Iobu

36 KUA karanga atu rai a Eliu, na ko atura,

2 E akakoromaki iti ua mai koe, e naku e akakite atu e, te vai nei rai taku tuatua no te Atua.

3 Ka tiki roa au i taku kite ki te ngai mamao, e e tuku au i te tuatua-tika i Tei anga iaku ra.

4 Kare takiri taku nei tuatua e riro ei pikikaa: tei mua ia koe na tei karape i te kite.

5 I na te Atua, e ririnui tona, e kare tetai e akavaavaaia e ia; e ririnui i te mana e te kite.

6 Kare aia e akaora i te aronga kino: e tuku maira aia i te tika ki te ao.

7 Kare aia e akataka ke i ona mata i te aronga tuatua-tika ra: tei runga ia i te terono o te ui ariki; kua akanoo rava aia ia ratou e tuatau ua atu, e kua akateiteiia ratou.

8 E kia tapekaia ratou ki te auri, e kua akamouia ki te taura ra i te mate;

9 Kua akakite aia ia ratou i ta ratou angaanga i reira, e ta ratou au ara, no te mea kua maata.

10 Kua akapuata oki aia i to ratou taringa ki te ako, e kua akaue ia ratou kia oki mai i te tuatua kino.

11 Kia akarongo mai ratou e kia akono kiaia, e ope to ratou au rā i te meitaki, e to ratou au mataiti i te rekareka.

12 Kia kore ra ratou e akarongo ra, e pou ratou i te koke, e ka mate ratou ma te kite kore.

13 Ko te ngakau pikikaa ra tei akaputuputu i te riri: kare ratou e kaku kia tapekaia ratou e ia.

14 Ei to ratou ou anga ra e mate ei, tei rotopu oki ratou i te aronga viivii i te ora anga.

15 E akaora aia i te ao i tona maki anga, e kua akapuata i to ratou taringa i te tinai-mate anga.

16 Koia katoa koe, kua apai tika aia ia koe mei te ngai piripiri nei ki te ngai atea, kare e piripiri o reira; e tei tukuia ki runga i taau ra kaingakai kua ki ïa i te matu.

17 Kua akatika tikai ra koe i te tuatua a te aronga kino; ka piri rai taua tuatua ra e te utunga, tetai ki tetai.

18 No te mea, te vai ra te riri otooto, kia matakite, ko te rave ke aea aia ia koe i te tainga okotai: kia maata ua atu te oko, kare koe e matara mai i reira.

19 E manako mai ainei aia i taau ra apinga? kare, kare te auro, e te ririnui katoa o te mana ra.

20 Auraka e anoano i te po, te riro ke nei oki te au tangata i to ratou ra ngai.

21 Kia matakite auraka e anga ki te kino: kua iki oki koe i te reira, kare i te maki.

22 I na, te akateiteiia te Atua i tona uaorai mana: koai tei aite iaia i te apii anga?

23 Naai i akakite iaia i tona arataa? e naai i karanga atu e, Kua rave koe i te kino?

24 E akamaara koe, kia akamaata rai koe i tana angaanga, tei akaraia e te tangata nei.

25 Te kite nei te au tangata ravarai i te reira; e kiteia e te tangata mei te ngai mamao mai.

26 I na, e maata te Atua, kare e kitea e tatou; te tatauanga o tona au mataiti, kare e tika kia kimi.

27 Nana oki i apai i te au topata vai ki runga; e kua topa maira ei ua, no roto i taua kou ra;

28 Ta te au tumurangi i akatopa, kua maata rava maira ki runga i te tangata.

29 Koai te kite i te oora anga o te au tumurangi, te aruru o tona ra puakapa?

30 I na, te oora ra aia i tona mārama na rungao i te reira, e kua tapoki i te takere o te moana.

31 I taua au mea ra i akavaʼi aia i te au tangata; kua oronga mai aia i te manga e kua maata.

32 Te tapoki nei aia i te uira i nga kapu-rima nona ra, e nana e akaue i te ka taia e taua uira ra: I te akakite anga atu i tona au oa ki te reira, te uipa anga o tona riri i te aronga kino.

33 [Not in Rarotongan Bible.]