2 Samuela
2 E I MURI ake i te reira, kua ui aturā Davida kia Iehova, na ko atura, E aere ainei au ki tetai i te au oire o Iuda nei? Kua tuatua mairā Iehova kiaia, Ka aere ki runga. E kua ui aturā Davida, E aere tika au kiea? Kua tuatua maira aia, Ei Heberona.
2 Aere aturā Davida ki reira, e nga vaine katoa nana toko rua, ko te Iezereela ko Ahinoama, e ko Abigaila te vaine a Nabala i Karamela ra.
3 E te au tangata katoa nona, ta Davida i arataki katoa ki runga, ko te tangata ko tona katoa ra kopu tangata: noo iora ratou i te au oire ra i Heberona.
4 E kua aere maira te au tangata no Iuda, kua akatainu iora ratou ia Davida i reira, ei ariki no runga i te ngutuare o Iuda ra. Kua akakite maira ratou kia Davida, tuatua maira, To Iabesa-gileada tei tanu ia Saula ra.
5 Kua tono aturā Davida i te au karere ki te au tangata no Iabesa-gileada; e kua karanga atura kia ratou, Kia akameitakiia mai kotou e Iehova, i tei akapera i te takinga-meitaki i to kotou pu ia Saula, e kua tanu oki kotou iaia.
6 E teianei kia akakite mai a Iehova i te takinga-meitaki, e te tuatua-mou kia kotou: e naku oki e tutaki ia kotou i teianei takinga-meitaki, no te mea kua pera akenei oki kotou na.
7 E tenana kia etaeta to kotou rima, e kia maroiroi kotou: no te mea kua mate akenei to kotou pu ko Saula, e kua akatainu oki te ngutuare o Iuda iaku ei ariki ki runga ia ratou.
8 Kua rave iorā Abenera te tamaiti a Nera, te rangatira o te nuku o Saula, ia Iseboseta e tamaiti na Saula, e kua apai mai iaia ki Mahanaima;
9 E kua akariro iaia ei ariki no Gileada, e no Asera, e no Iezereela, e no Epheraima, e no Beniamina, e no Iseraela katoa.
10 Ko taua tamaiti na Saula ra, ko Iseboseta, tei te a o te ngauru o tona mataiti i ariki ei aia ki runga ia Iseraela, e rua atura nga mataiti i te ariki anga. Kareka te ngutuare o Iuda, kua aru ratou ia Davida.
11 E taua tuatau i ariki ei a Davida i Heberona ra ki runga i te ngutuare o Iuda ra, e itu ïa mataiti, e ono oki marama.
12 Kua aere aturā Abenera te tamaiti a Nera ra, e te au tavini o Iseboseta te tamaiti a Saula ra, mei Mahanaima mai ki Gibeona.
13 E te tamaiti a Zeruia ra ko Ioaba, e te au tavini o Davida, aere atura e aravei akera ki te vai i Gibeona ra: kua noo iora ratou ki raro, tetai ei tetai pae vai, tetai oki ei tetai pae vai.
14 Kua karanga aturā Abenera kia Ioaba, E tu mai te au tangata ou nei ki runga, ka etau ei ki mua ia tatou. Kua tuatua mairā Ioaba, Ka tu mai ratou.
15 Kua tu akera ki runga, e aere atura ki tetai pae i te au tangata o Beniamina okotai ngauru ma rua, no Iseboseta te tamaiti a Saula, e te au tavini oki no Davida, okotai ngauru ma rua.
16 Kua opu iora tetai i to tetai ra mimiti, kua ko atura i te koke ki roto i te kaokao; topa katoatoa iora: tapaia iora taua ngai ra ia Helekata-hazurima i te pae i Gibeona.
17 E rā tamaki maata rava taua rā ra; eke iorā Abenera, e te au tangata katoa ia Iseraela, ki mua i te au tavini o Davida.
18 Tei reira oki nga tamariki toko toru a Zeruia ra, ko Ioaba, e ko Abisai, e ko Asahela; e vaevae viviki to Asahela mei te zabi o te ngangaere.
19 Kua aruaru aturā Asahela ia Abenera; e i taua aruaru anga aia ia Abenera ra, kare rava aia i anga ke ki te pae katau e te pae kaui.
20 Kua akara akerā Abenera ki muri, e kua karanga akera, Kare ainei koe ia Asahela? Kua tuatua maira aia, Ko au.
21 Kua karanga aturā Abenera kiaia, Ka tapae ana ki to pae katau, e kare ra, ki to pae kaui, ka opu i tetai i te au tamariki na, ka rave ei i te taoonga tamaki nana ra. Kare akerā Asahela e tapae ke ua atu i te aru anga iaia.
22 Kua karanga akaou aturā Abenera kia Asahela, Ka tapae ana, auraka koe e aru mai iaku nei: eaa au nei e tikaʼi kia ta ia koe ki raro rava i te one ra? eaa oki au e tikaʼi kia akara atu i te mata o to tuakana ia Ioaba?
23 Te māro ra aia kare i tapae ke: kua ko aturā Abenera iaia ki te makuikui o tona korare i taokiia e ia ki muri ki raro ake i te îo kaokao, mama atura te korare ki muri mai; topa iora aia i reira, e mate iora i taua ngai ra: kua tae anake mai te tangata ki taua ngai i topaʼi a Asahela ki raro e i mate ra, tu anake iora i reira.
24 Te aruaru ua rā Ioaba raua ko Abisai ia Abenera; e topa iora te rā ki raro kia tae ratou ki te tuaivi ra ko Ama, i muao ia Gia, tei te arataa i te medebara ra i Gibeona.
25 Kua putuputu te tamariki a Beniamina i muri ake ia Abenera, e kua riro ei urupu okotai; tu ua maira ki runga i tetai tuaivi.
26 Kua kapiki mairā Abenera kia Ioaba, kua tuatua maira, Ka rave rai i te koke nei e ta, auraka e mutu? kare rai koe i kite ka riro ei mea kavangia i muri ake? aea ra oki koe e tuatua ki te au tangata nei e oki, auraka e arumaki i to ratou ai taeake?
27 Kua karanga aturā Ioaba, Te ora ra te Atua, naringa kare koe i akakoko mai, mei te popongi mairai, kua oki ïa te tangata, kare e toe, i te arumaki anga i tona taeake.
28 Kua akatangi iorā Ioaba i te pu, tu anake iora te au tangata: kare atura ratou i arumaki akaou ia Iseraela, kare oki e tamaki akaou atu.
29 Aere aturā Abenera e tona au tangata e ao ua ake taua po ra na te Araba, e na runga atura i te vai ra ko Ioridana; aere atura na Biterona katoatoa, e kua tae mai ki Mahanaima.
30 Kua oki rai oki a Ioaba, kare atura i aru ia Abenera: e kia putuputu te au tavini ravarai, kua toe iora to Davida au tangata, okotai ngauru ma iva e ko Asahela.
31 Kareka te au tavini o Davida, kua taia e ratou e kua mate rava to Beniamina, e to Abenera, e toru anere e ono ngauru i te tangata.
32 Kua rave iora ratou ia Asahela, e kua tanu atura ki roto i te tanumanga o tona metua i Betelehema. Kua aere ua iorā Ioaba e tona au tangata e ao ua ake taua po ra, e ao akere tei Heberona maira ratou.