Genese
28 KUA karanga aturā Isaaka kia Iakoba, e kua akameitaki atura iaia, e kua ako atura iaia, e kua na ko atura iaia, Auraka koe e akaipoipo i te vaine no te au tamaine a Kanaana nei.
2 Ka tu, e aere ki Padana-arama, ki te ngutuare o Betuela, ki te metua tane o to metua vaine nei; ka akaipoipo ei i tetai vaine no reira, no te au tamaine a Labana ra, a te tungane a toou metua vaine nei.
3 E kia akameitaki mai te Atua Mana katoatoa ia koe, e akariro ia koe ei katiri, kia akamaataia koe, kia riro koe ei au iti-tangata e manganui ua atu;
4 E kia oronga mai aia i te meitaki o Aberahama ia koe, noou, e no toou katoa ra uanga; kia rauka ia koe te enua taau i noo tuitarere ua na, ta te Atua i oronga mai no Aberahama.
5 Kua tuku aturā Isaaka ia Iakoba kia aere; e kua aere atura aia ki Padana-arama kia Labana ra, te tamaiti a Betuela ngati Arama, ki te tungane o Rebeka, te metua vaine o Iakoba raua ko Esau.
6 E kite akerā Esau e, kua akameitaki a Isaaka ia Iakoba, e kua tono iaia ki Padana-arama, kia akaipoipo aia i tetai vaine no reira; e kua ako aia iaia i tana akameitaki anga iaia ra, i te na ko anga e, Auraka koe e akaipoipo i te vaine no te au tamaine o Kanaana nei;
7 E kua akarongo a Iakoba i te metua tane e te metua vaine, e kua aere ki Padana-arama:
8 E kite akera oki a Esau e, kare tona metua ra ko Isaaka i taurekareka ki te au tamaine o Kanaana ra;
9 Aere aturā Esau ki o Isemaela ra, e akaipoipo atura i te tuaine o Nebaiota ia Mahalata, te tamaine a Isemaela, te tamaiti a Aberahama ra, ei vaine nana, ei kapiti katoaia i nga vaine ana ra.
10 Kua aere aturā Iakoba mei Bere-seba, e aere atura ki Harana ra.
11 E kua tae atura aia ki tetai ngai, e noo iora aia i reira, no te mea kua opu te rā; e kua rave aia i etai toka i taua ngai ra, e kua tuku atura ei urunga nona, e kua moe iora aia i te reira ngai.
12 E e rikamoe oki tana, e i na, e atamoa, kua akatuia ki runga i te enua nei, e kua tae roa te kauru o te reira ra ki runga i te rangi: e i na, te kake ra te au angela a te Atua ki runga, e te eke maira ki raro, i taua atamoa ra.
13 E i na, te tu ua mairā Iehova i rungao i te reira, e kua tuatua maira, Ko au ko Iehova, ko te Atua no toou metua ra no Aberahama, e te Atua no Isaaka: ko te enua taau e moe na, e orongaia e au noou, e no toou ra uanga:
14 E ka riro toou ra uanga mei te ungaunga-one o te enua nei, e ka tae roa koe ki te opunga o te rā, e te itinga o te rā, e ki apatokerau, e ki apatonga: e ei ia koe, e ei toou ra uanga, e meitaki ei te au kopu-tangata ravarai o te ao nei.
15 E i na, tei vaitata au ia koe, e naku koe e tiaki i toou na au aerenga katoa, e ka akaoki mairai au ia koe ki teianei enua; kare oki au e akaruke ia koe, e kia ope roa taku i akakite kia koe i te akatupuia e au ra.
16 Kua itirere akerā Iakoba i tana moe, kua na ko akera. Tei ko nei tikai a Iehova i teianei ngai; kare oki au i kite.
17 Mataku iora aia, e kua tuatua akera, E ngai mataku maata teia! ko te are teia no te Atua, e ko te ngutupa teia no te rangi.
18 E kua tu akerā Iakoba ki runga i te popongi roa ra, kua rave iora i te toka tana i tuku ki raro ei urunga nona ra, kua akatu akera ei tuaau, e kua riringi iora i te manongi ki rungao.
19 E kua tapa iora aia i te ingoa o taua ngai ra, ko Betela; kareka te ingoa o taua oire ra i muatangana, ko Luza ïa.
20 E kua tia iorā Iakoba i te tia, na ko atura, Kia tika i te Atua e, ei vaitata aia iaku, e kia tiaki mai aia iaku i toku nei aerenga, e kia oronga mai i te kai naku e kai, e te kakau ei kakau,
21 E kia akaoki mai iaku ki te ngutuare o toku metua ma te au; e Atua noku a Iehova i reira:
22 E ka riro teianei toka taku i akatu io nei ei tuaau ra, ei are no te Atua: e te ngauru o te au mea katoa taau e o mai noku nei, ka apaiia ïa e au naau.