Ezekiela

14 E KUA aere maira tetai pae i te aronga pakari o Iseraela, e kua noo maira i mua iaku.

2 E kua tae maira te tuatua a Iehova kiaku nei, na ko maira,

3 E te tamaiti a te tangata na, kua akatu teianei aronga tangata i to ratou au idolo ki roto i to ratou ngakau, e kua tuku i te turorianga o ta ratou ara ki mua i to ratou mata: e tika ainei kia uiia mai au e ratou?

4 E teianei, e karanga atu koe kia ratou, e na ko atu kia ratou, Te na ko maira te Atu ra ko Iehova; Te au tangata katoa no te ngutuare o Iseraela nei, i tei akatu i tona au idolo ki roto i tona ngakau, e kua tuku i te turorianga ra o tana ara ki mua i tona mata, e kua aere maira ki te peroveta ra, ko au ko Iehova te ka tuatua atu kiaia i tei aere maira i te maata anga o tona ra au idolo;

5 Kia ii te ngutuare o Iseraela i to ratou uaorai ngakau, no te mea kua taka ke anake ratou iaku i to ratou au idolo.

6 E teianei, e karanga atu ki te ngutuare o Iseraela, Te na ko maira te Atu ra ko Iehova, Ka ariu mai, e ka ariu ke atu i to kotou au idolo; e ka ariu ke atu i to kotou mata i to kotou katoa ra au mea viivii ra.

7 Te au tangata katoa oki no te ngutuare o Iseraela, e to te tangata ke katoa i noo ua i Iseraela nei, ko tei akataka ke iaku ra, e kua akatu i tona au idolo ki roto i tona ra ngakau, e kua tuku i te turorianga o tana ra ara ki mua i tona mata, e kua aere maira ki te peroveta e ui iaia iaku nei, naku uaorai, na Iehova, e tuatua atu kiaia:

8 E anga oki au i taku mata ki te reira tangata, e e akariro au iaia ei akairo, e ei tuatua anga, e e tipu ke atu au iaia i rotopu i toku nei au tangata; e kite oki kotou e ko Iehova au.

9 E kia vare te peroveta i taua tuatua tana i tuatua ra, naku, na Iehova i vare ei taua peroveta ra, e akatika atu oki au i toku rima ki runga iaia, e akakore oki au iaia i rotopu i toku nei au tangata ia Iseraela.

10 E na ratou e apai i te utunga o ta ratou ara: te utunga o te ara a te peroveta ra, okotai rai ïa e te utunga o te ara a te tangata i kimi ra;

11 Kia kore te ngutuare o Iseraela e akatitima akaou iaku nei, e kia kore oki ratou e viivii akaou i ta ratou katoa ra au ara; kia riro ra ratou ei tangata noku, e kia riro au ei Atua no ratou, te tuatua maira te Atu ra ko Iehova.

12 Kua tae maira oki te tuatua a Iehova kiaku nei, na ko maira,

13 E te tamaiti a te tangata na, kia ara te enua iaku nei, e kua maata rava te ara, e akatika au i toku rima ki runga i te reira enua, e e aati au i to reira tauturu ra, i te kai, e ka apai atu au i te onge i rungao ra, e akakore oki au i to reira tangata e te puaka katoa ra:

14 E te noo ra eianei puke tangata toko toru, ko Noa, e ko Daniela, e ko Iobu i reira, ko to ratou uaorai vaerua te ka ora i ta ratou ra tuatua-tika, te tuatua maira te Atu ra ko Iehova.

15 Kia tuku atu au i te au puaka taae na roto i te reira enua, e pou iora ia ratou, e riro iora te reira ei tanea, e kare atura e tangata e na reira te aere no taua au puaka ra:

16 E tei reira taua nga tangata toko toru ra, te na ko maira te Atu ra ko Iehova, Te ora nei au ra, kare te au tamariki tamaroa, e te au tamariki tamaine, e ora ia ratou; ko ratou uaorai te ka ora, e tanea ra taua enua ra.

17 E kia apai mai au i te koke ki runga i te reira enua, ka karangaʼi e, E te koke, ka aere na roto i teianei enua; e pou roa akera te tangata e te puaka katoa iaku:

18 E tei reira taua nga tangata toko toru nei, te na ko maira te Atu ra ko Iehova, Te ora nei au, kare te au tamariki tamaroa, e te au tamariki tamaine, e ora ia ratou, ko ratou anake uaorai ra te ka ora.

19 E kia apai atu au i te maki-mate ki runga i taua enua ra, e kia riringi a toto ua atu au i toku riri otooto ki rungao, kia pou rava atu to reira tangata e te puaka katoa ra:

20 E te noo rā Noa, e ko Daniela, e ko Iobu, i reira, te na ko maira te Atu ra ko Iehova, Te ora nei au ra, kare te tamaroa, e te tamaine e ora ia ratou, ko to ratou uaorai vaerua te ka ora i ta ratou ra tuatua-tika.

21 E teianei, te na ko maira te Atu ra ko Iehova; ka tanga atu ei i nga mate katoa naku e a katoa ra kia apai atu au ki runga ia Ierusalema, i te koke, e te onge, e te puaka taae, e te maki-mate, kia pou rava to reira tangata e te puaka katoa oki.

22 E i na, e toe rai tetai toenga i reira, te ka aratakiia mai ïa, i te au tamaroa, e te au tamaine katoa ra: i na, e aere mai ratou kia kotou na, e kite oki kotou i to ratou aerenga, e ta ratou ravenga: e e akapumaanaaia kotou i te au kino taku i apai ki runga ia Ierusalema, i te au mea katoa taku i apai ki runga iaia ra.

23 E na ratou e akapumaana mai ia kotou, kia akara kotou i to ratou aerenga, e ta ratou ravenga: e kite oki kotou e, kare au i rave tumu kore ua taku i rave iaia ra, te tuatua maira te Atu ra ko Iehova.