o tona kaki, ki te kiri o nga punua puaka-nio ra:

17 Kua tuku atura aia i taua kai kakara ra, e te areto, tana i rave ra, ki te rima o tana tamaiti o Iakoba.

18 E kua aere atura aia ki tona metua tane ra, na ko atura, E taku metua e. Kua tuatua maira aia, Teia au; koai koe, e taku tamaiti?

19 Kua karanga aturā Iakoba ki tona metua tane, Ko au ko taau tama mua ra ko Esau; kua rave oki au i taau i akaue mai iaku ra; teia taku tuatua, ka noo tu ua mai koe ki runga, e kai i taku manu, kia akameitaki mai koe iaku nei.

20 Kua tuatua mairā Isaaka ki tana tamaiti, I akapeea tikai i rauka vave ei ia koe, e taku tamaiti? Kua karanga atura aia, No te mea, na te Atua noou ra, na Iehova, i apai mai kiaku.

21 Kua tuatua mairā Isaaka kia Iakoba, e Akavaitata mai ana koe, e taku tamaiti, kia aa au ia koe, ko taku tamaiti tikai ainei koe ko Esau, me kare.

22 Kua akavaitata aturā Iakoba ki tona metua kia Isaaka; e kua aa maira aia iaia, na ko maira, Ko te reo ra, e reo ïa no Iakoba, kareka te rima, e rima ïa no Esau.

23 Kare akerai aia i kite iaia, no te mea e rima uruuru tona, mei te rima o tona tuakana o Esau: e kua akameitaki maira aia iaia.

24 Kua tuatua mairai aia, Ko taku tamaiti tikai koe na, ko Esau? Kua karanga atura aia, Ko au ïa.

25 E kua tuatua maira aia, Ka apai mai kia vaitata kiaku nei, e kai au i te manu a taku tamaiti, kia akameitaki atu au ia koe. Kua apai atura aia i vaitata kiaia, e kua kai iora aia; e kua apai atura aia i te wina nana, e kua inu iora aia.

26 Kua tuatua maira tona metua ra ko Isaaka kiaia, E akavaitata mai ana, e ongi mai iaku, e taku tamaiti.

27 E kua akavaitata atura aia kiaia, e ongo atura: e kite akerā Isaaka i te aunga o tona kakau, kua akameitaki maira aia iaia, na ko maira, I na, mei te aunga o te kainga i akameitakiia e Iehova ra, te aunga o taku tamaiti nei:

28 Kia oronga mai te Atua i te au no te rangi mai kia koe, e te meitaki o te enua nei, kia maata oki te sitona, e te wina:

29 Kia kauraro mai te au iti-tangata kia koe, e kia tupou mai te pa enua kia koe; ei pu koe ki rungao i toou au taeake, e kia tatomo mai te tamariki a to metua vaine kia koe. Ko te taumaa mai ia koe ra, kia taumaa katoaia aia; e ko te akameitaki ia koe ra, kia akameitaki katoaia mai aia.

30 E oti akera to Isaaka akameitaki anga mai ia Iakoba, tei te oki anga o Iakoba mei mua mai i te aroaro o tona metua o Isaaka, i tae mai ei tona tuakana ko Esau, mei tona kimi anga manu maira.

31 Kua oti katoa oki tana kai kakara i te raveia e ia, e kua apai maira ki tona metua tane ra, e kua tuatua maira ki tona metua tane, Kia tu mai taku metua, e kai i te manu a tana tamaiti nei, kia akameitaki mai koe iaku nei.

32 E kua karanga atura tona metua tane ra ko Isaaka kiaia, Koai koe na? Kua tuatua maira aia, Ko au ko taau tamaiti, ko taau tama mua ra, ko Esau.

33 Rokoia iorā Isaaka e te mataku maata roa atu, e na ko atura, Koai io nei aia tei kimi i te manu, e kua apai mai i ko nei kiaku nei, e kua kai rai oki au, ou mai nei koe? koia oki taku i akameitaki io nei, e ka akameitakiia oki aia.

34 E rongo akerā Esau i te tuatua a tona metua ra, kua kapiki ua maira i te aue maata, e te mamae, e kua tuatua maira ki tona metua, E akameitaki mai koe iaku, ko au katoa nei, e taku metua.

35 Kua karanga atura aia, Kua aere pikikaa mai toou teina i ko nei, e kua riro kiaia toou meitaki.

36 Kua tuatua maira aia, E tuatua tikaia tona ingoa ko Iakoba, kare ainei? E tu rua akenei ana pikikaa anga mai iaku: i rave oki aia i taku taoonga mataiapo: e i na, kua riro toku meitaki iaia i teianei. E kua tuatua maira aia, Kare aina koe i vaoo i tetai meitaki noku?

37 Kua karanga aturā Isaaka kia Esau, na ko atura, I na, kua akariro au iaia ei pu noou; e tona katoa ra au taeake, kua tukuia ïa e au ki raro ake iaia; kua akangai au iaia i te sitona, e te wina: e tenana, e taku tamaiti, e akapeea atu au ia koe?

38 Kua tuatua mairai a Esau ki tona metua, Okotai ua ra oou meitaki, e taku metua? e akameitaki mai koe iaku, ko au katoa nei, e taku metua. E kua kapiki ua aturā Esau i tona reo ma te aue.

39 Kua karanga atura tona metua ko Isaaka, na ko atura kiaia, I na, ko toou nooanga, ei te meitaki o te enua nei, e te au no te rangi i runga ra.

40 E i taau ra koke ka oraʼi koe, e ei tavini koe no toou teina; te vai atura te tuatau e riro ei te mana kia koe, e aati ei koe i tana zugo i runga i toou kaki na.

41 E kua makitakita iorā Esau ia Iakoba, no te meitaki a tona metua i akameitaki atu iaia ra; e kua na ko akerā Esau i roto i tona ngakau, Kua vaitata te au rā aue anga no toku metua nei, ei reira au e ta ai i toku teina nei ia Iakoba.

42 E i akakiteia mairā Rebeka i te tuatua a tana tama mua ra ko Esau: kua unga atura aia e tiki i tana tamaiti openga ra ia Iakoba, kua karanga atura kiaia, I na, te rekareka ua ra to tuakana ko Esau ia koe, i te akakoro anga e ta ia koe na.

43 E teianei, e taku tamaiti, e akarongo mai koe i toku reo; e tu koe, e oro ki Harana, ki toku tungane ra kia Labana;

44 E noo ua atu ei ki ona i etai rā, kia anga te riri o toou tuakana ra;

45 E kia anga te riri o toou tuakana ia koe, e kia ngaropoina iaia taau i rave io nei iaia ra; ei reira au e tiki atu ei e arataki mai ia koe mei reira: eaa oki au e ngere ei ia korua ravarai i te rā okotai?

46 E kua karanga aturā Rebeka kia Isaaka, Kua potopoto rava toku aʼo, i nga tamaine a Heta nei: kia rave a Iakoba i te vaine no te au tamaine a Heta, mei te au vaine o te enua nei, eaa naku te ora?