Isaia

3 I NA oki, ko te Atu ra, ko Iehova Sabaota, te akataka ke nei i te au tokotoko e te au turu, ia Ierusalema e ia Iuda; te turu kai nei kia ope, e te turu vai nei e ope rava ake;

2 Te tangata ririnui, e te tangata toa; te akava, e te peroveta; te taura-atua, e te tangata ruaine;

3 Te rangatira rima ngauru ra, e te tangata taoiau; te tumu korero oki, te taunga karape, e te tangata vaa tukatau.

4 E akariro au i te tamariki ei ui ariki no ratou, e te varevare ei tutara no ratou.

5 E takinga-kinoia te tangata tetai ki tetai, te tangata katoa i tona uaorai tangata tupu; e akateitei te tamariki i runga i te tangata ruaine, e te tarevakaua i tei teitei.

6 Kia opu te tangata i tona taeake, no te ngutuare o tona ra metua, ka na ko atu ei e, Ka aere mai koe ei ariki no matou, e kakau oki toou; e ei to rima teianei mate:

7 E i te reira rā aia e taputou atu ei, i te na ko anga atu, Kare takiri au e riro ei akaora; kare ua e manga, kare oki e kakau, i toku kainga: auraka au e akariroia ei tutara no te au tangata nei.

8 Te turorirori nei oki Ierusalema, e te inga nei Iuda: no te mea, te tau kore nei to ratou arero, e ta ratou au ravenga, ia Iehova, ei akariri atu i nga mata o tona kakā.

9 Te akaapa nei to ratou uaorai mata ia ratou: te akakite pu nei oki i ta ratou ara mei ia Sodoma ra; kare ratou i uuna; e ae oki to ratou vaerua! na ratou uaorai oki i kimi i to ratou mate.

10 E karanga atu ki te aronga tuatua-tika ra e, e meitaki ïa to ratou; e kai oki ratou i te ua i ta ratou i rave ra.

11 E ae oki te tangata kino ra: e mate ïa tona: ka tukuia mai te tutaki a tona rima iaia.

12 Ko toku nei iti-tangata, e tamariki tei takinga-kino ia ratou, e vaine tei tutara ia ratou. E toku iti-tangata e, na toou au arataki i arataki ke ia koe, e na ratou i akakore i te arataa o te aronga i aere i te ara.

13 Kua tu a Iehova e akatika i tana, kua tu aia ki runga e akava i te au tangata.

14 Ei te akava angā Iehova e aravei ei i te aronga pakari o tona ra iti-tangata, e to ratou ui ariki; kareka kotou, kua pou te kainga vine ia kotou; tei to kotou au are te apinga aō a te tangata rikiriki ra.

15 Eaa tika kotou, i takinga-kino ei i toku au tangata, e i uuki ei i te mata o te tangata rikiriki? te tuatua maira te Atu ra, ko Iehova Sabaota.

16 Kua tuatua maira oki a Iehova, No te mea kua ngakau parau te au tamaine a Ziona, e kua aere ma te akaroroa i te kaki, e ma te mata kaipaipa ra, e titorangi ua te aerenga ra, e te kerekere anga to ratou vaevae me aere:

17 E akapakiko ei te Atu i te take upoko o te au tamaine a Ziona, e na Iehova e akakite i to ratou akama.

18 E kia tae ki taua rā ra, ka ravea keiaʼi e te Atu ra te mea manea o te au tatua vaevae ra, e te au akana ra, e te au tarae marama nikau ra:

19 Te au poe taringa akatautau ra, te au tatua rima ra, e te au tapoki-mata ra;

20 Te au tākai upoko ra, te au pirianganaoa vaevae ra, e te au tatua ra, e te au pia takakara ra, e te au peu akapopo marie ra;

21 Te au momono-rima ra, e te au poe putaiu ra:

22 Te au kakau akamanea ra, e te au pona; te au kakau pu ua ra, e te au pute rikiriki ra;

23 Te au akaata ra, e te au kakau auaro memeitaki; te au puvaavaa ra, e te au vaî mata mamaata ra.

24 E kauonoia te kakara ra ki te aunga pirau; e kauonoia oki te tatua meitaki ra ki te taura; e kauonoia te rauru iri ra ki te pakiko; e kauonoia te kakau pu ra ki te kakau paoa; te akairo tungiia ki te ai ra ei kauono i te purotu.

25 E inga toou au tangata ra i te koke; e toou au toa uritumu ra i te tamaki ra.

26 E tona au ngutupa, ka aue e ka mii; e ka noo meamea ua aia ki raro i te one.