1 Ariki

8 KUA akaputuputu mairā Solomona i te aronga pakari i Iseraela, e to rungao i te au kopu ra, te au mataiapo tutara o te tamariki a Iseraela, ki Ierusalema, ki te ariki ra kia Solomona, kia apai mai ratou i te aruna koreromotu a Iehova, mei roto mai i te oire o Davida, koia oki Ziona.

2 Kua uipa maira te au tangata ravarai o Iseraela ki te ariki ra kia Solomona, i te oroa, i te marama ra ia Etanima, koia te marama itu ra.

3 Kua aere maira te aronga pakari katoa o Iseraela; e kua rave iora te kau taunga i te aruna.

4 E kua apai maira ratou i te aruna a Iehova, e te Are uipaanga, ki runga, e te au mea tapu ravarai i roto i taua Are ra; ko tei apaiia mai ïa e te kau taunga e te ngati Levi.

5 E te ariki ra oki ko Solomona, e Iseraela katoa i te uipa katoa anga i reira ki mua i te aruna, te apai ra i te mamoe, e te puakatoro, ei atinga, kare e tika kia tatau i te maata.

6 E kua apai maira te kau taunga i te aruna koreromotu a Iehova ki tona ra vairanga, ki te ngai-tuatua i te are, ki roto i te ngai-tapu rava ra, i raro ake i nga peau o nga kerubi ra.

7 Kua oora mai oki nga kerubi i o raua peau e rua ra na runga i te vairanga aruna, e ngaro oki te aruna e nga amo katoa ra i nga kerubi.

8 I kitea nga ope amo i roto i te ngai-tapu rava ra, i mua ake i te ngai-tuatua, no te roa, kare ra i kitea i vao: e te vai ua ra i reira e tae rava akenei ki teianei rā.

9 Kare o roto i taua aruna ra, mari ra i aua nga papa toka e rua ra, ta Mose i tuku i reira i Horeba ra, ka papau ei a Iehova i te koreromotu ki te tamariki a Iseraela, ka aere mai ei ratou mei te enua maira mei Aiphiti.

10 E kia riro mai te kau taunga ki vao i taua ngai-tapu ra, ki rava akera te are o Iehova ki te tumurangi.

11 Kare atura te kau taunga e mou kia rave i ta ratou taoonga i taua tumurangi ra; kua ki oki te are o Iehova ki te kakā o Iehova.

12 Kua tuatua akerā Solomona, I tuatua mai oki a Iehova e, ei roto i te tumurangi poiri aia noo ei.

13 Kua akatu tika au i tetai are nooanga noou, ei ngai nooanga tikai noou e tuatau ua atu.

14 Kua anga maira te mata o te ariki, kua akaora maira i te uipaanga katoa o Iseraela, kua tu ua maira te uipaanga katoa o Iseraela ki runga;

15 Kua tuatua akera aia, Kia akameitakiia te Atua o Iseraela ko Iehova, ko tei akatupu ua i tona rima i ta tona uaorai vaa i tuatua ki toku metua kia Davida, i te na ko anga e,

16 Mei te rā mairai i arataki mai ei au i toku ra au tangata ia Iseraela mei Aiphiti mai, kare au i iki i tetai oire i roto i te au kopu ravarai o Iseraela nei, ei akatu anga are, kia vaooia toku nei ingoa i reira; kua iki ra au ia Davida, ei runga ïa i toku nei au tangata ia Iseraela.

17 Ko roto ra i te ngakau o toku metua ra o Davida te manako, e akatu i tetai are no te ingoa o te Atua o Iseraela no Iehova.

18 Kua tuatua mairā Iehova ki toku metua kia Davida, No te mea, ko roto i toou ngakau e akatu i tetai are no toku nei ingoa, kua tika taau no te mea ko roto ïa i toou ngakau.

19 Auraka ra koe e akatu i taua are nei; na to tamaiti ra, taau e anau ra, nana e akatu i te are no toku nei ingoa.

20 E kua tupu io nei ia Iehova te tuatua tana i karanga ra, kua tupu io nei oki au ei tupau i toku metua ia Davida, e noo nei au ki runga i te terono o Iseraela, ta Iehova i tuatua maira, e kua akatu io nei au i te are no te ingoa o te Atua o Iseraela no Iehova.

21 E kua akonoia e au tetai vairanga no te aruna, tei reira nga papa koreromotu a Iehova ra, tana i papau ki to tatou ai metua ra, ka arataki mai ei aia ia ratou mei te enua maira mei Aiphiti.

22 Te tu ua rā Solomona ki mua i te atarau a Iehova, ki mua i te aroaro o te uipaanga katoa o Iseraela, te oora tika atura aia i ona rima ki runga i te rangi:

23 Kua karanga atura, E te Atua o Iseraela, e Iehova e, kare atu e Atua e aite kia koe, i runga i te rangi, e i raro katoa i te enua nei, i te akono i te koreromotu, e te aroa ki to au tavini, ko tei aere i mua ia koe ma to ratou ngakau katoa;

24 Ko tei akono tikaia e koe taau i tuatua mai ki to tavini ki toku metua kia Davida: na toou vaa i tuatua i tei akatupuia e to rima mei tei teianei rā.

25 E tenana, e te Atua o Iseraela, e Iehova, e akono rai koe i tei tuatuaia e koe ki to tavini ki toku metua kia Davida, ka na ko ei ra e, Kare koe e ngere i te tangata kia noo ki mua i toku aroaro ki runga i te terono o Iseraela; kia akono mairai to au tamariki i to ratou aerenga, e kia tau to ratou aerenga ki mua iaku, mei ia koe katoa i aere na mua iaku ra.

26 E teianei, e te Atua o Iseraela, teia taku tuatua kia koe, kia tupu tikai taau tuatua i tuatuaia e koe ki toku metua, ki to tavini kia Davida.

27 Ka noo tika mairai ainei te Atua ki runga i te enua nei? i na, te rangi nei, e te rangi o te au rangi ra, kare rai koe e o; ka tangaʼi oki i teianei are i akatuia e au nei?

28 E akono maira koe i te pure a to tavini nei, e tana e pati nei, e taku Atua, e Iehova, e akarongo mairai koe i te kapiki e te pure ta to tavini e pure ki mua ia koe i teianei rā:

29 Kia puera mai o mata i te po e te ao ki teianei are, ki te ngai taau i tuatua maira. Ei reira toku ingoa vaooiaʼi: ka akarongo mai ei koe i te pure e pureia e to tavini ki teianei ngai,

30 E akarongo mairai koe i te pure a to tavini, e ta to au tangata ta Iseraela, kia pure tika mai ratou ki teianei ngai; e akarongo mai koe i te reira i toou ra nooanga i te rangi ra, e kia rongo koe ra, e akakore mai i ta ratou ara.

31 Kia ara tetai tangata i tona tangata tupu, e akataputouia atura aia, e kua taputou iora i ko nei, ki mua i to atarau i roto i teianei are:

32 E akarongo mai koe i runga i te rangi ra i reira, ka tuku mai ei i te tuatua-tau ki to au tavini nei, i te akaapa anga mai koe i tei apa ra, e te uri anga mai i tana ara ki runga i tona uaorai mimiti; e te akatika anga mai i tei tika ra, i te tuku anga mai i tei tau ki te tuatua-tika nana ra.

33 Kia eke to au tangata ko Iseraela ki mua i te enemi, no te mea kua ara ratou ia koe; e kia anga maira kia koe, e kia aaki i to ingoa, e kua pure, e kua pati i to ratou anoano kia koe i roto i teianei are:

34 E akarongo mai koe i runga i te rangi ra i reira, e akakore mai i te ara a to au tangata ia Iseraela, e akaoki mai ia ratou ki te enua taau i oronga mai ki to ratou ai metua ra.

35 Kia momaniia te rangi ra, e kare e ua, no te mea kua ara ratou ia koe; kia pure tika maira ratou ki ko nei ki teianei ngai, e kia aaki i to ingoa ra, e kia akaruke i ta ratou ara, kua oti ratou i te tairoia e koe ra:

36 E akarongo mai koe i runga i te rangi ra i reira, e akakore mai koe i te ara a to au tavini, e a to au tangata ia Iseraela; e akakite mai koe kia ratou i te ara meitaki kia aere ratou ra; ka oronga mai i te ua ki runga i to enua nei, i tei orongaia mai e koe ki to au tangata nei ei tuanga.

37 Kia rokoia te enua nei e te onge, te maki-mate, te veravera, te pueka, te tāpaki, e te anue; e kua akapiniia ratou e to ratou au enemi i te au oire i to ratou enua; kia rokoia e tera mate, e tera maki;

38 Ko te au pure katoa e te au patianga e patiia e te au tangata katoa, e Iseraela nei i te tangata katoa e to au tangata katoa i kite i te kino o tona uaorai ngakau, e kua oora tika mai i ona puke rima ki teianei are:

39 Ei reira koe e akarongo mai ei i runga i te rangi i te ngai taau e noo ra, ka akakore mai ei i te ara, e e rave, e akatau mai oki koe i te tuatua ki te tangata katoa kia tau ki tona aerenga, ko koe oki te kite i tona ngakau; ko koe, ko koe anake ra, tei kite i te ngakau o te tamariki katoa a te tangata nei:

40 Kia mataku oki ratou ia koe i te au rā katoa i to ratou noo anga i te enua taau i oronga mai ki to matou nei ai metua ra.

41 I te tangata ke ra, kare to Iseraela i toou nei au tangata, no toou nei ingoa i tae mai ei mei te enua mamao maira;

42 Ka akarongo oki ratou i toou ingoa i te maata, e to rima maroro, e to rima i akatikaia ra; kia aere maira aia, e kia pure tika mai ki teianei are:

43 E akarongo mai koe i reira i runga i te rangi i te ngai taau e noo ra, ka akatika mai ei i ta taua tangata ke i kapiki ia koe ra; kia kite to te ao katoa nei i toou ingoa, kia mataku ia koe, mei toou katoa ra iti-tangata mei ia Iseraela nei; kia kite oki ratou i teianei are i akatuia e au nei, e kua tapaia i te ingoa noou ra.

44 Kia aere toou iti-tangata e tamaki i to ratou au enemi, na te arataa taau e tono ia ratou, kia pure maira ratou kia Iehova ki teianei oire i ikiia e koe ra, e teianei are i akatuia e au no toou ra ingoa:

45 E akarongo mai koe i reira, i runga i te rangi ra, i ta ratou pure e ta ratou i pati ra, e tupae mai koe ia ratou.

46 Kia ara ratou ia koe, (kare atu oki e tangata e kore ei te ara,) e kua riri iora koe ia ratou, e kua tuku atu koe ia ratou ki te enemi, e kua apai tuikaaia atu ratou e ratou ki te enua o te enemi, ki te enua mamao, e kare ra, te enua vaitata;

47 Kia akamaaraara to ratou ngakau i te enua i apai tuikaaiaʼi ratou ra, e kua ariu mai, e kua pure mai ia koe i taua enua i tuikaaʼi ratou ra, kia tuatua mai e, Kua ara matou, kua tatipake matou, kua rave matou i te kino;

48 E kia anga maira ratou kia koe ma to ratou ngakau katoa ra, e ma to ratou vaerua katoa, i te enua o to ratou enemi tei apai tuikaa ia ratou, e kua pure ratou ia koe ma te anga ki to ratou ra enua, i orongaia mai e koe no to ratou ai metua ra, ki te oire i ikiia e koe ra, e te are i akatuia e au no toou ra ingoa:

49 E akarongo, mai koe i reira, i runga i te rangi i te ngai taau e noo ra, i ta ratou pure, e ta ratou i pati ra, e tupae mai koe ia ratou,

50 Ka akakore mai ei koe i te ara a to au tangata i ara ai ia koe ra, e te au ara katoa i riri ei koe ra, e akatupu oki koe i te aroa i te aronga i apai tuikaa ia ratou ra, kia aroa mairai ratou ia ratou:

51 Ko toou ra ïa au tangata ko ratou, e ko taau ïa tuanga, taau oki i arataki mai mei Aiphiti maira, mei rotopu i te umu auri ra.

52 Kia puera oou mata i te pure a o tavini, e te pure a to au tangata ia Iseraela, e akarongo koe ia ratou i te au mea katoa ta ratou e tautopa atu ia koe ra.

53 Kua akataka keia ratou e koe mei roto mai i to te ao katoa nei, ei tuanga naau uaorai, taau rai oki i tuatua i to tavini ra ia Mose, ka arataki mai ei koe i to matou ai metua mei Aiphiti mai, e taku Atu e Iehova e.

54 E oti akera ia Solomona i te pure i teianei pure katoa, e teianei patianga, kia Iehova ra, kua tu akera aia ki runga mei mua mai i te atarau a Iehova, mei te tuku anga i te turi ki raro, e kua oora akera i ona rima ki runga i te rangi.

55 Kua tu iora aia , e kua akaora maira i te uipaanga Iseraela ravarai, ma te reo maata, na ko maira,

56 Kia akameitakiiā Iehova, kua oronga mai aia i te au ki tona ra au tangata kia Iseraela, mei tana oki i tuatua maira; kare oki tetai reo i topa i te au tuatua memeitaki katoa tana i tuatua mai i tona tavini ra ia Mose.

57 Ei vaitata katoa to tatou Atua ko Iehova ia tatou nei, mei iaia katoa i vaitata mai i to tatou ai metua ra: auraka rava aia e vaoo mai ia matou, auraka katoa e akaruke ia matou:

58 E kia akaariu aia i to matou nei ngakau kiaia uaorai, kia aere katoa matou na tona katoa au aerenga, e kia akono i tana ra au akauenga, e tana ra au akonoanga, e tana au tuatau-tau, tana i akaue mai i to tatou ai metua ra.

59 E kia vai marie rai taku nei au tuatua, i pureia e au ki mua i te aroaro o Iehova ra, i vaitata i to tatou Atua ia Iehova i te po e te ao, kia tupae mai aia i tona tavini, e to te au tangata nona to Iseraela, i tei tau ia ratou, i te au rā katoa nei:

60 Kia kite to te ao katoa nei e ko Iehova anake ra te Atua, kare atu.

61 E akatau oki i to kotou ngakau ki to tatou Atua kia Iehova, kia aere na tana ra au akonoanga, e kia akono i tana au akauenga, mei tei teianei rā.

62 Kua apai te ariki, e Iseraela katoa, i te atinga ki mua i te aroaro o Iehova.

63 Kua apai aturā Solomona i te au atinga au, tana ïa i apai kia Iehova, okotai takau ma rua i te tausani i te puakatoro, okotai anere e rua ngauru i te tausani i te mamoe. I pera te ariki e to Iseraela katoa i te akatapu anga i te are o Iehova.

64 I taua rā ra te akatapu angaia e te ariki te ngai i rotopu i te paepae i mua i te are o Iehova: i reira oki te au atinga karakaratio, e te atinga kai, e te tongaua no te atinga au ra: no te mea e iti te atarau veo i mua ia Iehova kia āriki i te au atinga karakaratio, e te atinga kai, e te tongaua no te atinga au ra.

65 E oroa ta Solomona i akono i reira, e ko Iseraela katoa i te kai anga, e aronga maata, mei te tomoanga i Hamata mai e tae ua atura ki te kauvai i Aiphiti ra, ki mua i te aroaro to tatou Atua ko Iehova, po itu, e po itu mai, okotai ngauru ma a i te rā.

66 E tae akera ki te varu o te rā ra, kua tuku ua atura aia i te tangata: kua akameitaki maira ratou i te ariki, e aere atura ki to ratou au puakapa, ma te pereperekavana e te rekareka o te ngakau, i te au meitaki katoa ta Iehova i rave i tona tavini ia Davida, e ia Iseraela i tona au tangata.