Ezekiela

24 E I te iva o te mataiti, i te ngauru o te marama, i te ngauru o te rā i taua marama ra, i tae mai ei te tuatua a Iehova kiaku nei, na ko maira,

2 E te tamaiti a te tangata na, ka tata na koe i te ingoa o te rā nei, o teianei rā tikai: kua akanoo oki te ariki o Babulonia i te tamaki ia Ierusalema i teianei rai rā.

3 Ka tuku atu i tetai maseli ki te ngutuare meameaau nei, e karanga atu kia ratou, Te na ko maira te Atu ra ko Iehova; Ka akauta ana i tetai pani, ka akauta ana, ka riringi i te vai ki roto ra.

4 E akaputuputu i tana au kotinga ki roto ra, i te au kotinga memeitaki katoa ra; i te ūā muri e te ua mua, ka akaki ki te au ivi memeitaki ra.

5 Ka rave i tei meitaki tikai o te anana ra, ka ataʼi oki te au ivi i raro ake, kia pupu tikai, e kia tunu ratou i tona au ivi i roto ra.

6 E teianei, te na ko maira te Atu ra ko Iehova; Aue te oire toto e, te pani ma te repo i te vai katoa anga i roto ra, kare tona repo i peke ki vao! kiriti tataki kai maira nga kotinga; auraka kia topaia i te kelero.

7 Te vai ua ra oki i roto iaia te toto tana i akamaringi ra; kua tuku iora aia i te reira ki runga pu i te mato ra; kare akera aia i riringi ki raro i te one, kia tapokiia a rungao ki te one-pueu;

8 Kia tupu mai te riri otooto kia akaoko atu ïa; kua tuku au i taua toto nana ra ki runga pu i te mato ra, kia kore kia tapokiia.

9 E teianei, te na ko maira te Atu ra ko Iehova; E ae oki te oire toto e! e akamaata ua atura au i te putunga vaie no te ai.

10 E uri rai i te vaie ki rungao, ka taʼu i te ai, kia pou te kiko, e iro tikai ki te vairakau, e kia ka oki te au ivi.

11 Ka tuku ua atu ei, ma te apinga kore to roto ra, ki runga i te ngarau, e kia veravera te veo, e kia ka, e kia taʼe tona viivii i roto ra, kia pou roa tona repo ra.

12 Kua potopoto te aʼo i te angaanga, kare ra tona repo maata i peke ki vao mei roto iaia ra, tona repo i roto i te ai.

13 E kanga tei taua viivii noou ra, no te mea kua tika iaku i te tamā ia koe, kare ra i tika ia koe kia tamāia, kare koe e tamā akaouia, e kia akairi atu au i taku riri otooto ki runga ia koe ra.

14 Naku tikai oki na Iehova i tuatua, e tupu ïa te reira, naku oki e rave; kare au e oki ki muri, kare oki au e akaperepere, e kare rai au e tataraara; ka akava ratou ia koe kia tau ki toou ra au aerenga, e ki taau ra au ravenga, te tuatua maira te Atu ra ko Iehova.

15 Kua tae mairai oki te tuatua a Iehova kiaku nei, na ko maira,

16 E te tamaiti a te tangata na, i na teia au ka rave ke i te inangaro o to mata i te tainga okotai ra, auraka ra koe e eva, auraka rai koe e aue, e auraka e maringi to roi-mata.

17 Aue muteki ua koe, auraka e akaevaeva i te aronga i mate, tākaikai i to pare ki runga ia koe, e aoao i o vaevae ki te tamaka, auraka e tapoki i o ngutu, e auraka koe e kai i te kai akaevaeva ra.

18 Kua tuatua au ki te au tangata i te popongi: e aiai iora mate atura taku vaine; e ao akera kua pera au i tei akaueia mai au ra.

19 Kua tuatua maira te au tangata kiaku ra, Kare ainei koe e akakite mai i te aiteite anga o teianei au mea ia matou nei, i peraʼi koe na?

20 E kua karanga atura au kia ratou, Kua tae maira te tuatua a Iehova kiaku nei, na ko maira,

21 Ka tuatua ana ki te ngutuare o Iseraela, Te na ko maira te Atu ra ko Iehova; I na, e akaviivii au i taku ngai-tapu, te meitaki o to kotou ririnui, te inangaro o to kotou mata, e tei akaperepereia e to kotou ngakau; e ta kotou au tamaroa, e ta kotou au tamaine, i vaooia e kotou na, e inga ïa i te koke.

22 E akapera oki kotou mei taku i rave ra: auraka kotou e tapoki i to kotou ngutu, e auraka e kai i te kai akaevaeva ra.

23 Ei runga i to kotou mimiti to kotou au pare, e ei runga i to kotou vaevae to kotou au tamaka; auraka kotou e akaevaeva, e auraka e aue; ka kakao ua ra kotou i ta kotou au ara, e ka mii ua kotou ki tetai ki tetai.

24 Ka pera oki a Ezekiela i te riro anga ei akairo na kotou; e mei te au mea katoa tana i rave ra, ka akapera rai kotou: e kia tupu ra, e kite ei kotou e, ko te Atu ra au ko Iehova.

25 Ko koe katoa oki, e te tamaiti a te tangata na, i te rā ka rave atu ei au i to ratou ririnui, te rekareka o to ratou kakā, te inangaro o to ratou mata, e tei anoanoia e to ratou ngakau, ta ratou au tamaroa, e ta ratou au tamaine,

26 Na tei ora mai i taua rā ra e aere mai kia koe ra, ka akakite uaʼi ki to taringa.

27 I taua rā ra e amamaia to vaa ki tei ora maira, e ka tuatua koe, e kare e murare akaou: e riro oki koe ei akairo na ratou; e ka kite ratou e ko Iehova au.