2 Ariki

25 E TAE akera ki te iva o te mataiti o tona ra au, tei te ngauru ra o te marama e te ngauru oki o te rā o taua marama ra, i tae mai ei te ariki o Babulonia, ko Nebukaneza, koia ma tona nuku katoa, e rave ia Ierusalema, e kua patia iora i te puakapa i reira, e kua patu iora i te patu i reira e pini ua ake.

2 Ko te tamaki ua anga ïa i taua oire ra e tae ua atura ki to te ariki ra ki to Zedekia mataiti okotai ngauru ma tai.

3 E tae akera ki te a o te marama e te iva oki o te rā, i maataʼi te onge i taua oire ra, e kare rava e kai na te tangata o te enua.

4 Ngaangaa atura taua oire ra, e kua oro iora te au tangata toa ravarai i te po, i na te ngutupa i rotopu i nga patu e rua, ki te pae kainga o te ariki ra; (kua akapiniia oki taua oire ra e te Kaledea,) aere tika atura ratou ki te ngai atea.

5 Kua aru atura te nuku o te Kaledea i te ariki, e rokoia iora i te ngai mataataa i Ieriko ra: pueurikiriki ke atura tona nuku katoa iaia.

6 Kua opu atura i te ariki, e kua arataki maira ki Ribila ki te ariki o Babulonia ra; kua tuku ratou i te utunga iaia.

7 Kua ta rava iora ratou i nga tamariki a Zedekia ki mua i ona mata, koiti akera i nga mata o Zedekia, kua tapeka iora iaia ki te tapeka veo, kave atura iaia ki Babulonia.

8 E tae akera ki te rima o te marama, i te rā itu o taua marama ra, ko te ngauru ma iva ïa o te mataiti o te ariki o Babulonia o Nebukaneza, i tae ei a Nebuzaradana, rangatira no te vaeau, e tavini no te ariki o Babulonia, ki Ierusalema.

9 E kua taʼuia iora e ia te are o Iehova, e te are o te ariki, e te au are katoa i Ierusalema; kua ope rava te au are mamaata ra i te ka i te ai iaia.

10 Kua vavaʼi iora te nuku Kaledea ravarai o taua rangatira vaeau ra, i te au patu o Ierusalema e pini ua ake.

11 E te toenga o te au tangata i vaooia i roto i te oire, e tei riro no te ariki o Babulonia, te toenga o taua aronga katoa ra, kua apai keia ïa e te rangatira o te vaeau e Nebuzaradana.

12 Kareka te aronga ao, kua vaooia ïa e te rangatira o te vaeau, ei tope vini, e ei tatanu.

13 E nga pou veo i roto i te are o Iehova, e nga turanga, e te āriki vai veo i roto i te are o Iehova, kua vavaʼiia ïa e te Kaledea, e kua apai i to reira veo ki Babulonia.

14 E te au pani, e te au taipu, e te au pakoti, e te au kapu, e te au mea veo katoa ta te kau taunga i rave ra, kua apai keia ïa.

15 E te au āriki ai, e te au kapu, to te au mea auro, ei auro ïa, e to te ario, ei ario ïa, ko tei apai keia ïa e te rangatira o te au vaeau ra.

16 Nga pou e rua ra, te āriki vai okotai, e nga turanga, i angaia e Solomona no te are o Iehova; ko te veo o taua au mea katoa ra kare ïa e aite.

17 Okotai ngauru ma varu i te kubiti te teitei i te pou okotai; e te tapoki i runga, e veo ïa; e te teitei o taua tapoki ra, e toru ïa kubiti; e te ei, e te remuna i rungao i taua tapoki ra e pini ua ake, e veo anake ïa: e te rua oki o te pou ra, e te ei katoa, okotai rai tu.

18 Kua rave atura te rangatira o te vaeau i te taunga maata ra ia Seraia, e te taunga tauturu ra ia Zephania, e nga tiaki ngutupa toko toru:

19 E kua rave iora aia i tetai tavini ariki i roto i te oire i tukuia ki rungao i te au tangata tamaki ra, e nga tangata toko rima e tu ki mua i te aroaro o te ariki ra, i kitea i roto i te oire, e te tata tuatua no te rangatira o te nuku ra, ko tei tata mai i te tangata o te enua, e te au tangata oki e ono ngauru no taua enua ra i kitea i roto i te oire:

20 Kua rave iorā Nebuzaradana rangatira o te vaeau ia ratou, kave atura ki te ariki o Babulonia ki Ribila:

21 Kua ta iora te ariki o Babulonia ia ratou, pou akera ratou i te mate i Ribila i te enua ko Hamata. Riro akera Iuda i te apai keia i to ratou ra enua.

22 Kareka te au tangata i toe i taua enua ra i Iuda, tei vaooia e te ariki o Babulonia e Nebukaneza, kua akariro aia ia Gedalia, te tamaiti a Ahikama, te tamaiti a Saphana ra, ei tutara.

23 E kite akera te au rangatira katoa o te au nuku, ko ratou e te au tangata, e, kua akariro te ariki o Babulonia ia Gedalia ei tutara, kua aere maira kia Gedalia ra ki Mizepa; ko Isemaela te tamaiti a Netania, e ko Iohanana te tamaiti a Karea, e ko Seraia te tamaiti a Tanumeta i Netopha, e ko Iaazania te tamaiti a tetai ngati Maaka, ko ratou e to ratou au tangata.

24 Kua taputou aturā Gedalia kia ratou, e to ratou au tangata, e kua karanga atura kia ratou, Auraka e mataku i te au tavini o te Kaledea: e noo ua i te enua, ma te tavini atu ki te ariki o Babulonia, e meitaki ïa kotou i reira.

25 Kia tae ra ki te itu o te marama, kua aere mairā Isemaela te tamaiti a Netania te tamaiti a Elisama, no te kopu ariki, e nga tangata katoa tino ngauru i piri kiaia, kua ta iora ia Gedalia, e mate atura aia, e te au ngati Iuda, e te Kaledea ki ona ra i Mizepa.

26 Kua tu akera te tangata ravarai, mei tei iti e tae ua atu ki tei maata, e te au rangatira o te au nuku, aere atura ki Aiphiti: kua mataku oki ratou i te Kaledea.

27 E tae akera ki te toru ngauru ma itu o te mataiti o te tuikaa anga o te ariki o Iuda o Iehoiakina, e te okotai ngauru ma rua o te marama, e te okotai takau ma itu o te rā i taua marama ra, kua akateiteiia te upoko o te ariki o Iuda o Iehoiakina, i roto mai i te are tapekaanga ra, e te ariki o Babulonia e Evile-merodaka, i te mataiti i ariki ei aia:

28 Kua tuatua meitaki atura oki aia kiaia, e kua akateitei akera i tona terono i to te au ariki ki ona i Babulonia;

29 E kua akatu ke aia i ona kakau no te are tapekaanga ra: e kua kai aia i te kai ki mua iaia e ope rava akera ona au rā i te ora anga nei.

30 E tana ra tuanga kai, e mea tamou ïa, i orongaia e te ariki; e mea akono tikaia no te au rā katoa, e ope rava ake ona au rā i te ora anga nei.