Salamo

55 E ARIU mai i to taringa, e te Atua, i taku pure; auraka kia puroku i to mata i taku i pati nei;

2 E akono mai ana kiaku nei, e akarongo mai; te mānu aere ua nei au i toku pekapeka anga, e te ngunguru nei au,

3 No te reo o te enemi; no te takinga-kino o te aronga kino: te uri mai nei ratou i te ara ki runga iaku, e te akateitei nei ia ratou uaorai ma te riri iaku nei.

4 Kua mamae roa toku ngakau i roto iaku nei; kua rokoia au e te rikarika mate ra.

5 Kua rokoia au e te mataku e te rutetetete; e kua tapoki roaia au e te koriria.

6 Kua tuatua akera au, Naringa tikai e peau toku mei to te kukupa! e rere ke ïa au i reira e akaangaroi ei:

7 I na, e rere ke au ki tetai ngai mamao, ka noo uaʼi i roto i te medebara. Sela.

8 E aere viviki ïa au ki te pipinianga, i te matangi viviki nei i te uriia.

9 E akakore, e te Atu, kia mavete o to ratou arero: i kite ana oki au i te takinga-kino e te taumāro i roto i te oire nei.

10 Te akapini nei ratou i te reira, i te po e te ao, na runga i te au patu ra; e tei rotopu ra, ko te kino ïa e te aue.

11 Kino maata tei rotopu iaia; kare oki te pikikaa e te tapikipiki e taka ke i to reira au arataa.

12 Kare oki e enemi tei akakino mai iaku ra; e tika iaku kia akakoromaki i te reira; kare oki e tangata e makitakita mai iaku tei akamaata ki runga iaku ra, e tika ïa iaku kia pipini iaia:

13 Ko koe ra, ko te tangata i aite iaku ra; ko taku tangata mātau, e toku oa.

14 E tuatua memeitaki ta taua i tuatua ra; e kua aaere katoa taua ki te are o te Atua ra.

15 Ka rokoia uaia mai ratou e te mate; e aere ora ua ratou ki raro i te vaarua ra: e ara oki tei to ratou au nooanga tei rotopu ia ratou.

16 Kareka au nei ka kapiki au ki te Atua, e na Iehova e akaora iaku.

17 I te aiai, e te popongi, e te avatea, ka pure ei au, ka kapiki nui au, e ka akarongo mai aia i toku reo.

18 Kua akaora aia i toku vaerua ma te au, i tei tamaki mai iaku nei: e manganui oki tei piri mai kiaku.

19 Ka akarongo mai oki te Atua iaku, e ka taakaaka aia ia ratou; koia ko tei noo mei te tupua roa mai. Sela. No te mea te vai ua mai rai to ratou tu, i kore ei ratou i mataku i te Atua.

20 Te rave nei tona rima i tei noo au ua i ona ra, kua akaatikau aia i tana koreromotu iaia ra.

21 E pateka maata tona vaa i to te bata ra, e tamaki ra tei tona ngakau. Tana tuatua e maru maata ïa i to te manongi ra, e tau ra ki te au koke i unuiia ra.

22 E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.

23 Kareka i tera, e te Atua, naau e tuku ki raro i te vaarua o te mate ra: ko te au tangata toto ra e te pikikaa ra, kare ïa e tae i rotopu i to ratou ra puke rā ka mate ei; e irinaki ra au ia koe.