1 Paraleipomeno
16 KUA apai maira ratou i te aruna a te Atua, e kua tuku iora ki rotopu i te Are i akatuia e Davida no taua aruna ra: e kua apai ratou i te au atinga karakaratio, e te au atinga au, ki mua i te aroaro o te Atua ra.
2 E oki akera ia Davida te au atinga karakaratio, e te au atinga au, i te apaiia, kua akaora aia i te tangata i te ingoa o Iehova.
3 Kua tua iora aia ki to Iseraela ravarai, ki te tane ma te vaine, i tetai manga faraoa, e tetai manga puaka, e tetai āriki wina.
4 Kua akataka iora aia i tetai pae ngati Levi ei rave i te angaanga ki mua i te aruna a Iehova, e kia tuatua, e kia akameitaki, e kia akapaapaa i te Atua no Iseraela ko Iehova:
5 Ko Asapha tei maata ia ratou ra, e ko muri ake iaia, ko Zekaria ïa, ko Ieiela, e ko Semiramota, e ko Iehiela, e ko Matitia, e ko Eliabo, e ko Benaia, e ko Obeda-edoma: e ko Ieiela ma te au nabala e te au kinura; karekā Asapha, kua akatangi ïa i te au sumebalo ra;
6 Ko nga taunga ra ko Benaia raua ko Iahaziela, te mou ra ia i te au pu ki mua i te aruna koreromotu a te Atua ra, kare i tukumoe.
7 Tei taua rā ra ta Davida tuku anga mua i te akapaapaa anga ia Iehova ki roto i te rima o Asapha e tona ai taeake.
8 E akameitaki ia Iehova, e tautopa i tona ingoa; e akakite i tana au ravenga ki rotopu i te tangata.
9 E imene iaia, e imene iaia i te salamo, e tuatua i te au angaanga taka ke ravarai nana ra.
10 E akapaapaa kotou i te ingoa tapu nona; kia rekareka te ngakau o te aronga i kimi ia Iehova.
11 E kimi ia Iehova e tona ririnui: e kimi tamou i tona mata.
12 E akamaara i tana au angaanga taka ke tana i rave ra; i tana ra au akairo, e te au tuatua-tau a tona vaa;
13 E te unga o tona tavini o Iseraela e, e te au tamariki a Iakoba, i ikiia e ia e.
14 Koia to tatou Atua, ko Iehova, ko tana tuatua-tau tei te pa enua katoa ia.
15 E akamaara rai kotou i tana koreromotu, aua e tukumoe; te tuatua tana i akaue maira, e tausani ua atu te uki;
16 Te koreromotu tana i papau kia Aberahama e tana taputou ia Isaaka;
17 Tana i akatinamou kia Iakoba ei ture; e ia Iseraela ei koreromotu mutu kore,
18 I te tuatua anga mai e, Ka oronga au i te enua ra ko Kanaana noou; ei kelero tuanga na kotou;
19 Te iti ra oki kotou kia tatau, e aronga iti rava, e te tangata ke ke oki, i reira.
20 Ka riro ei ratou mei tetai iti-tangata atu e tae ua atura ki tetai iti-tangata, e mei tetai basileia, e tae ua atura ki tetai papaki tangata;
21 Kare ratou i tukua e ia kia takinga-kinoia e te tangata ra; e ui ariki oki tei akoia e ia ia ratou,
22 Ka na ko ei ra e, Auraka e akatukia ua mai i tei akatainuia e au, e taku au peroveta auraka e takinga-kinoia.
23 E imene ia Iehova, e to te ao katoa nei; e akakite i te ora nana i tera rā i tera rā.
24 E akakite i tona kakā ki te au etene, te angaanga taka ke nana ki te au tangata ravarai.
25 E maata oki a Iehova, e kia maata tona akameitaki angaia: kia matakuia oki aia, auraka te au atua katoa.
26 Te au atua ravarai no te au etene ra e idolo ïa: ko Iehova ra tei anga i te au rangi ra.
27 Te kakā e te akangateitei tei mua ïa i tona mata; te ririnui e te mataora tei tona ïa ngai.
28 E o atu kia Iehova, e te uanga o te au tangata e, e o atu kia Iehova i te kakā e te ririnui.
29 E o atu kia Iehova i te kakā e tau ki tona ra ingoa, e apai mai i te atinga, e aere mai ki mua iaia; e akamori ia Iehova ma te akangateitei tapu.
30 Kia ruketekete kotou ki mua iaia, e te pa enua ravarai ra: kua akamouia oki teianei ao, kare ïa e ngaueue.
31 Kia mareka te au rangi ra, e kia rekareka te enua; ka tuatua i rotopu i te pa enua e, Ko Iehova te ariki.
32 Kia aruru te tai e tona ki katoa ra; kia pereperekavana te au kainga, e to roto katoa ra.
33 Ei reira e pingapingarekaʼi te au rakau o te vaorakau, ki mua i te aroaro o Iehova, te aere maira oki aia e akava i te enua nei.
34 E akapaapaa ia Iehova: e meitaki oki tona; e tu oki tona aroa e rimua.
35 Ka tuatuaʼi kotou e, Kia ora matou, e te Atua o to matou ora, e akaputuputu ia matou, e akaora ia matou i te au etene, kia akameitaki matou i to ingoa tapu ra, kia akatietie matou i te akapaapaa anga ia koe.
36 Kia akameitakiia te Atua o Iseraela ko Iehova e tuatau, e tuatau ua atu. Kua tuatua maira te tangata katoatoa, Amene, e kua akapaapaa ia Iehova.
37 Kua akanooiā Asapha ma tona au taeake e ia ki mua i te aruna koreromotu a Iehova, ei rave tamou i te angaanga ki mua i te aruna, i tei akonoia i te au rā katoa ra;
38 E ko Obeda-edoma te tamaiti a Iedutuna raua katoa ko Hosa, ei tiaki ngutupa ïa:
39 Kareka ko Zadoka taunga, e tona ai taeake taunga, tei mua ïa ite puakapa a Iehova, i te ngai teitei i Gibeona,
40 E apai te atinga karakaratio na Iehova ki rungao i te atarau atinga karakaratio i te popongi e te aiai, kare e tukumoe, e mei tei tataia i roto i te ture a Iehova, tana i akaue ia Iseraela ra:
41 E tei reira katoâ Hemana, e ko Iedutuna, e tetai pae ikiia ra, i akaikiia te ingoa, ei akameitaki ia Iehova, no te mea e tu tona aroa e rimua:
42 Ratou katoa ko Hemana e Iedutuna ma te au pu e te au sumebalo, e te au mea akatangi na te Atua ra, no te aronga e akatangi ra. E te au tamariki a Iedutuna, e aronga tiaki ngutupa ïa.
43 Aere atura te tangata ravarai, ko te tangata ki tona ra ngutuare: kua oki mairā Davida e akaora i tona ra ngutuare.