Exodo

1 TEIA oki te ingoa o te au tamariki a Iseraela ra, ko tei aere ki Aiphiti; ko te tangata ko tona ra ngutuare i te aere katoa anga ratou ma Iakoba:

2 Ko Reubena, ko Simeona, ko Levi, e ko Iuda,

3 Ko Isakara, ko Zebuluna, e ko Beniamina,

4 Ko Dana, e ko Naphatali, ko Gada, e ko Asera.

5 E taua aronga katoa ra, ko to Iakoba ra uanga tikai, e itu ïa ngaura anga: tei Aiphiti oki a Iosepha.

6 E mate atura oki a Iosepha e tona ai tuakana katoa, e to taua uki katoa ra.

7 Uua atura te au tamariki a Iseraela, e tupu atura ki te maata anga, e maata rava atura, e riro atura ei aronga maroiroi maata; e ki atura te enua ia ratou.

8 Kua tupu akera tetai ariki ou i Aiphiti, kare aia i kite mai ia Iosepha.

9 Kua tuatua akera aia ki tona au tangata, I na, te au tangata nei, te tamariki a Iseraela, e manganui ratou, e maroiroi maata oki to ratou i to tatou nei:

10 Aere mai na, ei ravenga pakari ta tatou ia ratou, ko te maata aea ratou, ko te kapiti katoa atu aea ratou ki to tatou au enemi, me tupu te tamaki ra, ka tamaki mai ei ia tatou nei, akaruke iora ratou i te enua nei.

11 Kua tuku akera ratou i te aronga akaaiteite-angaanga ki runga ia ratou, ei akateiaa ia ratou i te apainga. Akatu akera ratou i te oire vairanga apinga no Pharao, ko Pitoma, e ko Ramese.

12 E te maata ra to ratou tinaimate anga ia ratou, te tupu ra ratou i te maata anga i reira, e pararauare atura. Ngarangara atura ratou i te tamariki a Iseraela ra.

13 Kua akaapoapoia te tamariki a Iseraela e to Aiphiti ra i te angaanga ma te takinga-kino maataia:

14 Potopoto rava atura to ratou aʼo ia ratou i te tinai-mate anga, i te ngaika, e te karakaraea, e te au angaanga katoa i te kainga ra; e te angaanga ravarai, ta ratou i akaapoapo mai ia ratou e rave ra, i rave ïa ma te takinga-kinoia mai.

15 Kua karanga atura te ariki o Aiphiti ki nga akaanau ngati Ebera ra, ko Sipera te ingoa o tetai, e ko Pua oki te ingoa o tetai;

16 Kua karanga atura oki aia, Kia rave korua i ta korua na taoonga akaanau i te au vaine ngati Ebera ra, e akara korua i te anaunga; e e tamaroa ra, e ta korua i te reira; e tamaine ra, e vaio atu ïa kia ora ua na.

17 E mataku ra to nga akaanau i te Atua, kare akerai i rave i ta te ariki i Aiphiti i tuatua mai kia raua ra, vaoo ua atura ra i te au tamariki tamaroa kia ora ua na.

18 Kua tiki atura te ariki o Aiphiti i nga akaanau, e kua karanga atura kia raua, Eaa korua i akaperaʼi, i akaoraʼi i te au tamariki tamaroa ra?

19 Kua tuatua maira nga akaanau kia Pharao, Kare te au vaine ngati Ebera i aite ki te au vaine Aiphiti; e aronga maroiroi ra ratou; rokoia atu e te akaanau ra, kua anau takere.

20 Kua takinga-meitaki maira te Atua i nga akaanau ra: tupu atura taua iti-tangata ra i te maata, e riro atura ei aronga maroiroi maata.

21 E no te mea e mataku to nga akaanau i te Atua, e kua akamaata maira aia i to ratou ngutuare,

22 I akaue ei a Pharao i te au tangata katoa nona ra, na ko atura, Te au tamariki tamaroa katoa kia anau ra, e rave kotou e titiri ki raro i te vai, kareka te au tamariki tamaine ra, ka akaora ïa.