Salamo

66 E MAEVA i te rekareka i te Atua, e te pa enua katoa e;

2 E imene ei akakakā i tona ingoa: e akariro i tona kakā ei akapaapaa anga iaia.

3 E karanga atu ki te Atua, E au ravenga mataku taau! no toou ra mana maata e tatomo mai ei to au enemi ia koe ra.

4 E akamori te pa enua katoa nei ia koe, ka imene oki ia koe; ka imene i toou ingoa. Sela.

5 E aere mai e akara i te au angaanga a te Atua! e mea mataku tana i rave i te tamariki a te tangata nei.

6 Kua akariro aia i te tai nei ei one marō! kua na raro ua ratou na te vai i te aere ua! i reira to tatou rekareka anga iaia.

7 Te mana nei aia i tona ririnui e tuatau ua atu; te akara tamou ra tona mata i te au etene: auraka te aronga māro ra e akateitei ia ratou uaorai. Sela.

8 E te au tangata nei e, e akameitaki i to tatou Atua, kia akarongoia oki te reo i te akameitaki anga iaia:

9 Ko tei tiaki i to tatou vaerua e oraʼi, e kare e tuku i to tatou vaevae kia ngaueue.

10 Kua timataia matou e koe, e te Atua e; kua tamāia matou e koe mei te ario i tamāia ra;

11 Kua arataki koe ia matou ki roto i te kupenga, kua tuku koe i te apainga teiaa ki runga ia matou.

12 Naau i akaoro i te tangata na runga i to matou mimiti: kua na roto matou i te ai e te vai; kua arataki ra koe ia matou ki te enua apinga.

13 Ka tomo au i to are ma te atinga karakaratio; ka akatupu au i taku au tia ia koe ra,

14 Tei tuatuaia e toku ngutu, e ta toku vaa i akakite i toku tumatetenga anga ra.

15 Te atinga karakaratio matu ra taku e apai atu kia koe ra, te mamoe toa matu katoa: te puakatoro e te puaka-nio, taku ïa e apai. Sela.

16 E aere mai, e akarongo, ko kotou ravarai e mataku i te Atua ra; e naku e akakite i tana i rave i toku nei vaerua.

17 Kua kapiki atura toku vaa iaia, e kua akateitei toku arero iaia;

18 Naringa ra te akatika ra toku ngakau i te kino, kare au i akarongoia mai e te Atu.

19 Kua akarongo tikai ra te Atua; kua akono mai i taku i pati atu.

20 Kia akameitakiia te Atua, koia kare i kopae i taku nei pure, e tona aroa iaku nei.