2 Paraleipomeno

16 E TAE akera ki te mataiti e toru ngauru ma ono o te au o Asa, kua aere maira te ariki o Iseraela ko Baasa e tamaki ia Iuda, e kua patu iora ia Rama, kia kore rava e tangata e tae ki vao, e e aere ki roto ki te ariki o Iuda kia Asa ra.

2 Kua rave mairā Asa i te ario e te auro, no roto i te au apinga i roto i te are o Iehova, e no roto i te are o te ariki, e kua akau atura kia Beneadada ki te ariki o Arama i noo i Damaseko ra, na ko atura,

3 Ei koreromotu ta taua mei ta toku metua e toou ra metua; i na, tera mai te ario e te auro naau: e aere mai, e akaatikau i te koreromotu naau i te ariki o Iseraela ia Baasa, kia aere ke aia iaku nei.

4 Kua akarongo mairā Bene-adada i te ariki ra ia Asa, e kua tono akera aia i te au rangatira o te au nuku nana ra, e tamaki i te au oire i Iseraela, e ta iora ratou ia Iiona, e ia Dana, e ia Abelamaima, e te au oire vairanga apinga katoa i Naphatali:

5 E kite akerā Baasa i te reira, kua kore akera i te patu ia Rama, akapaki akera i tana angaanga.

6 Kua arataki atura te ariki ra ko Asa ia Iuda katoa ra; kua rave akera ratou i te au toka i Rama ra, e te rakau i tei patuia e Baasa ra, kua rave iora i te reira, kua patu iora ia Geba, e Mizepe.

7 I reira to Hanani akara ra aere anga mai ki te ariki no Iuda ra kia Asa, e kua tuatua maira kiaia, No te mea kua irinaki koe i te ariki o Arama ra, kare i irinaki i to Atua ia Iehova, e teianei, kua ora te nuku o te ariki o Arama i to rima na.

8 Kare ainei te nuku maata to Kusa, e to Lubia, e te kariota i te maata, e te aronga akaoro oroenua? No te mea ra kua irinaki koe ia Iehova, kua tuku maira aia ia ratou ki to rima.

9 Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia. E ravenga neneva taau i tenana: e teianei e tamaki rai taau.

10 Riri akerā Asa i taua akara ra, e kua tuku atura iaia ki roto i te are tapekaanga; no taua tuatua nei oki aia i riri ei iaia. Kua takinga-kino maira oki a Asa i tetai papaki i taua au tangata ra i te reira tuatau.

11 E i na, te au tuatua ia Asa, tei muatangana e tae ua atu ki te openga, i na, kua tataia ki roto i te tuatua a te au ariki o Iuda e no Iseraela ra.

12 E tae akera ki te mataiti e toru ngauru ma iva i te au o Asa, kua makiia iora tona vaevae, tupu ua atura tona maki ki runga, kare ra aia i kimi ia Iehova i taua maki nona ra, i te aronga rapakau maki ua ra.

13 Moe iorā Asa ki o tona ra ai metua, mate atura i te a ngauru ma tai o te mataiti o tona ra au.

14 Kua tanu iora ratou iaia i roto i tona uaorai menema i paoia e ia nona uaorai i te oire o Davida, kua tuku iora ratou iaia ki runga i e vairanga, kua oti i te akakiia ki te rakau kakara, e te manongi i tangaakaputuia i te ravenga a te iro-manongi ra; e ai maata ua atu tei ka ia ratou iaia.