2 Paraleipomeno

14 MOE aturā Abia ki o tona ra ai metua, e tanumia iora aia i te oire o Davida: tupauia akera aia i te au e tana tamaiti ra e Asa. Au iora to te enua i tona au rā e okotai ngauru akera i te mataiti.

2 Rave aturā Asa i te meitaki e te tika i mua i te aroaro o tona ra Atua o Iehova.

3 Kua apai ke atura aia i te au atarau no te au atua ke ra, e te au ngai teitei, e kua vavaʼi i te au tiki, e kua tipu i te au Asetoreta:

4 E kua akaue atura ia Iuda e kimi i te Atua no to ratou ai metua ia Iehova, e e akono oki i te ture e te akauenga ra.

5 E kua apai ke atura aia i te au ngai teitei i roto i te au oire katoa o Iuda, e te au tiki rā: e au oki to taua basileia ra i mua i tona aroaro.

6 E kua patu oki aia i te au oire akaketaketaia i Iuda ra; e au oki to taua enua ra, kare oki ana e tamaki i te reira au mataiti; no te mea, kua oronga mai a Iehova i te au nona.

7 I karangaʼi aia kia Iuda e, Ka aere tatou e patu i te au oire nei, e akapini ei ki te patu, e te punanga, te au ngutupa, e te au tea, koi vai ake te enua i mua ia tatou nei: no te mea kua kimi tatou i to tatou Atua ia Iehova, kua kimi tatou iaia, i oronga mai ei aia i te au no tatou e pini ua ake. Kua patu iora oki ratou, e kua manuia oki.

8 E nuku ta Asa i o Iuda e toru ïa anere i te tausani, e korare te taoonga e te au paruru; e rua oki anere e varu ngauru i te tausani i o Beniamina, e paruru te taoonga e te au ana: e aronga toa uritumu anake ïa.

9 Kua aere mairā Zera i Kusa e tamaki ia ratou, e te nuku katoa, okotai ngauru i te anere anga i te tausani, e te au kariota e toru anere; kua aere maira aia ki Maresa.

10 Kua aere aturā Asa e tamaki iaia, e kua akamou iora ratou i te tamaki i te o ra ko Zephata i Maresa ra.

11 Kua kapiki aturā Asa ki tona ra Atua kia Iehova, e kua akaranga atura, E Iehova e, kare te mea ravengata ia koe kia tupae mai i te riri iti i rotopu i te aronga katoa e manganui: e tauturu mai ia matou, e to matou Atua, e Iehova e; te irinaki nei oki matou ki runga ia koe, e no toou ingoa e aere atu ei matou e tamaki i teianei aronga maata. Ko koe to matou Atua, e Iehova; auraka ta te tangata kia tupu i taau ra.

12 Mate iora to Kusa ia Iehova i mua i te aroaro o Asa, e i mua i te aroaro o Iuda; ati atura to Kusa.

13 Kua aru aturā Asa e te au tangata ravarai ia ratou e tae atura ki Gerara: e eketumu rava to Kusa, e kare i etaeta akaou; pou atura oki ratou i mua ia Iehova, e i mua i te nuku nana ra; e apinga maata oki to taua eke ra i te riro anga kia ratou.

14 Tairipotiia iora e ratou te au oire e pini ua ake Gerara ra; kua rokoia iora oki ratou e te mataku ia Iehova: noniia iora oki e ratou taua au oire katoa ra; e apinga maata oki tei kitea i roto ra.

15 Pou iora oki te au tiaki anana ia ratou, e kua rave akera i te au mamoe e te au kamela e manganui, oki maira ki Ierusalema.