Ieremia

2 E KUA tae mairai te tuatua a Iehova kiaku nei, na ko maira,

2 Ka aere, ka kapiki atu i te taringa o to Ierusalema, ka karanga atu, Te na ko mairā Iehova, Te akamaara nei au ia koe, te takinga-meitaki i toou ou anga, te inangaro anga i toou akaipoipo angaia ra, ia koe i aru aere iaku na te medebara ra, na te enua kare i tanumia ra:

3 E mea tapu Iseraela na Iehova i reira, te popo o tana mea tupu ra: ko tei kai i te reira ra, kua ara ïa: kua rokoia ratou e te kino, te tuatua mairā Iehova.

4 E akarongo mai i te tuatua a Iehova, e te ngutuare o Iakoba, e te au kopu-tangata katoatoa o te ngutuare o Iseraela e:

5 Te na ko mairā Iehova, Eaa taku ara i kitea e to kotou au metua iaku nei, e i aru aere ei i te mea puapinga kore, e riro atura ei mea puapinga kore?

6 Kare oki ratou i tuatua e, Teiea a Iehova, i tei arataki mai ia matou mei te enua maira mei Aiphiti; tei arataki ia matou na roto i te enua kai kore, e te ruarua, na roto i te enua marō ka ua, e te maru-mate, na roto i te enua aere koreia e te tangata, e tei kore i nooia e te tangata?

7 I arataki mai oki au ia kotou ki te enua kai maata; kia kai kotou i te kai o te reira, e te meitaki o te reira; e tae maira kotou ki reira ra, viivii iora toku enua ia kotou, e kua akariro atura kotou i taku tuanga ei mea rikarika.

8 Kare te kau taunga i karanga e, Teiea a Iehova? e te aronga i mou i te ture ra, kare i kite mai iaku: kua ara katoa te au tiaki iaku nei, e kua totou te au peroveta ia Baala, e kua aru aere atura i te au mea puapinga kore.

9 E teianei, te tuatua mairā Iehova, E māro atu rai au ia kotou; e te au tamariki a ta kotou au tamariki, taku ïa e māro atu.

10 E aere atura kotou ki te au enua Kitima ra, ka akaraʼi; e tono oki i te karere ki Kedara, ka akamaara tikai e, ka akara, i te kitea anga atu tetai mea mei teia te tu.

11 Kua oko ainei tetai enua i to ratou atua? kare oki ratou i te Atua: kareka toku iti-tangata, kua oko ratou i to ratou kakā i te mea kare ua e puapinga.

12 Kia itimangamanga kotou, e te au rangi e, i taua mea ra, kia koiriria, e kia raungara roa kotou, te tuatua mairā Iehova.

13 No te mea, ka rua akenei ara i raveia e toku iti-tangata nei; kua akaruke akenei ratou iaku, te tumu o te vai ora; e kua pao i te au āriki ngaangaa ïa, kare e mou te vai ki roto.

14 E tavini ainei Iseraela, e anau ainei aia i te ngutuare uaorai? Eaa iora aia i riro ei ei nonianga?

15 Kua ngunguru mai te au liona ou ra ki runga iaia, kua tuku mai i to ratou reo; e kua akataneaia e ratou tona enua: kua taʼu naia tona au oire ki te ai, e kare ua e tangata.

16 Kua pou oki toou take upoko i te au tamariki a Nopha, ma Tahapene.

17 Kare ainei koe i akapera ia koe uaorai ko koe i akaruke i to Atua ra ia Iehova, iaia i arataki ia koe na te arataa?

18 E teianei, eaa taau i te arataa e tae atu ei ki Aiphiti, kia inu i te vai ra ia Sihora? e eaa oki taau i te arataa e tae atu ei ki Asura ra, kia inu i te vai o te kauvai ra?

19 Na toou uaorai kino e ako ia koe, e na taau kotoe anga ki muri e akamura mai ia koe: kia kite mai koe e kia akara e, e mea kino maata, e te mamae, ko koe i akaruke i toou ra Atua ia Iehova; e kare oou mataku iaku nei i roto ia koe na, te tuatua maira te Atu ra ko Iehova Sabaota.

20 Kua aati takere ana koe i taau zugo, e kua motu keia e koe te au tapeka ia koe ra; e kua tuatua koe, Kare au e akarongo atu; kua riro ra koe i runga i te au tuaivi katoa, e i raro ake i te au rakau ruperupe ravarai, i te akaturi aere anga.

21 Kua tanu oki au ia koe ei vine meitaki, ei kopura meitaki tikai: eaa io nei koe i akariroiaʼi iaku nei ei rara kino no tetai vine ke?

22 Orei ua ra koe ia koe uaorai ki te vairakau, e rave atu rai te pua e kia maata, kua akairoia rai toou kino ki mua iaku, te tuatua maira te Atu ra ko Iehova.

23 Eaa e tikaʼi ia koe kia karanga e, Kare oku e viivii: kare au i aru aere i te au Baala? Ka akara ana i toou aerenga ki roto i te o ra; kia kite koe i taau i rave ra: mei te kamela viviki i oro aere i tona au aerenga,

24 Mei te asini momoavao i mātau i te medebara, no tona inangaro i ongiongi ei aia i te matangi; i tona ra tuatau, naai e akaoki mai? kare anake ratou e akaroiroi ia ratou uaorai i te kimi anga atu iaia; i tona ra marama e kitea aia e ratou.

25 Auraka e pa i to vaevae kia kiritiia te tamaka, e to karaponga i te kaki vai: kua tuatua ra koe e, Kare ua e manakonako anga; kare: kua inangaro oki au i te tangata ke ke, e e aru rai au ia ratou.

26 Mei te keia i akama me kitea ra, kua akama katoa te ngutuare o Iseraela; ko ratou, to ratou ui ariki, to ratou ui mataiapo, e to ratou kau taunga, ma to ratou au peroveta:

27 I te tuatua anga atu ki te rakau e, Ko koe toku metua tane; e ki te toka nei, Naau au i anau: kua ariu mai ratou i te tua kiaku, e kare te aro: i te tuatau ra i rokoiaʼi ratou e te tumatetenga, ka tuatua mai ei ratou e, Ka tu koe ki runga, ka akaora ia matou nei.

28 Teiea ra toou au atua taau i anga noou uaorai ra? ko ratou te tu ki runga me tika e akaora ia koe i toou tuatau kino ra; kua aiteite oki toou au atua, e Iuda e, ki toou au oire i te rainga.

29 Eaa kotou e ketaketa mai ei kiaku nei? kua ara anake oki kotou iaku, te tuatua mairā Iehova.

30 E pāpā anga puapinga kore taku i ta kotou au tamariki; kare ua ratou i akarongo mai i te ako: kua pou ta kotou au peroveta i ta kotou uaorai koke, mei te pou liona ra.

31 E tera ra uki tangata e! ka akara mai i te tuatua a Iehova: I riro ainei au ei medebara ia Iseraela? ei enua poiri ainei? eaa oki i tuatua mai ei toku iti-tangata, Tei ia matou te mana, kare matou e oki akaou atu ia koe na!

32 E ngaropoina ainei i te paretenia tana peu akamanea, e te vaine akaipoipo ou tona tatua? kua akangaropoina ra toku iti-tangata iaku, i te au rā kare e ope kia tatau.

33 Eaa koe i akameitaki ei i toou aerenga i te kimi anga i te inangaro? e kua apii katoa koe i te au vaine kino i toou au aerenga.

34 Kua kitea oki ki runga i to tapa kakau te toto o te aronga ao ara kore ra: kare ra i te kimi oonu anga i kitea e au i runga ra i te au mea ravarai.

35 Kua tuatua ra koe e, No te mea kare aku ara e riro aia i te akaanga ke i tona riri iaku nei. I na, e akava atu au ia koe na, no te mea kua tuatua koe e, Kare aku ara.

36 Eaa koe i koka aere uaʼi i te taruri ke anga i toou aerenga? ka akama rai koe ia Aiphiti, mei ia koe i akama ia Asura ra.

37 Koia ïa, ka aere atu koe mei ko nei atu ma nga rima oou ki runga i toou mimiti: kua akarukeia oki e Iehova taau i irinaki na, e kare koe e manuia ia ratou.