Daniela

9 I TE mataiti mua o Dariu te tamaiti a Ahasueru, no te uanga o Madai, ko tei akaarikiia ki runga i te basileia o te Kaledea;

2 I te mataiti mua o tona ra au, i kite ei au nei ko Daniela i te au buka ra i te rainga i te au mataiti, i tae mai ei te tuatua a Iehova ki te peroveta ra kia Ieremia, e kia itu ake ngauru i te mataiti i te tanea anga o Ierusalema e ope ei.

3 Kua anga atura au i taku mata ki te Atu ra ki te Atua, i te kimi anga i te pure e te pati anga, i te akakore anga i te kai e te kakau paoa, e te reu ai:

4 E kua pure atura oki au ki taku Atua ra kia Iehova, e kua aaki atura au, na ko atura, E te Atu, e te Atua maata e te matakuia, i te akono marie anga i te koreromotu, e te aroa, i te aronga inangaro mai iaia ra, e ia ratou oki tei akono i tana ra au akauenga;

5 Kua ara matou, e kua kino matou, e kua kanga matou, e kua meameaau matou, koia oki i te akaruke anga i taau ra au akauenga, e taau ra au tuatua-tau:

6 Kare akenei oki matou i akarongo ki to au tavini ki te au peroveta ra, ko tei tuatua mai i toou ingoa ki to matou au ariki, to matou ui ariki, e to matou au metua, e te tangata katoa o te enua nei.

7 Tei ia koe, e te Atu e, te tuatua-tika, kareka matou nei, ko te mata aringaringa ïa, mei tei teianei rā; i te au tangata o Iuda, e tei noo i Ierusalema, e to Iseraela ravarai e vaitata nei, e to te atea ke, i te au enua katoa i tuaruiaʼi ratou e koe, no to ratou kino i raveia e ratou ia koe ra.

8 E te Atu e, no matou rai te mata aringaringa, to matou au ariki, to matou ui ariki, ma to matou ai metua, no te mea kua ara matou ia koe ra.

9 Tei te Atu ra, tei to matou Atua, te aroa e te akakore anga i te au ara, meameaau uaʼi matou iaia;

10 Kare akenei matou i akarongo i te reo o to matou Atua ra ko Iehova, kia aaere na tana au ture, tana i tuku mai ki mua i to matou aroaro, i te rima o tona au tavini te au peroveta ra.

11 Koia tika rai, ko Iseraela katoatoa tei ara i te ture naau ra, i te aere ke anga, kia kore ratou e akarongo i to reo; i maringi mai ei te kino ki runga ia matou nei, e te taputou i tataia ki roto i te ture a te tavini o te Atua ra a Mose, no te mea kua ara matou iaia.

12 Kua akatinamou oki aia i tana au tuatua, tana i tuatua mai kia matou nei, e ki to matou au akava tei akava mai ia matou ra, i te apai anga mai i te kino maata ki runga ia matou nei: kare rava oki e rave anga i raro ake i te rangi katoa nei, mei te rave ia Ierusalema ra.

13 Mei tei tataia ki roto i te ture a Mose ra, ko teia katoa nei ïa au kino i te iri anga mai ki runga ia matou nei: kare ra matou i pure ana ki mua i te aroaro o to matou Atua ra ko Iehova, kia ariu ke matou i to matou au kino, e kia kite i taau ra tuatua-mou.

14 I tapapaʼi oki a Iehova ki runga i taua kino nei, e i tuku mai ei ki runga ia matou nei: e tuatua-tika anake oki ta to matou Atua ta Iehova i te au angaanga katoa tana i rave nei: kare akenei oki matou i akarongo i tona reo.

15 E teianei, e te Atu, e to matou Atua, ko tei arataki mai i to au tangata mei te enua maira mei Aiphiti, ma te rima ririnui, e kua rongonui ia koe toou ingoa, mei tei teianei rā; kua ara matou, kua rave matou i te kino.

16 E te Atu, i tei tau oki ki taau katoa ra au tuatua-tika, te pati atu nei au ia koe, kia ariu keia oki to riri e to riri otooto i toou ra oire i Ierusalema, i to maunga tapu ra; no te mea, no ta matou nei au ara, e no te au ara a to matou nei ai metua, ko Ierusalema, e toou ra au tangata, tei riro ei akakino anga na te aronga katoa e akapini mai ia matou nei.

17 E teianei, e to matou Atua, e akarongo mai koe i te pure a to tavini nei, e tana e pati nei: no te Atu nei oki, e akakakā mai koe i to mata ki runga i to ngai-tapu i tanea nei.

18 E taku Atua e, e ariu mai i to taringa, e e akarongo mai; e akapuera i o mata, e e akara mai i to matou pou anga, e te oire i tapaia i toou nei ingoa: kare oki no ta matou tuatua-tika i pure atu ei matou ia koe, no toou ra aroa maata.

19 E te Atu, e akarongo mai; e te Atu, e akakore mai i te ara; e te Atu, e akono mai, e e rave; auraka e tavarevare, noou uaorai, e taku Atua: no te mea kua tapaia toou oire, e toou ra au tangata, i toou uaorai ingoa.

20 Te tuatua ua ra au, e te pure ua ra, e te aaki ua ra au i taku nei ara, e te ara a toku au tangata nei a Iseraela, e te akakite ra au i taku pati anga ki mua i te aroaro o taku Atua ko Iehova, no te maunga tapu o taku Atua;

21 Koia rai, te tuatua ua ra au i taua pure ra, ko taua tangata ra ko Gaberiela, ko taku oki i kite i te orama i muatangana, kua akangakoikoiia mai, e kua tae maira kiaku nei i te tuatau i te atinga kai aiai ra.

22 E kua akakite maira aia kiaku, e kua tuatua maira aia, na ko maira, E Daniela, i aere mai nei au i tenana e oronga mai i te karape e te kite kia koe.

23 I te akamata anga i te pure naau ra i riro mai ei te tuatua, e kua aere mai nei au e akakite kia koe; no te mea kua akaperepere maataia koe: e teianei, kia kite koe i taua tuatua nei, e akamaara oki i te orama.

24 E itu ngauru anga i te ebedoma i akonoia i toou ra au tangata, e toou ra oire tapu, ei popani anga atu i te tatipake anga, ei akaoti anga atu i te au ara, e ei tapoki anga atu i te kino, e ei akao anga mai i te tuatua-tika mutu kore ra, ei popani anga atu i te orama e te totou ra, e ei akatainu anga i Tei Tapu ra.

25 E teianei kia kite koe, e kia taka tikai, mei te riro anga o te tuatua, i te rave akaou e te patu ia Ierusalema e tae rava atu ki te Mesia te Ariki ra, e itu ïa ebedoma, e nga ebedoma oki e ono ngauru ma rua; e patu akaouia oki te arataa e te koro i te tuatau pekapeka ra.

26 E ope akera nga ebedoma e ono ngauru ma rua e tipu keiaʼi te Mesia, kare ra nona uaorai: ei reira te au tangata o te ariki e aere maira e akapou ei i te oire e te ngai-tapu; e motu ke atu oki ratou mei te riro vai puke ra, kua akonoia oki taua au pou ra e ope rava akera te tamaki.

27 E akatinamou oki aia i te koreromotu ki te tangata e manganui e okotai akera ebedoma: e i rotopu oki i taua ebedoma ra e akakore ei aia i te atinga e te atinga kai, e riro ei roto i te iero taua mea rikarika e akatanea ra; e tukuia oki te reira no te pou e tae rava atu ki te openga i akonoia ra.