2 Paraleipomeno

15 TEI runga maira te Vaerua o te Atua ia Azaria te tamaiti a Odeda:

2 Kua aere atura aia e aravei ia Asa, e kua karanga atura kiaia, E akarongo mai ana iaku, e Asa, e Iuda ravarai ma Beniamina: Tei ia kotou a Iehova, ko kotou i piri mai kiaia ra; kia kimi kotou iaia, ka kitea aia e kotou; kia akaruke ra kotou iaia, ka akaruke aia ia kotou.

3 E manganui oki te rā kare o Iseraela Atua tikai, kare e taunga kia apii mai, kare oki e ture.

4 To ratou ra tumatetenga anga ra, kua ariu ratou ki te Atua o Iseraela kia Iehova, e kua kimi ratou kiaia, kitea iora aia e ratou.

5 Kare oki e au i te reira tuatau, to tei aere ki vao, e to tei aere mai ki roto, e tumatetenga maata to runga i te tangata ravarai o te enua nei.

6 Pou iora tetai enua i tetai enua, e tetai oire i tetai oire: kua tairoia oki ratou e te Atua i te au mate katoa.

7 E akamaroiroi ra kotou, auraka kia parukaua to kotou rima; ka tutakiia oki ta kotou angaanga.

8 E kite akerā Asa i teianei au tuatua, e te totou na te peroveta ra na Odeda, kua akamaroiroi iora aia, e kua apai ke atura i te au idolo viivii no te enua katoa ra no Iuda e no Beniamina, e no te au oire i rauka iaia i te maunga ra i Epheraima, e kua patu akaou iora i te atarau a Iehova ki mua i te tomoanga o te are o Iehova:

9 Kua akaputuputu maira aia ia Iuda katoatoa e ia Beniamina, e te au tangata ke katoa no Epheraima mai, e no Manase, e no Simeona: kua uri ua maira oki ratou kiaia no roto ia Iseraela e manganui, i te kite anga akera ratou e te piri maira tona Atua ko Iehova iaia.

10 Uipa akera ratou i Ierusalema kia tae ki te toru o te marama, i te mataiti okotai ngauru ma rima i te au o Asa.

11 E kua apai atura ratou na Iehova i taua rā ra, e itu anere i te puakatoro, e itu tausani oki i te mamoe, no roto i te apinga noniia e ratou ra.

12 Kua papau iora ratou i te koreromotu e kimi i te Atua o to ratou ai metua ia Iehova, ma to ratou ngakau katoa, e to ratou vaerua katoa;

13 E te tangata ravarai kare e kimi i te Atua o Iseraela ia Iehova ka taia ïa, mei tei iti e tae ua atu ki tei maata, mei te tane e te vaine katoa.

14 Kua taputou atura ratou ma te reo teitei kia Iehova, e ma te maeva, e te au pu tu ke ke oki.

15 Mareka rava akera Iuda katoatoa i taua taputou ra: kua taputou oki ratou ma to ratou ngakau katoa, e kua kimi ratou iaia ma to ratou anoano katoa; e kua kitea oki aia e ratou: e kua oronga mai a Iehova i te au ia ratou e pini ua ake.

16 E ko Maaka te tupuna vaine o te ariki ra o Asa, kua akangere aia iaia i te au, no te mea kua anga aia i tetai idolo no Asetoreta; kua pou akera ia Asa taua idolo nona ra, e kua takatakai atura, e kua taʼu ki te ai i te pae kauvai ra i Kiderona.

17 Kare ra i ope te au ngai teitei i te apai keia i Iseraela: kua tika rava ra te ngakau o Asa e ope rava akera tona au rā.

18 E kua apai maira aia i te au apinga i akatapuia e tona ra metua, e tei akatapuia e ia uaorai, i te ario e te auro, e te au āriki ra, ki roto i te are o te Atua ra.

19 E kare atura e tamaki e tae rava akera ki te mataiti e toru ngauru ma rima i te au o Asa ra.